「買呢個比佢,定⋯」梁玥嘉拎起上次宋千辰拎過嚟睇嘅Iron Man Q版Figure,然後望向放公仔嘅位置,「淨係買一個公仔比佢?定係兩樣都買晒比佢?」

李穎容望住散發住苦惱氣息嘅梁玥嘉嘅背影偷偷地笑咗一笑,然後便攝手攝腳地行到梁玥嘉嘅身旁

「點呀~好苦惱呀?」李穎容柔聲地問道,微微側着頭望梁玥嘉

「你唔洗買嘢比Joshua咩?」梁玥嘉想偷偷地轉移話題,手上仍然找住嗰盒Q版Figure

梁玥嘉望向李穎容,卻見到李穎容忽然面有難色,只係苦笑咗一下



「你同Joshua嗌交啦?」作為識咗李穎容四年嘅梁玥嘉一眼就睇穿李穎容

「都係啲小事啫⋯」李穎容苦笑道,然後低頭不語,「慣㗎啦⋯」

「有咩同我講知唔知呀?唔好一個人死撐。」梁玥嘉對李穎容微笑道

「嗯⋯」李穎容點點頭,縱使臉上掛着嘅笑容仍然係強擠出嚟嘅笑容,但聽到梁玥嘉嘅說話,心中頓時覺得暖暖的

有一種窩心,係有人察覺到你嘅難過,然後同你講一句:「唔好死撐,我會喺度陪你。」



「我買一樣好定兩樣都買晒比佢好?」梁玥嘉一手拎住盒Figure,一手拉住李穎容再一次行到去放公仔嘅層架前,「你覺得我買邊樣呀?佢會中意邊樣呢?」

「你買咩佢都中意㗎啦~」李穎容只係無心咁講咗一句

梁玥嘉瞬間記起上次問宋千辰想收咩禮物嘅時候,宋千辰答佢自己對禮物冇咩要求

「咁我買呢個啦⋯!」梁玥嘉拎住Figure,直接就拉住李穎容去比錢

由於下星期已經係聖誕節,所以梁玥嘉直接拎住單據同Figure出去外面比員工包起,著住深藍色圍裙嘅員工熟練地用Log-on專屬嘅包裝紙將禮物包好,放入膠袋,遞比梁玥嘉



「佢應該會中意~」梁玥嘉喺從員工手上接過膠袋同時喺心中講道,臉上掛住甜甜嘅笑容

「你笑得好甜喎~」李穎容望咗梁玥嘉手上拎住嘅膠袋一眼,「佢會中意嘅~唔洗擔心喎~」

「我冇擔心囉,佢話佢對禮物冇要求㗎。」梁玥嘉提起宋千辰時嘅笑容都格外甜美,「番埋今個星期就放聖誕假啦~我地又要一月先見到啦⋯」

「下星期會見㗎嘛,24號約咗去唱K嘛~」李穎容一臉興奮咁講道

「係喎,仲未同佢地約時間。」梁玥嘉忽然記起佢地仲未約時間,「不如直接開個group啦,方便啲。」

「好呀~我宜家開個group問下佢地。」李穎容比咗一個Okay手勢之後便喺裙袋中拎出手機

李穎容:HeyHey~我地24號係咪去唱K呀?

「問咗啦~」李穎容望向梁玥嘉講嘅時候,手機瞬間就震咗一震,即刻就有人覆



張子萊:唔係話咗唱通宵K咩?佢有咩貓頭鷹時段,好似係由2300去到0530㗎嘛

梁玥嘉:有冇人唔得?

張子萊:係你地女仔先會唔得㗎咋嘛⋯我地三個男人點會唔得啫?

「張子萊想點呀⋯」李穎容見到張子萊嘅回覆時無奈地反咗一下白眼

霍思傑:上次唔係話咗大家都得咩?

張子萊:哦,咁得囉

張子萊:星期二係24號嘛



霍思傑:下星期一再約時間等咪得

李穎容:邊度唱?銅鑼灣好冇?

李穎容一問完,大家都好快咁send晒Okay嘅emoji出嚟,果然都係需要有個人做決定嗰個

「Well⋯」李穎容無奈咁望向梁玥嘉,同梁玥嘉對望時,李穎容嘅嘴角又滲出笑意,「你開心啦,今個聖誕同可以同人地過~」

「咩呀⋯」梁玥嘉強忍着笑意,然後又自然地將話題嘅軸心扔到李穎容身上,「你真係同我地出嚟挽呀?Joshua冇約你咩?佢應該會約你先係㗎,第三年嘅Christmas喎。」

「你地約咗我先嘛,而且仲有25號嘛。」李穎容笑了笑講道,但佢嘅笑容一瞬即逝,「得㗎啦~同Friend出去都好呀~」

梁玥嘉望住李穎容,心中覺得李穎容一定係有啲咩心事,但同時知道李穎容唔講係因為唔想自己擔心所以先冇同自己講,既然李穎容冇開口講啲咩,咁梁玥嘉都唔追問,只要李穎容知道自己一定會陪住佢就得

「行啦~番去啦~」梁玥嘉伸挽挽住李穎容嘅手臂



李穎容望向梁玥嘉笑了笑,好朋友就係會心有靈犀,即使自己唔開口講,對方都會明白自己




IG Link: https://www.instagram.com/nd_cotttocandy/?hl=zh-tw