［愛情純愛］由嗰一個Kiss開始，我地唔再係青梅竹馬: 21. 直覺

「陣間講到佢兩個真係一齊咗就好笑啦～」

宋千辰諗起李穎容喺巴士上面講嘅嘢，佢悄悄地望向梁玥嘉，本來一啲簡單嘅舉動都因為戀愛嘅感覺而變得唔一樣，只係單純一個扶住對方嘅動作，心臟都要提醒着自己對對方已經唔再係單純地「好close、一齊長大嘅朋友」嘅感覺

一直以嚟都擔任住對方嘅「好兄弟」、「好姊妹」一樣，從來都唔會心動係因為從來都冇將對方當成異性，直到上次一吻驚醒夢中人，由嗰一刻開始，將對方當成異性看待

梁玥嘉抬起頭，眼中有一絲倦意閃過，兩人嘅目光有了交匯點，喺各自嘅眼中，都睇到同以往唔一樣嘅人和事

「由我中意佢嗰刻開始，早就冇青梅竹馬嘅存在⋯」梁玥嘉望住宋千辰，喺心中默想着，看似有着優勢，但同時有着劣勢，「彼此了解係優勢同時係劣勢⋯因為當其中一人嘅心意出現咗改變，我地就唔再係最了解對方嘅人⋯」



「對我嚟講，嘉嘉係一個點樣嘅存在⋯？」宋千辰喺對望嘅一刻，呢個問題喺腦海中閃過，呢個問題，宋千辰自己都不曾諗過到底自己將梁玥嘉放喺一個咩位置

梁玥嘉同宋千辰對望着，然後又撇開了臉，各自諗各自嘅事

喺梁玥嘉同宋千辰落咗車之後過咗四、五個站之後，楊楠恩同李穎容都落車

「你今日咁靜嘅？唔開心？」李穎容目到楊楠恩好似有啲唔開心咁便問道，「你平時都唔會唔講嘢㗎，同大家唔夾？」

「唔係呀⋯」楊楠恩搖搖頭，「只係覺得宋千辰好似唔太中意我咁⋯同大家又好似冇咩嘢講⋯」



「可能你同佢地未熟啫～」李穎容安慰道，「佢地應該唔係唔中意你嘅，唔洗咁擔心喎～」

李穎容喺心中其實對楊楠恩有啲懷疑，心裏總覺得楊楠恩係借梁玥嘉過橋，借梁玥嘉接近宋千辰，李穎容嘅直覺話比佢知，楊楠恩就係中意宋千辰

就好似啱啱睇戲咁，連李穎容都聽到喺入場之前梁玥嘉話同宋千辰share嘢飲，因為佢怕自己睇戲嘅時候太驚，驚到飲唔到嘢，宋千辰都Okay咗話冇問題，仲話梁玥嘉麻鬼煩，叫佢唔好嚇到要去廁所，唔好用力捏自己隻手

但喺入場時楊楠恩一下子就行咗去梁玥嘉前面，坐咗喺宋千辰隔離，宋千辰叫佢同梁玥嘉調番位嘅時候佢嘅表情都已經出賣咗佢啦

另一邊廂，梁玥嘉同宋千辰行到番去屋企樓下，先搭升降機去到4樓平台，然後拍卡入大堂搭升降機上去



「番到去早啲瞓啦。」宋千辰企喺屋企門前邊用鎖匙開門邊對喺隔離門口開緊門嘅梁玥嘉講道

「嗯⋯」梁玥嘉開咗門，踏進家門口冇即刻閂門，反而係探頭出嚟朝宋千辰微笑講道，「拜～」

梁玥嘉閂上門，宋千辰喺梁玥嘉一閂咗門之後，笑容忍都忍唔住，宋千辰耷低頭，佢腦海中滿是啱啱梁玥嘉同佢講拜拜時嘅笑容

「佢啱啱好可愛⋯」宋千辰喺心中講道，心跳嘅速度都止唔住，「以前點解會冇發現佢嘅可愛？」

宋千辰冷靜落嚟之後就開門入屋，媽媽正好切完生果，捧住碟喺廚房行出嚟

「你番嚟就啱啦，洗個手出嚟食生果啦！」宋媽媽講道，「你啱啱企喺門口唔入嚟做咩？」

「冇嘢。」恢復過來嚟嘅宋千辰平靜咁回答，然後換番拖鞋行入屋，直接行番入房換衫

另一邊廂，梁玥嘉一番到屋企就係換過件衫然後好快咁淋一淋身，因為出去之前佢已經沖咗一次涼



淋完身之後就係番房，灘喺床度，立起IPad煲劇，同宋千辰喺巴士上講嘅一樣，梁玥嘉真係去咗煲劇

宋千辰換好衫之後行出房，坐喺梳化上面，用牙籤拮生果食，另一隻手用嚟拎手機，一打開IG就見到梁玥嘉po咗story

喺Story入面寫住「煲劇Time」，宋千辰睇到嘅時候無奈咁笑咗一笑

「我都估到你啦⋯」宋千辰喺心中無奈地講道，「點會乖乖地去瞓覺。」

梁玥嘉趴喺床上面望住IPad，今晚煲劇唔煲到3點梁玥嘉應該都唔會瞓

「呀係喎！」梁玥嘉從床上彈起嚟，然後街到書枱前打開放喺櫈上嘅書包，喺功課file入面抽咗一張淺啡色、草紙般嘅再造紙出嚟，「差啲唔記得咗影份News cut比佢⋯」

梁玥嘉一邊喃喃自語，一邊拎住手機影news cut功課比李子迪



「差啲就唔記得咗要send比你！」梁玥嘉再send多咗個type message比李子迪

李子迪好快就上線，睇嚟佢已經等咗份功課好耐，等咗成晚已經

李子迪：我仲喺度諗提唔提你好，你仲未send比我，正打算拎起手機嗰陣你就send咗過嚟

「咁啱醒起，如果唔係你星期一等住欠交啦！」梁玥嘉見到李子迪嘅回覆，笑了笑

李子迪：唔得喎，一定要抄咗先！唔可以欠！

「我send咗比你就快啲做啦，唔好抄得咁足。」梁玥嘉回覆道，然後就鎖上屏幕， 收番啲嘢，趴番落床繼續煲劇






IG Link: https://www.instagram.com/nd_cotttoncandy/?hl=zh-tw