［愛情純愛］由嗰一個Kiss開始，我地唔再係青梅竹馬: 36. 吻

梁玥嘉頓時怔了怔，回神過嚟之後咩都冇講就耷低頭繼續食蛋糕；宋千辰喺幫梁玥嘉抹完嘴之後先察覺到自己做咗啲不得了嘅事，於是默默咁收手同時將紙巾揸成一團，放喺手邊，紅了耳根繼續食蛋糕

宋千辰覺得另一隻手無處安放，手上又冇拎啲咩，就係咁就覺得唔自在，都唔知手可以放喺邊或者做啲咩好

「食到就食多件啦！」宋千辰講道，然後就企起身行咗去廁所

梁玥嘉感覺到手機震咗一震，佢一拎出嚟睇發現喺梁媽媽搵佢

媽：今晚唔煮啦！我要OT，你自己顧自己啦～



「哦⋯」梁玥嘉回覆道，宋千辰洗完手行出嚟，梁玥嘉隨即就問道：「你屋企今晚煮唔煮飯呀？我媽話要OT。」

「煮呀，我媽都差唔多放工番嚟啦。」宋千辰坐喺梁玥嘉對面睇手機，「我同我媽講聲。」

「嗯⋯」梁玥嘉嗯咗一聲，然後食埋手上拎住嘅蛋糕，食完之後默默地收番個盒，將盒放番入雪櫃

梁玥嘉喺廚房行出嚟嘅時候，宋千辰企起身行咗入房，宋千辰嘅睡房喺走廊左邊第一間；梁玥嘉見宋千辰嘅房門虛掩着，所以喺廚房出嚟之後，梁玥嘉就拎埋手機行咗入宋千辰間房

「好眼瞓呀⋯」梁玥嘉好自然咁就坐咗喺宋千辰張床嘅床尾上面，然後一下子就向旁邊嘅位置灘低，宋千辰見到梁玥嘉直接就除咗拖鞋灘喺床，佢都唔知可以講啲咩好



「你做晒功課啦？」宋千辰將張櫈轉向床嗰邊，梁玥嘉頭靠喺攬枕上面

「做晒啦⋯」梁玥嘉嘅雙眼已經有啲攰，已經係處於半合上嘅狀態，「今日都冇派功課，聽日交嗰啲派嗰日已經做完⋯」

宋千辰盤着腿坐喺櫈上，佢放低手機望住睡意已經蠢蠢欲動嘅梁玥嘉，嘴角微微揚起

「攰就瞓一陣。」宋千辰講道，梁玥嘉連眼都懶得睜開，合起雙眼擺出一副慵懶嘅姿態點頭

梁玥嘉唔係瞓喺枕頭上面，而係打橫瞓喺床上，攬住攬枕同時將頭埋望攬枕之中



「你直接瞓上去啦⋯」宋千辰望住梁玥嘉瞓到好似隨時要滑落地下咁，無奈講道同時放低手機喺枱上然後起身將梁玥嘉嘅雙腿抬到床上

「唔⋯」梁玥嘉攬住攬枕一個翻身，雙腳踢開張被，連手都懶得用

宋千辰無奈咁笑咗一笑，然後掀開被，等梁玥嘉瞓好之後再幫佢蓋好被；宋千辰坐番喺電腦椅上面，「行」到去房門口閂咗房嘅大燈，番到書枱前開咗枱燈

「個攬枕有千辰陣味⋯」將頭埋喺攬枕裏嘅梁玥嘉喺心中默默講道，但因為真係太攰，所以梁玥嘉都唔想再睜開眼

宋千辰打開放喺枱上面嘅MacBook Pro，向床嘅方向望咗一眼，見到梁玥嘉一動不動瞓得好舒服時，內心有一種想要喺佢臉頰上錫一啖又或者想直接床咚佢嘅衝動

「唔好亂諗嘢，唔好亂諗嘢！」宋千辰喺腦海中對自己講道，然後將視線嘅重心放番喺電腦螢幕上

梁玥嘉攬住攬枕瞓，床單被鋪都有宋千辰嘅專屬香味，人地話中意一個人先會聞到對方身上獨有嘅氣味，梁玥嘉收緊嘅雙臂，緊緊地攬住攬枕

都唔知最後係點樣瞓著咗，可能因為張床太舒服，再加上喺被竇入面好暖嘅關係，所以不知不覺就瞓著咗



宋千辰一直都係安靜咁睇電腦，睇YouTube片，而且為咗唔好嘈住梁玥嘉而戴上咗耳機；宋千辰感覺自己已經睇咗好耐電腦，佢望一望放喺床頭嘅電子鐘，原來都已經差唔多6點3, 宋千辰覺得雙眼有啲攰，於是輕合起雙眼，手指輕捏鼻樑同內眼角，將耳機除咗落嚟，頭靠喺椅背上嘅頭枕，整個人都靠着椅背坐

「嘉嘉⋯」宋千辰望向熟睡中嘅梁玥嘉輕輕呼喚一聲，宋千辰將電腦椅盡量唔發出聲音地拍到床邊，佢見梁玥嘉冇反應之後先敢再開口講嘢，「我地唔好再做青梅竹馬啦好冇⋯？比起做你嘅青梅竹馬，我好似⋯更加想做你嘅男朋友⋯」

宋千辰嘅手肘放喺電腦椅嘅扶手上托住下巴望住梁玥嘉嘅睡顏，宋千辰對熟睡中嘅梁玥嘉講出咗佢最唔想比梁玥嘉知道嘅心底話

「如果我只係你嘅青梅竹馬嘅話，遲早就會有人取代我，成為最親近你嘅人⋯」宋千辰都唔敢望住梁玥嘉講出呢啲說話，「我可唔可以一直都霸埋成為同你最親近嘅人嘅呢個位⋯」

宋千辰忽然自己笑了笑，佢諗到如果佢同梁玥嘉當面講呢啲嘢嘅話，梁玥嘉應該會係先係一臉愕然，然後一臉嫌棄咁同佢講：「唔似你會講嘅嘢喎～好肉麻呀你⋯！」

梁玥嘉郁咗一郁，即刻就吸引咗宋千辰嘅注意，因為宋千辰擔心會唔會係佢瞓醒又或者已經聽到佢啱啱講嘅嘢；梁玥嘉將手伸咗出嚟，但手仍然攬住攬枕

「嘉嘉⋯？」宋千辰叫咗梁玥嘉一聲，再次確保梁玥嘉未醒過嚟



宋千辰望住梁玥嘉嘅睡顏，內心嗰種想偷錫佢嘅衝動又出現；宋千辰將呼吸聲放輕，悄悄地湊近熟睡中嘅梁玥嘉，然後輕輕地喺佢嘅臉頰上落下一個溫柔又神秘嘅吻




IG Link: https://www.instagram.com/nd_cotttocandy/?hl=zh-tw