［打鬥/靈幻/鬼怪］《輪迴。道》/《噬魂》我由古惑仔變咗做現代道士: 393《第二季》

「依家係你個仔比人斬喎！你叫我唔好追究？」啊烈質問臣爺

「咁你依家人有冇事？同埋你又真係冇證據，大家同門師兄弟，有咩咪私底下拆掂佢囉，好多野唔洗擺上枱面嘅」臣爺在他的外套裏拿出跟啊烈同款的雪茄

「你傻撚咗啊老野？」啊烈激動站起，現場他已不是針對西狗的事，而是生氣自己的老爸都不幫自己，反而選擇所謂的以和為貴

「嘩，烈哥你點同坐館講野啊，好似過份咗喎」西狗在這時候也要插句嘴

「你收嗲！再嘈我就依家隊冧你條柒頭」啊烈指住西狗，但眼神卻一直看著臣爺





「你咩態度同我講野啊？！」臣爺也是愕然了一下

「我話你傻撚咗啊！你依家仲有好多個仔可以比人斬啊？！完全可以若無其事」啊烈直接指著臣爺，開口就罵

「依到係堂口，你唔好…」

「堂你老母啦！我退會！由今日開始我！張一烈唔再係皇圖嘅人！」啊烈一手掃過桌面，什麼煙灰缸、水杯全被掃下

「你估玩啊？！我當你冇講過！坐低！」臣爺還是用命令式的語氣跟啊烈說話





「水叔，我得閒約你飲茶，自己保重」啊烈無視臣爺，拍一拍坐在他旁的水叔後背

然後望向堂口中央的牌匾「皇圖」，黯然的步向門口

「張一烈你同我企係到！」臣爺想喝停啊烈

啊烈走到門前，停下了腳步

「返嚟坐低！」臣爺再喝一聲





「張逸臣，你要記住今日，因為今日你連最後一個仔都冇埋」說畢，啊烈便推門離去

「保重啦烈哥～」西狗此時還在落井下石

「……」其實臣哥心裏也是恨極西狗，但礙於他貴為坐館更不能偏私，否則會招來話柄，難以服眾，嚴重的更有可能地位不保

啊烈落到堂口的樓下，一眾手下就站在門口等候，旁邊當然也有其他叔父的手下

「烈哥，點啊」啊烈的心腹啊全上前問

啊烈沉默，拿出雪茄，啊全也精明的拿出雪茄剪和火機，為啊烈點煙

「唔洗問都啦～睇佢個樣都知啦！實係衰咗啦！」

說話的是西狗的手下





「你講野啊？！收嗲啦」啊全指著他想上前動手

啊烈提手擋住啊全，然後自己走到西狗的手下面前

「咩啊？想嚇鬼啊？」西狗的手下擺出囂張的嘴臉

但下一秒

「嗚！！！！！」西狗的手下發出慘烈的叫聲

原來啊烈將熾熱的雪茄塞進了西狗手下的，並用手捂著他的嘴巴，不讓他把雪茄吐出

在場的人看到啊烈的心狠手辣也不敢出聲





「手足！對我有信手嘅就跟我走，冇信心嘅就留低，我會叫水叔收你地，一切如舊」

啊烈重新點燃一支雪茄，瀟灑的穿過人群離去




堂口內，眾叔父還在為啊烈突然退會的事議論紛紛，最為開心的當然是西狗和冬叔，少了一個眼中釘

而臣爺則在苦惱思量，良久才說出

「啊狗、水，聽日開始你地暫時接手啊烈嘅地盤，一人一半，點分你地自己決定，今日就咁」說畢，臣爺便先行離開

「嘩～冬叔！分豬肉居然有我份喎！」西狗興奮的跟冬叔說





「咁你就要吞好啲啦，如果唔係擺咗落口都比人挑返出嚟啊」冬叔在說這句話時特別看著水叔

「老鬼冬，好心你就收嗲啦，為老不尊」水叔責備冬叔

「我點做野洗唔洗你教啊」冬叔反駁一句