［打鬥/靈幻/鬼怪］《輪迴。道》/《噬魂》我由古惑仔變咗做現代道士: 201

我望向他，看衣著應該是老師，男老師，身穿藍色裇衫，黑色西褲

「我？我講咗啦，我係路過㗎咋」我說

「路過嘅可以出入自如？」他帶點質問的語氣

「自如？」我看一看身上的傷

「最起碼你可以全身而回，我啲同事同學生全部有去無回」他眼神透露着一點哀傷





「你身上有符紙，我估你應該係道士？」隔幾秒後他說

「呃...唉....都算半個啦」我點頭

「你係道士...咁我地啲同學...真係變曬殭屍？」梁天焯緊張的問我

「你地以為我真係呃你地？」我看著他

「點解會咁....拍戲咩...」他倒坐在地上





「如果係拍戲都仲可以NG....我都想係拍戲」我無奈地說

「啱啱有一個叫楊永嘅，佢變咗殭屍，比起其他殭屍勁好多，佢係咩人？」我想起要問的問題

「楊永？佢係我地學校嘅運動王嚟㗎，咩運動都叻，就算未玩過嘅運動，一掂就上手」梁天焯說

原來是運動能手...怪不得這麼大力，難道說，變殭屍前的人物特性會影響變殭屍後的能力

「你係道士嚟㗎嘛！！你救我地出去！！或者殺曬佢地！！」那個啊傑突然衝上來捉著我





「個啲係我地同學嚟㗎！！點可以殺佢地㗎？！」其他同學聽到後反應頗大

「你地聽唔到咩？！佢地變曬殭屍啦！」啊傑反駁

「今次佢講得啱，除咗殺....我冇其他方法」我默默的說

「依家我唯一可以做嘅就係帶你地離開依到」我續說

「你有咩計劃？」 那男老師問我

「計劃？未有」我冷笑一下

「咁我唔可以比我班學生就咁跟你出去」他眼神變的凌厲

「咁你地打算同你班學生係到等死？」我問他





「我同你出去行一轉，睇下學校咩情況先」他捲起衣袖

「唔得，我自己一個人出去都會有危險，帶埋你就盞拖累我」我反對

「拖累？我未做老師之前係做消防員」他看著我

的確，他的身形也不像文弱書生

「咁應該唔拖累係啦掛」他笑說

「點叫你？」我問

「重要？」他反問我





「起碼你死咗我可以幫你打返堂齋」我笑著說

「聶修揚」他笑說

於是，就這樣我在多了一個「同伴」底下再次在學校遊走，目標先是去校工房拿鐵剷，讓聶修揚當作武器，然後再將殭屍引離出口，安全把學生帶離學校

「校工室係邊？」我問他

「操場側邊」他左看右看

「呃....佢地依家應該就係曬操場」我無奈的說

「咁啊...」他擺出思索的表情

「你之前係消防員啊嘛，咁應該識游繩啦」我解開捆在身的捆仙索





「哈，我係分局嘅紀錄都依家都未有人破到」他揉一揉鼻子，擺出自豪的樣子

「咁我可能要分開行動啦」我想到一個方法

「點做？」他問

我腦海裏的計劃是，聶修揚帶著繩索上六樓找位置綁好，然後用電話較鬧鐘作出聲響，把殭屍引上去，然後再游繩逃到地面，我就趁機走去校工室拿鐵剷

「有冇信心？」我問他

「咁一係你游繩，我拎鐵剷？」他說

「游繩你叻啲，交比你」我怯一怯





「得啦，最緊要班學生冇事」他拍一拍我

「我諗做老師做到咁兇險，你都係第一個啦」我笑說

「第一？我中意依個感覺啊」他也笑了

「咁依家上六樓啦」我說

「好」

我先掩護他走上六樓，確保他能安全進行計劃，沿途比我想像中的安全，只有一兩隻殭屍，而且比楊永弱得多，輕鬆解決了

「話說，點解你叫自己做半個道士？」他問我

「你見唔到我啱啱淨係打近身咩？」我無奈的說

「係啊」他點頭

「因為我一招法術都學識，唯一可以做到嘅就係用爆破符」

「好難學？」他問

「其一啦，其二係依排太多事發生，冇時間練習」

突然！！從背跳出一隻殭屍，騎在我身上！！