「佢年紀大啦,依幾年有啲咩都係我代勞」萬十方說

「佢同秦王交過手?」九叔繼續問

「好多年嘅事啦,個陣我都未跟佢學野,應該係話,我都未出世,聽佢講當年佢地係打成平手,最後佢搏埋老命先封印到秦王,去到今時今日,佢冇可能再做多一次」

「原來你師父就係秦王口中三十幾年前封印佢嗰個人...」我驚訝的說

「最衰我依家連佢一半功力都冇,跟本冇可能封印到佢」萬十方懊惱的雙手按著頭





「佢有冇講當年係用咩方法去封印秦王㗎?」英叔問

「用自己嘅魂魄,佢用咗自己一半嘅魂魄去封印住秦王」

「魂魄?!」雖然我不懂,但一聽就知道會是有嚴重後遺症的做法

「自從個次之後,佢嘅身體就變得好差,功力冇咗一大半,佢話依個做法叫「噬魂」,消耗自己嘅魂魄將自己嘅功力推高,一經施展就冇辦法返轉頭」

「不如你帶我地去見你師父,或者仲有冇其他方法可以對付秦王」九叔要求見萬十方的師父





「唔係我唔想帶你地見,係連我都唔知佢係邊,依幾年佢會四周圍去,冇定居之處,好難搵到佢,多數都係佢搵我」萬十方也顯得愛莫能助

「咁....咁你盡量搵佢,搵到佢同我地講聲,唔該你」九叔也只能作罷

「我盡量啦,咁冇咩我走先,有咩再講啦」萬十方站起來

他走到去大門前,作出手印,在我們面前消失了

「佢真係可以就咁消失...」不是親眼到也有點難接受這事實,瞬間移動....





「依個𡃁仔嘅靈力唔係講笑,隨時我地兩個加埋都唔夠佢嚟」英叔說

「咁又太誇張」九叔搖著頭說

「九叔,其實消耗魂魄會有咩問題?」我問

「問題好多,身體會變的好虛弱,功力大減,記憶可能會模糊,嚴重嘅會死」九叔解答我的問題

「咁萬十方個師父都好搏....」

「有啲野去到個一刻就冇話搏唔搏,係需唔需要,可能佢覺得比秦王出關會有好嚴重嘅後果,所以咪咁做」九叔嚴肅的說

「咁又係...」

在之後幾天都沒有收到萬十方的消息,應該還未找到他師父,而新聞則每天報道著發現乾屍,從未間斷





「日日都有乾屍...」我看著新聞報道

「咁落去,好快就冇人出街㗎啦」英叔坐在沙發上

九叔則依舊坐在搖椅上

夢晞從門外進來

「九叔英叔,今晚想食咩餸啊?我一陣同啊媽出去買餸啊」夢晞問他們

「今晚唔洗預我啊,我夜啲出去搵啲老朋友敘舊」英叔跟夢晞說

「你都有朋友?」九叔笑說





「大把啊!邊似你!自己一個過幾十年都得嘅!」英叔反駁

「自己一個不知幾開心」九叔躺在搖椅閉著眼說

「你條友真係傻㗎」英叔搖頭說

「好啦,唔好嘈啦~英叔出去,咁九叔呢?想食咩啊?」夢晞問九叔

「冇所謂,你幫得我決定得啦」九叔依舊閉著眼說

「哦~咁好啦,咁今晚我話事」夢晞笑說

「我一陣陪你出去一齊買啦,重啊」我跟夢晞說

「好啊~」夢晞開心的笑著看我





英叔大約六點多就出門,我問過他,他說是跟其他派別的朋友去大排檔聚會一下,順便可以問一問有沒有關於乾屍案的線索

「啊文,依排有冇野做緊?」英叔問他的朋友

「搵咗份保安做下囉,捉鬼又搵唔到食」啊文說

「係.....?」這一刻英叔的腦海閃過了九叔幫段天後收到的那張支票

「不過,好彩個橦大廈好多鬼,捉都捉唔曬,都叫有啲世藝咁啦」他說

「你咪好,我係學校做校工咋,日日拖地掃地,以前就揸木劍依家就揸木棍」另一個朋友抱怨著

「啊權,依家時勢唔好啊,有份工都叫好啦」英叔安慰他





「淨係講我地,咁你呢?」啊文問英叔

「我?我見返我師弟」

「啊九?!」啊權驚訝

「係啊」英叔點頭

「佢仲有冇嬲你?」啊文問

「應該冇掛,依排都經歷幾多事,應該睇開咗,同埋佢收咗個新徒弟」英叔說

「咦!肯收徒弟姐係睇開咗啦」啊權說

「希望係啦」英叔無奈的說

「話說你地有冇留意最近個啲乾屍案?」英叔開始入主題

「有啊,依排加埋都幾十單啦,都唔知係咩做嘅」啊文說

「我有一次遇過啊,個日我凌晨經過一條後巷,發現陰氣極重,我一行入去睇見到有個黑影閃過,我追佢唔到,之後轉身望就見到有條乾屍係到」啊權說他跟兇手見過面

「咁你有冇見到佢嘅特徵?」英叔問他

「當時太暗啦,咩都睇唔到」啊權搖頭

於是,今晚英叔是得不到有用的資訊

酒過三巡,英叔他們都喝的面紅耳熱,聚會完結

「下次再約啦!下次叫埋啊九出嚟!」啊權喝醉了

「喂,啊權!你醉啦,我送你返去啦」英叔說

「唔洗!我屋企好近!穿過依條後巷就係」啊權執意自己回家,英叔也沒再執著

誰不知,英叔剛轉身走時,後巷就傳出慘叫聲
已有 0 人追稿