［愛情純愛］由嗰一個Kiss開始，我地唔再係青梅竹馬: 24. 不被察覺的心意

「重死我啦！」楊楠恩將疊簿放低喺老師枱上面

「你今日冇出去食飯呀？」梁玥嘉對行向佢地嘅楊楠恩問道

「嗯，最後都係冇出去食飯。」楊楠恩行到去梁玥嘉對面嘅座位坐低，三個人坐嘅位置成一個L字型，「疊簿重死啦！」

楊楠恩揼一揼自己嘅左右手上臂對兩人抱怨道，梁玥嘉同李穎容都笑咗一笑，三個女仔坐喺度傾計，距離放飯時間完結仲有十分鐘左右

另一邊廂，啱啱食完飯嘅宋千辰、張子萊同埋霍思傑喺番學校嘅路上，宋千辰一邊行一邊睇手機，睇睇下Facebook嘅時候忽然見到吸引佢注意嘅嘢



「套戲上咗啦喎～」宋千辰見到一個好耐之前like咗嘅page出咗一個po，係一張電影海報，宋千辰好快手咁cap咗一張圖，開咗WhatsApp打算send過去比梁玥嘉問佢睇唔睇，因為之前梁玥嘉喺套戲未上映嘅時候有提過佢想睇，但宋千辰喺將張cap圖send出去前一刻猶疑咗，「佢會唔會已經約咗李穎容同楊楠恩睇⋯？算啦，都係唔問佢睇唔睇啦⋯」

宋千辰默默地鎖機然後幾手機塞番入褲袋入面

「Oh my God！好靚仔！好靚仔呀！」梁玥嘉同楊楠恩仲有李穎容三人湊得好近，梁玥嘉同楊楠恩都望住李穎容嘅手機螢幕，三個女仔興奮咁笑着

「你成日咁睇靚仔，唔驚Joshua嬲呀？」梁玥嘉笑到塊面都紅晒，為咗平靜番落嚟便轉移話題問李穎容，梁玥嘉陣望向楊楠恩解釋道，「Joshua係穎容男朋友。」

「Joshua唔會。」李穎容笑咗一笑講道，「佢話佢唔嬲呢啲虛幻嘅嘢⋯哎呀繼續睇繼續睇！」



「你有冇咁多靚仔相呀？你IG到底follow咗幾多？」楊楠恩嘅臉頰都紅晒，佢聽到李穎容話繼續睇嘅時候一臉震驚嘅模樣

「睇下呢個！靚唔靚仔？」李穎容又開咗一張新嘅相出嚟，又搵到另一個人嘅IG，梁玥嘉同楊楠恩又湊過去睇，「睇下你兩個呀～口裏說不，身體卻很誠實～明明就好想睇！」

「你引我地睇㗎！」梁玥嘉笑住講道，然後伸手放大咗張相，「你地睇下佢有腹肌！好sexy呀omg！」

「太靚仔啦！」楊楠恩雙手捉住李穎容嘅手臂好興奮咁睇

喺佢地三個仲好專注咁睇緊靚仔嘅時候，宋千辰踏入課室，霍思傑同張子萊行番去自己位，宋千辰則走向梁玥嘉嘅座位，拎咗放喺梁玥嘉枱角嘅樽裝水



「我冇散銀，得張$10紙。」宋千辰喺褲袋拎銀包嘅時候將支水放低咗喺枱面，但梁玥嘉好專注，都冇留意到宋千辰企咗喺度，即使喺李穎容同楊楠恩都冇留意，「梁玥嘉，我叫你呀。」

「嘩！」梁玥嘉偶然抬起頭，見到宋千辰企咗喺佢面前即刻嚇到成個人震咗一下，雙肩都向上縮咗一下，「你幾時企喺度㗎？」

「你估下。」宋千辰拎咗張$10紙出嚟比梁玥嘉，梁玥嘉拎咗張$10紙之後拎咗$5.5找番比宋千辰

宋千辰拎埋支水番埋位，喺宋千辰行遠咗之後，梁玥嘉又繼續同佢地把握最後幾分鐘嚟睇靚仔

「比佢嚇死，突然企喺度⋯」梁玥嘉一邊等李穎容搵相一邊對兩人講道，「睇得太入神都冇留意到佢。」

⋯

宋千辰拎開樽蓋飲咗一啖水，因為已經覺得開始有啲「神智不清」嘅感覺，要飲啖水清醒一下

「如果我同嘉嘉講我中意佢，佢會點⋯？」宋千辰喺心中獨自思考着，佢嘅專注力早就分散晒，根本就唔喺沉悶嘅課堂上，「其實我可以好似平時咁對嘉嘉，但佢會唔會發現我中意佢？」



老師講書嘅聲音早就無辦法傳入宋千辰嘅腦袋中，因為老師講嘅內容傳入咗宋千辰嘅左耳之後就直接喺右耳出番去，根本就冇經過大腦然後就直接原封不動咁出番嚟

「如果嘉嘉知道咗我中意佢，佢會唔會疏遠我⋯？到時我同佢就唔可能再咁close⋯」宋千辰喺腦海中幻想着梁玥嘉知道咗佢中意自己之後嘅反應

一諗到呢度，宋千辰不禁有啲緊張，佢唔想連同梁玥嘉做番青梅竹馬嘅機會都冇

「不過算啦，嘉嘉咁遲鈍又點會察覺到呀～」宋千辰鬆一口氣似的，心裏感到自豪，「好彩我都幾了解嘉嘉啫～不枉我識咗佢咁多年。」

喺放學之後，兩人一如既往一齊番屋企，宋千辰心裏諗起上映咗嘅電影，心中想同梁玥嘉兩個人睇，今次唔要同其他人一齊睇

「要唔要借啲意問下佢一唔一齊睇呢？」宋千辰心諗，「但我又唔可以問得咁明顯，搞到佢察覺到㗎⋯」

經過咗一番苦惱之後，宋千辰決定好要點做啦



「你想睇嗰套戲上咗。」宋千辰假裝不經意咁講道，然後拎出手機，開番佢一早準備好嘅Facebook po文遞比梁玥嘉睇，當係自己啱啱先睇到，宋千辰一直悄悄地望向梁玥嘉，留意住佢嘅表情變化同反應




IG Link: https://www.instagram.com/nd_cotttoncandy/?hl=zh-tw