［打鬥/靈幻/鬼怪］《輪迴。道》/《噬魂》我由古惑仔變咗做現代道士: 528《第二季》

啊仁的靈力控制經已比我們任何人都好，他已接近可以將武器控制自如

他手拿到劍後第一時間先格擋住啊烈的木斧，畢竟木斧的殺傷力還是比我的木刀大得多

然後他再低頭躲過我的木刀

「喂！兩位大佬！傾個電話都得罪你地？！」啊仁無辜的看著我們

「頂唔順！」





「太骨痹！」

我和啊烈一人一句的說

「咁最多我下次細聲啲囉！！唔洗偷襲我嘅！」啊仁表示

「冇下次！」

「殺咗佢！」





「喂！兩位大佬啊！！」啊仁果斷逃跑，他徑直的衝出門外，跑到出外面走廊

「追！」

待我和啊烈追出去後，啊仁突然停下了沒有再跑

原來是啊晴來電

「仲傾？！」我和啊烈舉起武器





「咪住！！」啊仁大聲的喝止我們

「晴你講多次！」啊仁皺起了眉，好像有事發生了，我們也放下了武器

「我….我啱啱….啱啱返到屋企發….發現爸爸唔見咗啊！」啊晴驚慌失措，已哭得口齒不清

「你爸爸唔見咗？！」啊仁重複啊晴的話，想確認自己沒有聽錯

「係…係啊…佢依排突然記性唔係咁好，成日都唔記得野，我依家….好擔心佢啊，我應該點做好啊啊仁…..」

「你….你依家落去屋企附近，去叔叔平時會去嘅地方搵下先，我帶埋我幾個兄弟即刻過嚟幫手搵」

「好啦….你快啲過嚟啊」

「得，冇問題！我好快就到！」啊仁急急的掛斷電話然後看向我們





「得啦，聽到啦」

「行啦！」

我和啊烈回到屋裏放下木製武器

「英叔！我地有事要出一出去啊！」我進屋時順便通知一下英叔他們

「哦好啊，咁你地睇下做完野買唔買埋飯過嚟食囉」英叔在房內回應我的

「好啊！」我說

「我今日有揸車」啊武亦從褲袋拿出了車鑰匙





「好兄弟！！！」啊仁像快要哭的看著我們

「行啦！仲咁多野！你未來外父等緊你啊！」我們拉著啊仁就出發

有啊武充當我們的「柴可夫」，我們好快便趕到了祈德尊新邨那邊

下車後，啊仁立刻會合了啊晴

啊晴一看到啊仁就馬上飛撲抱著他大哭

「點算啊！！我搵唔到爸爸啊！！佢依家有時連我都唔認得㗎….」啊晴邊哭邊說

「傻妹，咁點解你唔一早同我講啊」啊仁溫柔的抱著啊晴問

「我….我都唔知應該點做…」啊晴哭得像小孩子一樣，只懂不斷搖頭





「好好好，唔緊要，依家我地一齊去搵啦，好冇？」啊仁雙手搭著啊晴的肩膀，把她推到自己面前，為她擦去眼淚

「嗯….」啊晴乖巧的點頭

「好啦，咁依家我地應該點做先？」啊仁回頭望著我們

「我地可以先去依到附近有保安或者多人嘅地方搵搵，問下會唔會有人見到世伯，同埋啊嫂你send世伯張相比我地，我地可以分頭去搵」啊烈仔細分析我們應該如何行動

之後啊晴就將一張他父親的舊照片傳了給我們

「望落去張相好似好舊咁喎」啊武看著啊晴傳來的相片

「係啊…因為爸爸好耐之前開始唔中意影相，所以我冇佢嘅近期照….麻煩曬你地啦」啊晴向我們禮貌的點頭





「哎！你係啊仁女朋友，即係我地啊嫂，自己人唔洗咁客氣㗎」啊烈豪氣的說，非常符合他「義字當頭」的性格

「好啦，我地開始搵啦」啊武先行往外跑去，開始尋找啊晴的父親

「咁我同啊晴一齊搵，一個鐘頭後係返依到集合！電話聯絡」啊仁牽著啊晴也開始出發

但….一小時過後

我們完全找不到啊晴父親的影蹤….

「咁點算啊….爸爸會唔會出咗事㗎…我地係咪應該報警啊」啊晴焦慮不安

「嫂，報警都冇用，世伯失蹤嘅時間唔長，佢地唔會急住幫你搵，反而會浪費你時間係警署落案」啊烈跟啊晴說

「咁依家點算啊….」

「等陣！」我突然靈機一觸，想到了一件事情

「做咩啊？」眾人看著我

「頂！點解我地啱啱咁蠢！我地要搵人，點解唔搵葉靈幫手，佢用尋盤一定搵到嘅」

「喂！係喎！又唔早啲講！」啊仁也頓時恍然大悟一般

「又唔見你諗到？！」我反說

「都係你醒！」啊烈拍拍我

「葉靈？」啊晴一頭霧水的看著啊仁

「哦～葉靈係啊航嘅紅顏知己」啊仁極順口的說出

「喂！你再亂講野！你信唔信我打死你！」我向啊仁舉出了中指

「哎！哎！你冷靜啲！口快快講錯姐！乖！快啲幫手打比靈姐！」啊仁雙手前臂舉起，一副無辜的樣子

「咁啊仁又冇錯啊，靈姐淨係聽我地航哥講野嘅」啊烈也暗暗的笑說

「你班仆街…..」我口裏默默咒罵，手就在拿出電話準備致電葉靈

「喂，做咩啊？」葉靈對我突然致電給她感到有點奇怪

「想麻煩你幫一幫手搵個人」我簡單說出請求

「你當我工具精靈？接咗任務唔得閒」葉靈打算拒絕

「唔係啊！係啊仁女朋友個老豆走失咗，佢記性比較差，驚佢有危險！所以先咁急搵你幫手！」我趕緊在葉靈掛斷電話之前說完整件事

「……」葉靈聽到後沒作聲

沉默幾秒

「你地位置」葉靈問我

「荃灣廣場！」我馬上回答

「我就係你地附近，十分鐘到」葉靈說完後就掛斷了電話

口硬心軟她終究也是肯前來幫忙