如是者,我開始觀察附近嘅環境。

果然,破曉時分感染者都會莫名失蹤,仲要係大量。

會唔會係佢地嘅肉身仲保留往常嘅慣性?

到依家都未完全肯定,佢地喺受到感染之後係進入死亡狀態,定抑或係細菌入侵細胞,並且進行人體加上思想控制?不得而知。

喺呢個情況下,我邊觀察,邊思考。



同學們面部表情掩蓋得唔錯,表面上有幾位係完全唔驚,將自己嘅表情管理得好好。

但實際上,內心可能已經諗緊自己到底使唔使捨身成仁,又可能諗緊親人。

事實上,我見到最多嘅,就係對「未知」嘅恐懼。

佢地並唔知道下一秒嘅自己會見到咩新奇古怪嘅感染者,又唔知自己會見到咩奇珍異獸,對於自己嘅生命感到少許嘅無助。

只好用盡全力應付!幫大家把壓力盡量減低。



觀望四周嘅環境,大概有三處地方喺可以作為據點。

鐵路站(鑽石山),公園(南蓮園池),游泳池(斧山道)。

暫時留意到,公園範圍有人類聚集,粗略估計係一個小型群體。

出入我眼球嘅都只有幾位同樣嘅倖存者。

一個青年,一個婦人,加上一個僧侶?



奇怪,點會係咁嘅組合。

唔通係唔見得光嘅?

事實證明我諗多咗,其實只係啱啱好佢地幾個前後腳出入。

我再觀察咗半分鐘就已經發現其他人嘅蹤跡。

咁即係話呢度已經有人佔領,再諗深一層,附近嘅商場都有可能成為佢地嘅地頭。我地再前去探索都有可能空手而回。

「搞掂啦!」其中一位負責移開障礙物的同學說。

我留下最後一點目光,再望一眼呢條本該繁忙嘅龍翔道。

已經變成一條廢棄道路,成為呢個都市嘅遺跡。



居高臨下,放眼望去真係唔同。

好彩佢地未注意到我地嘅存在。

「行啦!趕上去!有幾多油踩幾多!」我心中想着他們的安危。

一直上,一直上。

富山邨,

感染者未有活動。

火葬場,



可能係冇人會上去,

冇見任何蹤影。

就快到了。

我地準備好梁靜茹俾我地嘅勇氣。

學校邨。

景象放映。感染者成災,多不勝數。

用一個詞語嚟概括,就係「泛濫」。

喺眼前嘅,係唔知點解會大量出現嘅「青」。



仲要係由學生轉化而成。

點解我會知道佢地係學生?

並非我睇人準,而係佢地身上着住嘅衣物已經幫佢地表明身份。

照道理,唔應該有學生呢段日子翻學。

明明係放大假嘅時候。

但仔細再睇,會發現佢地係大過我地,而且身型比較上都佔優。

佢地嘅發育已經完全。



男嘅高我地一個頭嘅有,高大威猛。

矮我地一個頭嘅都有,毒L咁款。

同時肌肉量都係明顯勝過我地。

女嘅就有高有矮,玲瓏浮突。

當中有幾個特別出眾,身高非常不合理。

佢地已經有成熟男女性應有嘅氣質同體態。

斷估大部分都係準備應考文憑試嘅嘅師兄師姐。

努力耕耘,到底為咗啲咩?

為咗未來過上好生活?

定係為咗讀書而讀書?

為一個考試,日夜癲倒,有意思咩?

倒不如及時行樂?

喪失自我嘅生活,並不存在生命。

生命無常,就好似依家咁樣。

讀書又有何用?考試未到,已經全軍覆沒。

以往因為溫書而失去嘅時間,都白白浪費。

成日都打算未來,點解唔着眼現實?

呢啲時間,你可以攞嚟識朋友,識男仔識女仔都好,識到個終身伴侶仲好。

你又可以用嚟觀察世事,觀察呢個香港。

放低考試之後,一切都可以慢慢嚟。

用心諗下,你真係鍾意呢個一日到黑都忙碌到底嘅生活咩?

我唔鍾意。我切切實實同你講。我唔鍾意。

就好似我唔鍾意食苦瓜咁樣,唔鍾意就要講出嚟。

等你身邊嘅人知道,等呢個社會知道。

你唔鍾意我唔鍾意都好,反正我就係唔鍾意。

最後一句,所有事,都有人幫手分擔就最好。

「You’ll never be alone.」
已有 0 人追稿