［愛情純愛］由嗰一個Kiss開始，我地唔再係青梅竹馬: 04. 只是青梅竹馬

「嗰個女仔咪係上次同千辰表白嗰個女仔。」梁玥嘉喺心中講道，佢一眼就認得出邱凱棠，佢望向宋千辰講道：「上次都證明咗啦，唔洗理佢咁多。」

「我冇講啲咩。」宋千辰聳聳肩講道，然後又繼續講佢啱啱未講完嘅嘢，「琴晚瞓得唔好，天光先瞓得著。」

「嗯。」梁玥嘉只係嗯咗一聲就算，然後兩人又靜咗落嚟

番到學校之後，兩個人都各自番到去自己嘅位坐低，宋千辰坐低之後第一時間就係伏喺枱面上補眠，梁玥嘉同坐喺佢前面嘅女仔李穎容傾計

「你今日又會早過我番嘅？」梁玥嘉拉開櫈坐低，「又同男朋友一齊番學呢～」



「係呀～」李穎容點一點頭，轉個身面向坐梁玥嘉坐，「唔好講我住，講下你呀～」

「吓？」梁玥嘉喺書包入面拎出筆袋同功課File，聽到李穎容突然嘅話之後一臉疑惑，「講我啲咩？」

「聽我男朋友琴日同我講，上兩個星期發生咗大事喎～」李穎容細細聲咁講，好似已經開咗花生mode咁，一邊奸笑一邊講道，而且仲要望一望宋千辰

梁玥嘉聽到之後，第一時間就係諗起上兩個星期邱凱棠同宋千辰表白，宋千辰拎咗自己做擋戰牌，仲要Kiss咗嗰件事，本來梁玥嘉仲想問李穎容點解會知，不過佢記起李穎容嘅男朋友都係Joint School Activity入面嘅人，而且同宋千辰都識，所以李穎容知道都唔係啲咩出奇事

「Ashley同佢表白都唔係重點，重點係你地⋯」李穎容故意唔講埋落去，只係露出咗笑容，「吓～你地幾時開始㗎？做咩唔同我呢個好朋友講？」



「我地都冇開始，點同你講呀？」梁玥嘉努力地壓抑着自己嘅尷尬感，盡力地以平靜嘅聲線講道

「你唔好講大話喎！Ashley同佢班Friend，包括我男朋友講話宋千辰話你係佢女朋友，仲要話你地係青梅竹馬㗎啵～」李穎容一臉認真，好似要審犯一樣，瞇起眼睛，「你地蠱惑啦～一齊咗都唔講～」

「我地真係細個就識，你都知㗎⋯」梁玥嘉一臉無奈咁講，心中就抱怨起嚟：「宋千辰你睇你！搞到我比人審啦！」

「我知呀！不過你地一齊咗又點解釋呀？」李穎容指住梁玥嘉，一臉認真咁講

「我同你講㗎咋⋯你唔好同你男朋友講呀⋯」梁玥嘉一臉無奈咁辰開始解釋成件事嘅來龍去脈，「我地冇一齊，呢個只係宋千辰嘅一個大話用嚟拒絕邱凱棠⋯至於我地點解會咩咗，係因為邱凱棠要千辰證明我地真係couple，咁咩又係最有效最快證明到嘅辦法，所以先會咩咗，你唔好諗咁多⋯」



梁玥嘉連要講「Kiss」呢個字出口都覺得唔自在，所以唯有全部都用「咩」嚟代替

「衰呀你兩個～」李穎容又再瞇起眼講道

「你唔好同你男朋友講⋯陣間佢話比邱凱棠聽就出事⋯」梁玥嘉提醒道，一諗到到時又要幫宋千辰唔知點瞞住邱凱棠就覺得麻煩，「我唔想又幫佢瞞⋯」

梁玥嘉拎起水樽，扭開樽蓋，然後咕嚕咕嚕咁飲水

「咁咪即係話你嘅First kiss比咗宋千辰！？」李穎容忽然沒頭沒腦咁講道

「咳！咳咳咳⋯！」梁玥嘉瞬間就因為比水嗆到而咳起嚟，「咳！咳！咳咳咳⋯！」

「真係呀！？」李穎容一臉興奮咁講，但梁玥嘉則因為嗆到面令臉都紅晒

「咳！你關心咗我先好冇？咳咳！」梁玥嘉沒好氣咁講道，「你講都細聲啲，唔好比人聽到。」



「好啦好啦～你有冇事呀？」李穎容聽到天大嘅消息，忍唔住笑起嚟，「唔錯呀～」

「錯晒呀⋯」梁玥嘉扭番緊個樽蓋，反一下白眼

「我話宋千辰唔錯呀！咩錯晒啫？」李穎容都反一下白眼講道，佢比梁玥嘉更加興奮咁講道，但梁玥嘉一啲興奮唔起

「我知佢唔錯，but我地真係好單純咁係青梅竹馬⋯」梁玥嘉托住腮講道

「真係？一啲feel都冇？」李穎容每講一句就湊近梁玥嘉一啲，最後湊近到去鼻尖前，「真係咁單純？一啲歪念都冇？」

梁玥嘉靜咗落嚟，忽然間咩都講唔出口，本來想好似平日一樣，有人問「你地有冇feel？愛情feel」嘅時候肯定咁回答：「冇」

但今次，嗰啲肯定否定嘅字詞全部都卡晒喺喉嚨，一個字都冇辦法吞出嚟，就喺呢一刻，梁玥嘉猶疑咗



「冇⋯一啲都冇⋯」梁玥嘉移開視線，轉頭望向面對走廊嘅玻璃窗，望向外面，聲量都細咗

梁玥嘉對於自己嘅猶疑有啲愕然驚訝，一直以嚟佢都唔會咁樣窒咗一下，什至一個字都講唔出口，但今次佢居然冇同之前一樣回答同樣嘅答案

佢自己都唔知道自己點解會咁樣，佢亦冇諗多，覺得可能只係因為李穎容講起嗰件事，佢自己又覺得有啲尷尬，所以先會咁樣




IG Link: https://www.instagram.com/nd_cotttoncandy/?hl=zh-tw