［愛情純愛］由嗰一個Kiss開始，我地唔再係青梅竹馬: 06.不想被人知道的秘密

梁玥嘉都若無其事咁樣朝仍然一臉驚訝愕然嘅楊楠恩微微一笑，對楊楠恩而言，可能真係一件令人驚訝愕然嘅事，不過事實上呢個都係梁玥嘉同宋千辰嘅相處方式之一，認識嘅時間亦唔短，大家飲過大家口水尾都唔係咩新鮮事，只不過對外人嚟講又真係會有啲驚訝嘅

「你見多幾次就慣㗎啦～」李穎容見慣不怪咁講道，「佢兩個成日都係咁，都唔係第一次，佢地自己都唔介意。」

「都係嘅，識咗咁耐⋯」楊楠恩好似有啲驚魂未定咁笑咗一笑，然後若有所思咁望向梁玥嘉

上堂嘅鐘聲一響，大家都番位坐低，準備下一堂，lunch time之後嘅一堂係最飯氣攻心嘅一堂，就算凍又好唔凍都好，都係會覺得眼瞓

⋯



「叮噹叮噹⋯叮噹叮噹～」

放學嘅鐘聲響起，所有人都頓時清醒過嚟，喺企起身敬禮之後，大家都執嘢準備番屋企嘅時候，只有喺2樓嘅中六冇人走，因為接住落嚟嘅時間係補課時間

畢竟中六只有半年時間上堂，所以要喺study leave之前等佢地操多啲past paper，基本地裝備好自己後就去考DSE

喺補課開始之前係一個15分鐘嘅小息，幸虧E班最後一堂嘅老師準時落堂，佢地班可以用盡嗰15分鐘休息一下又或者再溫一溫書

梁玥嘉拎咗啲冇用嘅書出嚟，打算放佢地喺locker入面，唔拎番屋企，梁玥嘉將兩、三本書拎起然後起身行去locker，咁啱宋千辰又係去開locker，不過宋千辰比梁玥嘉更快放好啲嘢然後閂上locker門



「喂，梁玥嘉。」宋千辰開完locker之後，正打算番埋位坐，但佢忽然又叫咗梁玥嘉一聲

「咩呀？」梁玥嘉聽到宋千辰叫佢便望向宋千辰，手仍然捉住locker嘅木門

「Joshua琴晚突然間問起Ashley表白單嘢。」宋千辰細聲咁同梁玥嘉講道，宋千辰口中嘅Joshua就係李穎容喺Joint school activity識嘅男朋友

「我知，穎容有同我講，佢話邱凱棠同咗Joshua講。」梁玥嘉今日先聽完李穎容講，「今日一朝早番琴嚟，穎容已經捉住我問我咩事⋯」

楊楠恩行到去李穎容嘅座位前，但係見唔到梁玥嘉



「玥嘉呢？」楊楠恩問李穎容

「佢開locker。」李穎容直接回答道，然後指住梁玥嘉個位，「你坐住玥嘉個位先啦～」

「哦，好呀～」楊楠恩微微一笑，然後坐低喺梁玥嘉個位度，佢望向locker嗰邊，叫到梁玥嘉同宋千辰喺度講秘密咁，「佢兩個感情可以keep到咁多年真係好。」

「吓？」李穎容聽到楊楠恩嘅話之後吓咗一聲，「佢地要keep好關係都唔難呀～」

「好多細個一齊挽嘅朋友大個咗之後都會冇計傾，但佢兩個仲可以咁好感情，好難得。」楊楠恩望住喺locker旁邊竊竊私語嘅兩人

「都係嘅～但佢兩個真係由細個開始就一齊，都冇話咩嘅～」李穎容都望向locker嗰邊，望住梁玥嘉，「佢兩個由幼稚園開始就一齊，小學中學都同一間，而且我聽玥嘉講過話佢兩個係住隔離㗎咋。」

「住隔離？咁近？」楊楠恩有啲愕然，「佢兩個都好有緣喎！」

「放學先再講，唔想比人聽到⋯」梁玥嘉阻止宋千辰繼續咁講落去，佢心入面真係唔太想比學校嘅人知道佢兩個kiss過之類嘅事，「諗起都覺得煩⋯」



今日係數學補課，係統測，時限為一小時，老師一入到嚟就係派卷，然後check一check卷，最後就開考

「好啦，夠鐘停筆啦！」老師講道，「由後面傳卷上嚟啦！」

喺數學測驗完咗之後，大家都執嘢走，畢竟唔會有人想喺學校留到6點先走，梁玥嘉執完嘢之後，手上拎住除咗落嚟嘅長袖冷衫，孭起書包行執宋千辰個位度

「啱啱最尾嗰題我唔識做囉！」宋千辰正喺度同霍思傑、張子萊討論緊啱啱份test，「我直接空咗嗰題就算。」

「宋千辰，行得未呀？」梁玥嘉行到去宋千辰嘅座位隔離，企喺locker前面，但宋千辰似乎冇聽到梁玥嘉叫佢，繼續同佢啲friend講嘢，「宋千辰。」

梁玥嘉再叫咗佢一聲，但宋千辰仍然聽唔到，好專注咁同霍思傑、張子萊兩個興高采烈地討論着，梁玥嘉喺心中「唧」咗一聲

「宋千辰。」梁玥嘉又叫多咗一聲，宋千辰仍然冇聽到，梁玥嘉開始慢慢地感覺到唔耐煩






IG Link: https://www.instagram.com/nd_cotttoncandy/?hl=zh-tw