梁玥嘉靜靜地耷低頭,迴避着視線,耳仔好似將外界聲音隔絕一樣,佢只聽到自己強而有力嘅心跳,呢一刻彷彿好實在,好實在咁活着一樣⋯

「諗緊咩呀?」宋千辰輕輕敲咗梁玥嘉嘅頭頂一下,梁玥嘉搖搖頭

「有時覺得,識到你真係好⋯」梁玥嘉柔聲地講道,臉上掛着溫和嘅微笑

「識到我梗係好⋯」宋千辰悄悄地移開咗視線,臉上嘅笑容淡淡的,但卻覺得甜入心

梁玥嘉望住宋千辰嘅側面,嘴角微微上揚



兩個人喺廳食嘢,梁玥嘉坐喺宋千辰對面,梁玥嘉企起身行去廚房拎嘢飲,就好似喺自己屋企一樣自然

喺梁玥嘉行入廚房嘅同時,放喺枱面嘅手機忽然一響,宋千辰抬眼,視線落喺亮起咗嘅手機螢幕上

「唧⋯」宋千辰見到一則WhatsApp通知同時,喺心中不滿地唧咗一聲

梁玥嘉手上拎住維他奶喺廚房行出嚟,行到枱邊時先拎起手機,然後先坐番喺位

宋千辰悄悄地留意住梁玥嘉嘅一舉一動,就連一個微表情都唔放過



梁玥嘉見到message之後笑了一笑,宋千辰心裏嘅不滿又溢出嚟

「笑得咁開心呀⋯」宋千辰將不滿藏喺心中,頭耷得低低的,但又不禁抬眼偷瞄梁玥嘉,「又同李子迪講緊咩⋯」

梁玥嘉放低手機,專心食麵,宋千辰比梁玥嘉更快食完,將碗筷拎番入廚房開水洗嘢;梁玥嘉望住宋千辰行入廚房,迅速地食埋最後一啖便起身拎埋碗筷去廚房

「飽晒~」梁玥嘉將碗筷放到洗手盆入面,然後企喺宋千辰身旁望住佢洗碗

宋千辰拎住洗碗布用力地將碗筷洗乾淨,水花都濺起晒,梁玥嘉下意識後退咗幾步,企到去宋千辰嘅身後



「冇反應嘅?」梁玥嘉見宋千辰望都唔望佢一眼,於是便悄悄地探頭從側面望一望宋千辰,但宋千辰依舊冇理佢,「喂⋯」

梁玥嘉望住宋千辰嘅側臉叫咗佢一聲,但宋千辰仍然係望都唔望佢一眼;梁玥嘉死心不惜,行到宋千辰嘅身旁直勾勾地盯着宋千辰

「唔理我?」梁玥嘉望住宋千辰,宋千辰瞄咗梁玥嘉一眼,「做咩啫?」

宋千辰照舊唔理佢,梁玥嘉拎出手機,喺IG story度po咗張相,影住宋千辰嘅側面,然後caption寫住「Hey?」,仲要@咗宋千辰

「我po㗎啦~」梁玥嘉將手機放到宋千辰嘅面前,宋千辰卻一副愛理不理嘅表情,梁玥嘉諗到個好方法令宋千辰理佢,「哼⋯你唔理我咪算囉~總有人會理我~」

梁玥嘉講完之後就一蹦一跳咁行咁去宋千辰嘅睡房,宋千辰頓時喺心裏唧咗一聲,然後放好碗筷之後就行出廚房,若無其事咁行番房

一打開虛掩着嘅房門就見到梁玥嘉坐咗喺電腦椅上面背對住房門睇手機,宋千辰行入房、閂上房門,然後從後一下子將手機從梁玥嘉手上抽走,梁玥嘉比宋千辰嚇咗一嚇,抬頭一望只見手機已經喺宋千辰嘅手中,宋千辰行到床邊坐低,梁玥嘉頓時想搶番部手機

「比番我呀!」梁玥嘉伸手想搶,但宋千辰卻將手舉高,「喂呀!」



梁玥嘉右手㩒住宋千辰嘅膊頭借力,左手盡力伸長想拎番部手機,但宋千辰卻將手向後伸,成個人拉後咗

「宋千辰!比番部手機我呀!」梁玥嘉焦急地講道,因為手機入面有佢同李穎容嘅對話,而喺對話入面有講佢中意宋千辰嘅事

「你收埋啲咩秘密呀?」宋千辰調皮地問道,然後轉手拎手機

「冇呀!」梁玥嘉見宋千辰換咗手,佢便將左手㩒喺宋千辰嘅膊頭,換右手舉起,「比番我啦!」

梁玥嘉嘅指尖掂到手機嘅邊邊同時,梁玥嘉用力咁㩒落宋千辰膊頭度借力,宋千辰冇㩒住張床扶住借力,梁玥嘉一用力借力嘅時候,宋千辰整個人向後跌

「喂!」梁玥嘉自己都趕唔切平衡,壓咗喺宋千辰身上,兩人同時怔了怔

梁玥嘉嘅臉瞬間紅起嚟,連忙想推開宋千辰坐番起身,但豈料宋千辰一手就將佢緊緊地鎖喺懷中



「你、你放手先啦⋯!」梁玥嘉都唔敢正眼望宋千辰,手一直想將宋千辰推開

宋千辰冇出聲,只係安靜地望住梁玥嘉,冇人知道呢一刻嘅宋千辰其實好緊張,心跳得好快,睡房內嘅安靜令佢聽得好清楚心臟強而有力地跳動嘅聲音

「我地唔會一世都係青梅竹馬,你明嗎?」

呢一句說話再一次喺梁玥嘉嘅腦海中迴盪着,梁玥嘉忽然鬆咗手冇再推開宋千辰,反而將手搭喺宋千辰嘅小腹上,輕力地將宋千辰嘅衫捉緊

宋千辰見狀,心感不妥,便將梁玥嘉推開,然後喺企起身同時將手機比番梁玥嘉

「我明⋯」梁玥嘉忽然坐起身,伸手搵捉住宋千辰嘅手腕,柔聲地講道

宋千辰對於梁玥嘉突如其來嘅回答感到疑惑,一時三刻之間,佢都唔明白梁玥嘉答緊啲咩






IG Link: https://www.instagram.com/nd_cotttocandy/?hl=zh-tw