［愛情純愛］由嗰一個Kiss開始，我地唔再係青梅竹馬: 55. 雙面人

「點、點解你望住玥嘉嘅⋯？」楊楠恩頓時將嘴角上扯，用力擠出微笑，假裝好奇地問道

「冇咩。」宋千辰對梁玥嘉微微揚起嘴角，梁玥嘉心虛地移開視線，宋千辰望向楊楠恩聳聳肩

三人踏入校門，梁玥嘉同楊楠恩都自然地向左邊嘅樓梯行去，梁玥嘉一向左邊行，宋千辰一下子擋住喺梁玥嘉面前，對梁玥嘉微微一笑，雙眼望向小食部嘅方向

「知啦！」梁玥嘉嘟起嘴細聲地講道，然後探頭望向楊楠恩，「楠恩！我同佢去小食部買嘢食，你上去先啦⋯」

楊楠恩剛才一聽到梁玥嘉叫佢時頓時回頭，回頭時卻只見到宋千辰同梁玥嘉企埋一齊；喺楊楠恩嘅眼中，只係見到兩人嘅一舉一動都好親暱，或者呢個係一齊長大嘅與別不同之處，見兩人總係有着滿滿嘅默契、講唔完嘅話題時，楊楠恩內心嘅嫉火就燃燒起嚟



「嗯，好呀⋯」楊楠恩微微笑講道，「咁我番課室先啦～」

梁玥嘉朝佢微微一笑，然後就比宋千辰捉住手腕拉住行向小食部嘅方向；兩人一走，楊楠恩臉上掛着嘅笑容瞬間消失，咬牙切齒嘅模樣同剛才溫柔嘅模樣形成極強對比

兩人企喺飲品機前，宋千辰指一指喺最頂層嘅罐裝咖啡，梁玥嘉一臉不情願地拎出硬幣入落硬幣窿；宋千辰嘅視線落喺梁玥嘉身上，手㩒制，梁玥嘉無可奈何地笑了笑

今日剛好柔和起嚟嘅陽光打喺兩人身上，遠睇起嚟就好似一幅畫一樣美，就好似一齣校園青春戀愛劇嘅宣傳海報一樣，光線剛好，有背景嘅附和，主角嘅自然交流⋯一切都好似一早設置好一樣

「滿意未呀！」梁玥嘉微微鼓起兩泡腮問道，雖然心裏有一千萬個唔願意，但宋千辰的而且確係因為自己而搞到冇瞓夠，再唔想都要為自己種下嘅因而承受番個果



「滿意。」宋千辰笑着將咖啡罐打開，飲咗一啖咖啡之後側着頭望住梁玥嘉，臉上掛着笑容

梁玥嘉輕輕哼咗一聲便撇下宋千辰一人邁步走，宋千辰追上梁玥嘉嘅步伐，行喺梁玥嘉嘅身旁

「喂！早晨！」有人喺兩人踏上梯級時，拍咗梁玥嘉一下

「早晨。」梁玥嘉望向左邊，見到剛踏入校門一陣嘅李子迪，「今日咁晏番，做晒功課啦？」

「我呢啲好學生嚟㗎嘛！梗係做晒啦！」李子迪一臉自豪地講道



李子迪同梁玥嘉正笑着閒聊兩句，宋千辰收起了剛才同梁玥嘉兩人並肩而行時掛喺臉上嘅笑容，默默地板起了臉，但又假裝唔在意起飲咗一啖咖啡

兩人聊得開心，李子迪亦冇特別地將宋千辰當作一回事，作佢早就知道梁玥嘉同宋千辰嘅關係，所以都冇特別忌諱

「你個聖誕去邊度挽呀？」李子迪隨口問道，「又一個人喺屋企頹兩個星期呀？」

「冇呀～」一提起聖誕活動，梁玥嘉就覺得興奮，臉誕嘅笑容都燦爛好多，「今個聖誕同千辰、穎容佢地出去挽～」

李子迪聽到之後下意識望一望宋千辰，宋千辰亦望向李子迪，兩人視線對上，宋千辰嘅嘴角微微一揚，一臉得意地飲咗一啖咖啡，彷彿話比李子迪聽「今個聖誕嘉嘉就係同我去挽～」一樣

「哦～」李子迪笑道，「仲以為你又要喺屋企頹廢添～」

「出去一日囉暫時，淨低應該都係頹廢喺屋企。」梁玥嘉天真地笑了笑道

「白痴呀？」宋千辰聽到梁玥嘉講嘅嘢時喺心中大聲地講道，「做咩要話比人知淨係出去一日？好想人地約你咁⋯」



「你可以喺屋企做好啲功課，我等住借你啲功課嚟抄～」李子迪開玩笑般輕輕拍咗梁玥嘉嘅額頭一下

「喂呀！」梁玥嘉嘅手摸一摸額頭，輕皺着眉頭，「你又用你個手掌同我個額頭give-me-five！」

此時宋千辰喺李子迪同梁玥嘉都冇留意到嘅情況下狠狠瞪了李子迪一眼，深呼吸以壓抑自己內心嘅嫉火同怒火

「你唔好再拍佢額頭⋯」宋千辰以平常嘅聲線講道，瞄咗梁玥嘉同李子迪一眼，「陣間拍到佢仲蠢咗。」

「你就蠢！」梁玥嘉瞪大眼望住宋千辰，此時宋千辰伸手喺梁玥嘉嘅後腦勺拍咗一下，「咩事呀？」

「幫你拍番個腦入去，怕你掉咗個腦。」宋千辰望向梁玥嘉，淡淡嘅笑容掛喺臉上

梁玥嘉還擊，拍咗宋千辰嘅後腦勺一下之後，宋千辰一臉無言咁望住梁玥嘉，梁玥嘉調皮地笑了笑開口道：「我都幫你拍番個腦入去呀！」



李子迪望住梁玥嘉同宋千辰你一言我一語地打鬧着，頓時將自己同二人之間嘅無形距離硬生生地拉遠

「其實我有啲想去溜冰，見人地溜冰我都想去學⋯」梁玥嘉忽然提道

梁玥嘉一直都想學溜冰，但又冇機會，有時候經過溜冰場見到啲人溜冰，心中都會不禁羨慕起嚟，但一個人去學嘅話又唔敢

「你想學溜冰呀？」李子迪聽到之後便笑笑口問道，「我識溜冰呀，我教你呀～」

「你識溜冰㗎？」梁玥嘉不禁瞪大雙眼，驚訝地問道，「我想學呀！教我教我！」

「好呀，搵日得閒帶你去溜冰場挽下！」李子迪笑住咁講，但佢冇注意到宋千辰嘅表情有幾陰沉

宋千辰默默地喺心中「唧」了一聲，然後一手拉過梁玥嘉，手搭喺梁玥嘉嘅博頭上






IG Link: https://www.instagram.com/nd_cotttocandy/?hl=zh-tw