「嘩….係咩人可以咁犀利?!竟然可以一刀斬甩最強掌門個頭!」我驚嘆的說道

「唔知,就算當年親眼見住依件事發生嘅人都冇人見到嗰個人嘅真面目,淨係有人聽到佢自稱為朕」

「咁神秘….」

「當年我地五派都有發散唔少人去搵依個人,但冇人搵到,連一丁點線索都冇留低」

「件事係幾耐之前發生㗎?」





「我記得嗰陣我應該得十八歲」九叔回想

「咁都好多年前啦喎」我隨便說了一句

但換來九叔的斜視

「呃…都唔係好耐姐」我馬上改口

「就係因為咁,所以無極門就沒落?」啊仁為我轉移話題





「嗯」九叔點頭

「但無極門唔係好多高實力嘅人㗎咩?選過一個新嘅掌門咪得囉」我說

「好啦,冇結果嘅事唔好討論住,講返總會先」

「好」

「啱啱講到依家我地有分為四派,本來係四派有史以來都係獨立行事,但係十年前,四派都有人提出不如四派合作,組成一個協會」





「咁樣大家就可以最快咁知道各區嘅消息,亦可以適當咁派人去處理各區嘅突發事件,經過四派嘅掌門嘅相議後,終於成立咗今日嘅總會」

「咁總會其實全名叫咩?」我問

「冇名,我地所有人都係叫「總會」」九叔說

「呃….好」我點頭

「九叔,咁你係邊一個門派㗎?」這次到啊仁問

「北門」九叔回答

「咁我地都算係半個北門人喎!唔知北門嘅掌門犀唔犀利㗎呢」啊仁跟我說

「做得掌門實力都一定唔差㗎啦!」我說





「咳嗯….北門派嘅掌門,企咗係你地面前」九叔乾咳一下,然後挺胸抬頭,一副傲嬌的樣子

我跟啊仁相視一眼

「嘩!九叔你好型啊!原來你係掌門啊!!」

「唔怪得三破日嗰日咁型啦!」

「我地跟到掌門學野!!」

「好啦好啦!你兩個死仔,平時做野又唔見你兩個咁積極,擦鞋咁主動」九叔搖頭嘆氣的看著我倆

「唔係啊九叔!」





「我地唔係擦鞋㗎!」

「真心說話嚟㗎!」

我倆一唱一和的說著

「你兩條友仔」

「今日我要講嘅係咁多,你地自己消化下,有時間就做下冥想訓練,可以幫你地慢慢提升靈力,你可以調節好自己嘅氣」

「係!!」

如是者,九叔對我們的教學正式開始

第一步:打坐冥想





九叔說,打坐冥想可以令我們身心放鬆,調節好身體中的「氣」,只要氣順了,身體質素都會跟著變好,而且冥想能夠提高個人修為

第二步:鍛練身體

九叔要求我們每天放工後都要抽時間出來運動,因為在靈幻世界裏體力是不可缺少的一環,無論是攻擊、捉捕甚至是逃跑都要用上體力

所以我在今天下班後就去了家附近的城門谷運動場跑步,打算先練練氣

我平時甚少運動,基本上,我沿著運動場跑兩、三個圈就已經喘氣連連,汗流浹背

我停下來,靠著旁邊的欄杆

「嗄….嗄….嗄….唔掂喎…嗄….三個圈就…喘到咁….」我自我抱怨





咕嚕咕嚕….

我一口氣灌下大半瓶水

「hey!老友」

一把聲音在旁邊傳來,我聞聲望去

?!

是上次遇見葉靈後在轉角撞到的那男人,那個第一次見但又感覺好熟悉的人

「呃…嗄…係?」

「冇啊,我啱啱係個邊見你跑步嘅動作有啲怪同壞習慣,想同你講下」那人說

「下?好啊」我一臉疑惑

「唔好介意啊,可能我職業病發作,我本身係教人打拳㗎」那人感覺十分熱情

「唔緊要啊…嗄嗄…嗄….當交流下姐」我說

「好啊,啱啱我見你跑步個陣有幾個壞習慣要改下」

「嗄..係咩呢?」到現在我還在喘氣
已有 0 人追稿