［愛情純愛］由嗰一個Kiss開始，我地唔再係青梅竹馬: 73. 我們之間

「陪我去⋯」梁玥嘉細細聲地講道，伸手捉住宋千辰嘅手臂

「呢度行去廁所先兩步路⋯」宋千辰一臉無奈咁望住梁玥嘉

「出面好黑⋯」梁玥嘉細細聲講道，然後晃了晃宋千辰嘅手臂，「陪我去啦，你都未刷牙啦！」

宋千辰眼見梁玥嘉一副惹人憐愛嘅模樣，嘆咗一口氣之後坐起身，將手機放咗喺墊褥上面，然後掀開棉被

「行啦⋯」宋千辰沒好氣地企起身



宋千辰打開房門，梁玥嘉行喺宋千辰身後，手捉住宋千辰嘅衣角邁步行入漆黑嘅走廊

梁玥嘉行入廁所，開著電筒照亮洗手盆嘅位置，搵到自己嘅牙刷

「你有電筒仲驚咩⋯」宋千辰無奈地講道同時，從水杯中拎起自己嘅牙刷，順手裝咗一杯水

梁玥嘉望一望宋千辰，手仍然緊緊地捉住宋千辰嘅衣角；宋千辰微微低頭一瞄，只見自己嘅衣角比人捏得皺皺的

梁玥嘉將一啖水含喺口中，咕嚕咕嚕沖口後吐出嚟，抹抹嘴，乖乖地等待宋千辰，宋千辰都Okay之後又跟喺宋千辰身後番房



宋千辰坐喺墊褥上面然後灘低，灘低想拎起被蓋嘅同時佢見到梁玥嘉跪坐喺墊褥上將被壓住

「你坐喺呢度做咩？你今晚瞓床喎。」宋千辰一臉疑惑地望住梁玥嘉，「定你想同我一齊瞓？」

宋千辰自己講完都笑咗一笑，唔洗諗都知道冇可能，大家又唔係小朋友，就算梁玥嘉玥驚都好，宋千辰已經同佢喺同一個房入面，梁玥嘉唔會連咁樣都會因為驚而要同宋千辰一齊瞓

「你係咪諗太多⋯」梁玥嘉無奈地反咗下白眼，「我點會係想同你一齊瞓⋯」

「我點知你。」宋千辰繼續睇手機，梁玥嘉望住宋千辰，忽然苦笑起嚟



「我地都唔係小朋友啦可⋯」梁玥嘉苦笑着說，梁玥嘉嘅說話吸引咗宋千辰嘅注意，「好似好多事都一直改變緊⋯」

「嗯，因為我地成長緊呀，有改變係正常嘅事，我地唔會一直都好似小朋友一樣。」宋千辰坐起身，將手機放到枕頭邊，「我地都改變緊。」

「一大個咗，咩都會唔一樣，到底我地應該懷念過去，定係只看未來？」梁玥嘉好似自言自語，又好似同緊宋千辰講嘢一樣

「嗯⋯」宋千辰盤腿坐喺墊褥上，直盯着梁玥嘉，喺呢個夜裏，總覺得有好多心事想衝口而出同梁玥嘉講，但呢啲說話都卡喺喉嚨，「的確咩都會變得唔一樣，我地睇事物嘅位置都唔同咗，以前係以小朋友嘅身高望向世界；宜家高咗、學嘅嘢多咗，識得以更多嘅角度睇事物，所有事唔會一成不變，我同你之間⋯都唔會⋯」

聽到宋千辰嘅說話，梁玥嘉先係一怔，佢思考着宋千辰講嘅最後一句說話，心中似乎有一個模糊嘅答案，但梁玥嘉又將答案默默地否定⋯

「咩意思⋯？」梁玥嘉明明心裏想要逃避問題，但係又不自覺地追問話裏嘅意思

「字面上嘅意思，所有事唔會一成不變，包括我同你之間都係。」宋千辰好快覆述一次佢剛才講嘅說話，明明佢未完全準備好，但話已經說出口了，「嘉嘉，如果我話，我嘅意思係，我地唔會一世都係青梅竹馬，你明嗎？」

「千辰，我—」



正當梁玥嘉想要講啲咩回答嘅時候，拎喺手上嘅手機嘅畫面就轉咗做來電顯示，梁玥嘉見係李穎容打比佢便按下接聽，宋千辰當下頓時當冇事發生一樣再次拎起手機

「喂，做咩呀？」梁玥嘉將手機放到耳邊

「聽講你住嗰度停電，你點呀？你爸媽又去咗旅行⋯」李穎容問道，聽到李穎容把聲後，梁玥嘉總覺得李穎容哪裡怪怪的

「我Okay呀～我喺千辰屋企。」梁玥嘉望住睇緊手機嘅宋千辰，梁玥嘉聽到李穎容嘅抽泣聲，佢呢下先知道李穎容「怪」嘅原因，「你喊呀？做咩喊呀？」

梁玥嘉擔心地問李穎容，但李穎容聽到梁玥嘉嘅說話後不禁抽泣得更厲害，眼淚一湧而出

「玥嘉⋯！」李穎容帶着哭腔呼喚梁玥嘉嘅名，梁玥嘉嘅眉頭不禁輕輕一皺，「我覺得Joshua好似唔愛我啦⋯！」

「發生咩事啦？你順番條氣先，慢慢話比我聽到底發生咗咩事？」梁玥嘉為咗避免太大聲講嘢會嘈醒宋媽媽佢地，所以將聲量收細



「今日我同Joshua出去，我地去咗食嘢，咁、咁佢話佢去洗手間，但佢冇拎電話⋯你知Joshua不嬲都冇話唔比我知佢手機password㗎嘛！咁跟、跟住⋯」李穎容一講到呢度又忍唔住想喊想喊咁，「跟住我見到有、有人不斷咁send message比佢，我衰好奇就拎起咗佢手機嚟睇⋯我一㩒入去佢IG，就見到有好幾個女仔同佢嘅聊天記錄，全部都係keep住有一直傾⋯！」




IG Link: https://www.instagram.com/nd_cotttocandy/?hl=zh-tw