［愛情純愛］由嗰一個Kiss開始，我地唔再係青梅竹馬: 40. 助攻？

「呵～欠⋯」梁玥嘉打咗一個大大嘅呵欠，雖然琴晚好早就瞓咗，但梁玥嘉仍然覺得好攰想繼續瞓

「呵～欠⋯」宋千辰啱啱望住梁玥嘉打呵欠，便比佢傳染咗，自己都跟住打咗一個呵欠

宋千辰今日意外地冇拎住手機睇，梁玥嘉卻拎住手機睇過不停，視線一刻都冇離開過手機螢幕

「嘉嘉平時行嗰陣都會一直睇手機㗎咩⋯？」宋千辰喺心裏打咗個問號，佢諗緊到底係佢平時太少留意梁玥嘉定梁玥嘉今日嘅行為同平時唔同，「佢好似好少會咁樣一邊行一邊睇手機，唔通發生咗啲咩事⋯？」

梁玥嘉嘅雙眼一直望住手機嘅螢幕，其實唔係因為發生咗啲咩事，只係覺得手上冇拎住任何嘢有啲唔自在，因為平日番學嘅時候手上都會拎任一盒牛奶，一邊行一邊飲，但咁啱琴日佢飲嗰包就係最後一包，今日就冇得飲，所以唯有拎住手機



「呵～欠⋯」梁玥嘉喺鎖咗手機螢幕之後一秒就即刻又打咗一個呵欠，雙眼不停滲眼水，梁玥嘉用手揉揉眼

「你好夜瞓咩？」宋千辰望住睡意滿滿嘅梁玥嘉問道

「唔係呀，番到去一陣之後就瞓咗啦⋯」梁玥嘉搖搖頭，感覺連行路都唔想行，學都唔太想番，想直接番屋企再好好咁瞓一覺

「你都瞓咗好多個鐘喎⋯」宋千辰嘅語氣中夾雜住一點無奈，「咁應該好精神先係呀。」

「我都唔知點解⋯我仲係覺得好眼瞓⋯」梁玥嘉講道



兩人同平日行同一條路番學，每一日街道上嘅風景都一樣，宋千辰望住梁玥嘉，嘴角不禁上揚，有種「只要係兩個人一齊，再普通嘅事與物都會變得好特別」嘅感覺

街到去前面街口嘅時候，楊楠恩喺內街轉出嚟，同時佢見到梁玥嘉同宋千辰一齊街緊過嚟

「嘉嘉！」楊楠恩帶着小跳步行到去梁玥嘉面前，面帶笑容，「早晨～」

「早晨呀楠恩⋯」梁玥嘉仍然係處於一個未瞓醒嘅狀態，「好少可番學會撞到你～」

「應該係因為今日我早咗出門口，所以咪會撞到囉～」楊楠恩微笑着講，同時佢留意到梁玥嘉一臉疲倦嘅樣子，「你好攰咁嘅？路夠瞓呀？」



「我都唔知呀！我明明琴晚好早就瞓咗，但今是仲係好攰⋯」梁玥嘉雙手捧着臉頰，「一定係因為天氣太凍，被竇太暖，所以先會咁！」

「哈哈⋯兩樣嘢都冇關係嘅～」楊楠恩聽到梁玥嘉講嘅原因之後不禁笑起嚟，「陣間番到學校買罐咖啡飲啦～」

「我唔飲咖啡㗎～」梁玥嘉微笑着搖搖頭，宋千辰喺一旁拎出手機開始專心地睇手機

「陣間上堂瞓著咗就好笑啦。」宋千辰一臉冷靜地講道，「今日一嚟就係LS，你死硬啦梁玥嘉。」

「你好煩呀⋯」梁玥嘉瞪咗宋千辰一眼講道

楊楠恩行喺梁玥嘉隔離，梁玥嘉行喺佢同宋千辰中間，喺呢個位置上，楊楠恩覺得自己就好似電燈膽一樣，喺宋千辰同梁玥嘉之間好似完全冇佢介入嘅餘地一樣

妒忌、羨慕⋯兩種心情同時喺楊楠恩喺內心，但兩者之間佔更多嘅係妒忌⋯原因好簡單，因為楊楠恩中意宋千辰⋯

⋯



Lunch time嘅時候，佢地6個人又一齊食飯，又係食番上次嗰間粉麵店；大家同樣地一坐低就係睇手機

「喂喂喂，有冇你中意㗎？」李穎容將手機遞到梁玥嘉嘅面前，梁玥嘉抬起頭，將視線從自己嘅手機螢幕上移開，落喺李穎容嘅手機螢幕上

「咩嚟㗎？」坐喺梁玥嘉隔離嘅楊楠恩好奇地探頭望向李穎容嘅手機螢幕，「邊一類男仔係你中意嘅類型？你好似有男朋友㗎啦喎～仲睇呢啲？」

「我有男朋友啫～你地冇呀嘛～」李穎容笑住咁講道，梁玥嘉同楊楠恩都冇得反駁，「你地中意咩類型嘅男仔呀？」

李穎容完全當三個男仔冇到，照樣就開口講，梁玥嘉望住李穎容，用眼神向李穎容表示：「你明知我中意宋千辰你仲要問？佢成個人就坐咗喺我隔離你仲要講呢啲！你係咪想挽死我呀！」

「楠恩你中意咩類型嘅男仔呀？」李穎容得意地笑了笑，然後望向坐喺佢同梁玥嘉中間嘅楊楠恩，「你係中意成熟穩重定係青春陽光型？」

「唔⋯」楊楠恩假裝苦惱地諗，但下意識卻偷瞄咗宋千辰一眼，佢見到宋千辰向佢呢邊望，頓時就收回視線，「我都唔肯定，但應該介乎喺呢兩種中間啦～玥嘉呢？玥嘉中意咩類型呀？」



宋千辰聽到楊楠恩一問，瞬間不自覺地深呼吸，然後擺出一副唔在意嘅模樣，成個人開始因為緊張所以渾身唔自在

「唔⋯我中意—」「宋千辰呢類型囉～」




IG Link: https://www.instagram.com/nd_cotttocandy/?hl=zh-tw