［愛情純愛］由嗰一個Kiss開始，我地唔再係青梅竹馬: 86. 擋戰牌

「我做晒啦，你得做晒未？」楊楠恩微微一笑，身子前傾同時將髮絲繞到耳背

「差呢度，兩本。」宋千辰對楊楠恩嘅回答方式總係只答重點

楊楠恩眼見宋千辰連望都唔望佢一眼，心裏唔多唔少有啲受傷

「可能佢想專心做嘢啫～」楊楠恩喺心裏安慰自己，但瞬間就諗起啱啱宋千辰睇過手機，心情再次下跌

「做完。」宋千辰好快就做埋淨低嘅兩本，然後將疊簿疊番好



「拎落去啦我～」楊楠恩微微一笑，身子前傾同時伸手想拎放喺宋千辰面前嗰疊B簿

「我拎得啦。」宋千辰孭起書包，拎出手機send咗個message比梁玥嘉之後直接拎起疊簿就行

楊楠恩頓時孭起書包拎起疊簿跟上宋千辰，行到宋千辰嘅身旁

宋千辰同楊楠恩一齊落到教員室，將疊簿同分紙一次過放番喺簿櫃中

楊楠恩呆呆地望住宋千辰，好似期待緊宋千辰會講啲咩一樣



「我等埋嘉嘉先走。」宋千辰望向楊楠恩，氣氛有啲尷尬，「你可以走先。」

「唔⋯」楊楠恩心裏當然唔願意，因為佢想同宋千辰一齊走，「我同你一齊等埋玥嘉呀～好快啫～」

梁玥嘉從樓梯行落嚟，宋千辰一見到梁玥嘉就頓時行到梁玥嘉面前

沿路上，宋千辰對梁玥嘉嘅主動，楊楠恩都睇喺眼裏面，本來企喺梁玥嘉嘅身旁，自己嘅光芒已經會被壓制，宜家宋千辰一直同梁玥嘉講嘢，令楊楠恩覺得自己簡直就係透明人一樣

楊楠恩感覺到有啲尷尬，明明喺同宋千辰相處嘅好機會，但梁玥嘉又企喺佢地中間，而且宋千辰嘅注意力完完全全就冇落喺佢嘅身上



楊楠恩試圖想加入話題，一直等待時機，但楊楠恩留心聽住佢地嘅對話，發現自己好似難以加入話題，因為講緊嘅嘢都係佢唔知嘅嘢

行到去分岔路口嘅時候，梁玥嘉終於望向一直企喺佢身邊嘅楊楠恩

「我地去買珍珠奶茶，你去唔去呀？」梁玥嘉微笑着問楊楠恩

「唔啦⋯」楊楠恩擠出笑容，搖搖頭道，「你地去啦。」

「哦，咁好啦～聽日見～」梁玥嘉見楊楠恩唔去都唔逼佢

梁玥嘉同宋千辰轉身就走向另一邊行，楊楠恩望住兩人嘅背影，心中更加肯定自己嘅想法係冇錯⋯

梁玥嘉就係佢接近宋千辰嘅阻礙，因為有梁玥嘉，所以宋千辰嘅先唔會將注意力放到自己身上

每次望住宋千辰，楊楠恩都會不禁地幻想起嚟，希望有一日宋千辰都會中意自己，雖然一直以嚟都知道喺佢身邊有一個青梅竹馬，本來以為呢個青梅竹馬唔會係佢嘅對手，但當佢為咗接近宋千辰而同梁玥嘉做朋友時先發現，原來宋千辰嘅青梅竹馬係佢最大嘅勁敵、最大嘅阻攔⋯



宋千辰對邊個都一樣，唯獨對梁玥嘉唔一樣，楊楠恩睇得出⋯宋千辰對梁玥嘉嘅係偏愛係明顯嘅遷就，佢嘅偏愛好明顯，因為只有對住梁玥嘉嘅時候宋千辰嘅笑容先會特別唔一樣，多咗一份溫柔同時又夾雜咗一種爽朗

楊楠恩記得好清楚，嗰次去溜冰，兩人坐喺場外嗰段獨處時間，宋千辰嘅雙眼幾乎完全冇離開過梁玥嘉，佢知道宋千辰望梁玥嘉嘅眼神、對梁玥嘉嘅態度亦並非一般嘅感情深厚，而係夾雜咗其他感情⋯

楊楠恩睇得出⋯因為佢中意宋千辰，知道中意一個人嘅時候嘅眼神會變成點⋯佢，好清楚⋯

「成日都飲珍珠奶茶，肥死你呀⋯」宋千辰企喺梁玥嘉隔離，陪佢一齊等奶茶

「痴線⋯邊度肥？」梁玥嘉耷低頭，手摸摸自己嘅肚子，「我少少肥肉都冇！」

「你再飲多兩杯就肥㗎啦！冇人要㗎啦！」宋千辰一臉認真地講道

梁玥嘉行到櫃枱前拎奶茶，拎支粗飲管一下子戳破膠膜，瞬間飲咗一大啖



「冇人要？」梁玥嘉抬眼望一望宋千辰，「有你。」

「呿⋯」宋千辰雖然不屑地呿咗一聲，但嘴角都係不禁上揚起嚟，「冇人話過會要你。」

「唔得喎！」梁玥嘉呻一口奶茶，伸手拍咗宋千辰兩下，「如果我冇人要一定係因為你，啲男仔會因為以為我有男朋友所以唔中意我。」

「咁你可以同佢地講，話比佢地知其實你係單身。」宋千辰無奈一笑講道，「你唔澄清咋嘛～」

「有個擋箭牌都幾好呀～」梁玥嘉拍拍宋千辰嘅膊頭，甜美可愛嘅笑容掛喺臉上，「可以用嚟拒絕人。」

「你咁對我㗎咩？」宋千辰望住梁玥嘉，都唔知要笑好定嬲好

「你都係咁對我⋯」梁玥嘉挑眉講道，「宋千辰，你好似都係咁樣對我喎！」

「我投降，你贏⋯」宋千辰無奈地笑了笑，「好男不如女鬥，哼！」



「係呢，你今日同楠恩一齊做嘢，點呀？楠恩好好人呢～」梁玥嘉微笑問道，宋千辰嘅收起臉上嘅笑容，而係靜咗落嚟

「一般啦。」宋千辰靜咗幾秒之後先回答，事實上宋千辰對楊楠恩嘅印象冇咩特別，就係一個高中同班嘅同學，「冇咩特別。」

梁玥嘉一臉疑惑咁望住宋千辰，明顯地係對於宋千辰嘅回答有啲意外，不過宋千辰咁樣答佢都係一件好事嚟，畢竟咁樣就可以確定連對男仔最大殺傷力嘅楊楠恩都吸唔到宋千辰嘅注意力




IG Link: https://www.instagram.com/nd_cotttocandy/?hl=zh-tw