［愛情純愛］由嗰一個Kiss開始，我地唔再係青梅竹馬: 65. 大吵一架

「嗱。」楊楠恩手上拎住兩支剛喺飲品機㩒出嚟嘅水，其中一支遞比宋千辰，「飲啖水休息下先啦～」

「唔該⋯」宋千辰禮貌地微微一笑，然後接過支水

楊楠恩坐低喺宋千辰嘅身旁，斯文地拍埋雙腳坐，拎住水嘅雙手放喺大腿上

「你同玥嘉感情真係好。」楊楠恩望住喺透明圍板內嘅溜冰場，微微一笑講道

「一般啦⋯」宋千辰頭微微耷着，望住手上拎住嘅水，「都唔係真係好好⋯」



「係咩？」楊楠恩笑了一笑又道，「但喺我睇嚟，你地感情好好，連叫對方嘅名都係用親近嘅叫法⋯就連穎容同佢咁熟，都係叫佢「玥嘉」，只有你先會叫佢「嘉嘉」。」

「我地細個嗰陣就已經識，叫咗好多年。」宋千辰抬起頭，尋找着梁玥嘉嘅身影

「唔覺得咁樣好好咩？好似一種特別嘅存在一樣，其他人都冇辦法咁樣做，只有自己可以。」楊楠恩微微笑道，但呢啲好似討好宋千辰一樣嘅說話只係開場白

「係咩⋯」宋千辰搵到梁玥嘉嘅身影，視線隨住梁玥嘉移動，「不過嘉嘉的確同其他人唔一樣⋯」

「你好了解佢、好保護佢，我睇得出。」楊楠恩微微一笑講道，手輕輕一提將髮絲繞到耳背，然後微微側着頭望住宋千辰，「唔係咩？」



「我可以承認我好了解佢。」宋千辰望到梁玥嘉嘅笑容，但佢完全冇笑意，嘴角揚唔起一樣

「你有冇諗過，有一日要同佢分開⋯？」楊楠恩嘅開場白講完，宜家開始先係佢要講嘅嘢，「玥嘉始終有一日都會搵到自己中意嘅人。」

「中意嘅人⋯？」宋千辰嘅內心喺聽到楊楠恩講嘅同時緊縮咗一下，「唔知，到佢真係搵到嘅時候先算。」

「可能佢已經有中意嘅人呢～」楊楠恩笑了笑道，佢用眼尾嘅餘光留意到宋千辰怔了一怔，便一臉抱歉地望向宋千辰，「呢個都係我估啫～唔係話佢真係已經有中意嘅人⋯」

「嗯，我知。」宋千辰口係咁答，但內心深處已經擔心起嚟



兩人坐多咗一陣之後就入番溜冰場，去到差唔多3點左右先一齊離開溜冰場

「我地到時番學再見啦玥嘉～」楊楠恩一臉不捨地對梁玥嘉講道，「拜拜～」

「拜拜～」梁玥嘉朝楊楠恩講道

楊楠恩仲有其他嘢做所以去咗搭車，李子迪都係搭車番屋企嘅關係便同楊楠恩一齊行，喺歸家嘅路上再一次只剩下梁玥嘉同宋千辰兩人

因為喺溜冰場嗰陣小吵咗兩句，宜家有啲尷尬，大家都唔想做先開口嗰個⋯唯有喺各懷心事同時並肩而行

「我學識咗少少啦，你⋯下次再教我⋯」梁玥嘉因為忍唔住而做先開口打開話題嘅人

「你唔係中意李子迪教咩？」宋千辰偏要同鬥氣，因為落唔到啖氣，心中因為梁玥嘉喺溜冰場講嘅嘢而仍然覺得不爽，「你搵佢教咪得囉！」

「宋千辰你咩事呀？」梁玥嘉聽到宋千辰嘅回答，本來已經消去嘅怒氣一下子湧番上嚟，「你邊隻眼見到我中意佢教呀？你教楠恩都教得好開心啦！」



「你邊隻眼見到我好開心呀？」宋千辰毫不留情地反駁，「你先係同人地笑得最開心嗰個囉！」

兩人停低咗步伐，直接嘈起嚟，梁玥嘉又好宋千辰都好，兩人都唔願低頭讓步

「唔通要對住佢黑口黑面呀？」梁玥嘉心中覺得宋千辰無理取鬧，輕皺起眉頭反問

「呵！你對住佢就笑得開心，對住我就黑口黑面？」宋千辰冷笑一聲，然後再一次板起臉

「宋千辰！你唔好以為我睇唔到你同楠恩坐喺外面傾計喎！」梁玥嘉握緊拳，諗起喺溜冰場嘅時候，忽然喺搵唔到宋千辰嘅身影，一望出去卻見到宋千兩同楊楠恩喺外面傾計，「你同佢就傾計，宜家就喺度話我！你幾時對女仔咁主動㗎？」

「係你話要跟李子迪學先，我先話教楊楠恩！」宋千辰知道佢應該要讓步，但係佢實在睇唔過眼，今次一個李子迪，咁下次又到邊個？所以宋千辰毫不猶疑就反駁過去

「咁你又唔主動拒絕？你個心都想教楠恩咋掛！」梁玥嘉嬲得直跺腳，快要嬲到喊似的，「你嫌棄我先㗎！」



「我、唔、係、想、教、楊、楠、恩！」宋千辰用力地、清晰地將逐個字講出口，「我係嫌棄你，細個就嫌棄咗你啦！洗唔洗等宜家呀！唔好話你想李子迪教，你中意人咩宜家？」

「我、我幾時有話我中意李子迪呀！」梁玥嘉聽到宋千辰話佢中意李子迪時，差啲就想直接喊出嚟，「我同佢係好兄弟！我點會中意佢呀！」

「今次話李子迪係你好兄弟，下次又到邊個係你好朋友好兄弟呀？到我呀？」宋千辰愈諗愈嬲，都冇留意到梁玥嘉嘅雙眼同鼻尖都已經紅起嚟

「你做咩要同李子迪比較啫？你同佢都唔一樣！」梁玥嘉聽到宋千辰嘅話仲嬲，什至紅了眼眶，眼眶濕潤起嚟，但除咗嬲，仲夾雜咗其他感情，「你同佢可以比咩？」

「我同佢可以比咩？」宋千辰聽到梁玥嘉講嘅最後一句，深呼吸，怒氣直湧出嚟，「原來我仲要比唔上佢呀？」

「我唔係呢個意思！」梁玥嘉意識到因為佢表達得唔好，語序倒轉咗而令宋千辰誤會咗佢，心中又嬲又焦急






IG Link: https://www.instagram.com/nd_cotttocandy/?hl=zh-tw