［愛情純愛］由嗰一個Kiss開始，我地唔再係青梅竹馬: 88. 神秘禮物

「楠恩！你諗緊咩呀？」梁玥嘉見楊楠恩發呆一樣，便輕輕拍咗佢一下

「吓？」楊楠恩回神過嚟，見到李穎容同梁玥嘉都望住自己，露出一個尷尬嘅笑容，「嘻嘻⋯」

梁玥嘉同李穎容一直都有講有笑，楊楠恩喺同佢地一齊嘅時候，可以感覺到「朋友」帶嚟嘅溫暖，有時都會因為感覺到溫暖而覺得開心同慶幸，但當見到梁玥嘉同宋千辰嘅親密無間時又會按捺不住咁妒忌

「我地考完畢業試之後咪撞正係星期六日嚟嘅～不如我地去camping！」梁玥嘉忽然興致勃勃地提議道，「可以租露營車！」

「試都未考呀！你就諗緊去邊度挽啦？」李穎容無奈地笑了笑，佢都冇梁玥嘉咁好氣，「真係冇你乎呀⋯」



楊楠恩見到梁玥嘉天真可愛嘅一面，嘴角都不自覺地上揚，似乎喺無意識之間比佢嘅笑容同大家相處之中嘅和諧同快樂氣氛渲染到

「楠恩你話呢？」梁玥嘉問楊楠恩，李穎容都望向佢

「我覺得都幾好呀，其實我都冇咩所謂。」楊楠恩微微一笑講道

喺楊楠恩心裏一絲暖意嘅背後，隱藏住不為人知嘅過去⋯

曾經嘅楊楠恩都有自己嘅朋友圈子，但喺呢個朋友圈子入面，佢總係被杯葛一樣嘅存在⋯冇人會在意，亦冇人會問佢嘅意見，佢就只係喺呢個圈子之中「逆來順受」一樣嘅狀態，最後楊楠恩離開咗呢個令佢不適嘅圈子⋯



面前嘅兩人，同佢明明唔係熟絡咗好耐，但好多時都會問佢意見，令佢知道自己喺三個人中自己係有一個位置，唔係局外人同時亦冇被杯葛⋯

「我地約埋班男仔一齊去呀！去挽唔叫佢地會悶好多㗎！」梁玥嘉笑道，「到時問下佢地去唔去呀～」

當梁玥嘉一提到呢度，楊楠恩就記起宋千辰呢個人，同時記起梁玥嘉呢個阻礙⋯

食完lunch番到學校之後就繼續上埋剩低嘅堂，梁玥嘉同李穎容開始飯氣攻心，開始打盹起嚟，梁玥嘉托着腮微微耷低頭，比較豪邁嘅李穎容直接點着頭

「又恰眼瞓⋯」宋千辰離遠望住正在打盹嘅梁玥嘉，喺心裏不禁一笑，「等你又成日煲劇唔瞓呀嗱！」



喺宋千辰眼中嘅梁玥嘉總係可愛動人，一切似係命中注定，又似係緣份安排，喺最接近對方嘅位置，但又難以鼓起勇氣伸手捉住

明明就已經喺眼前、喺身旁⋯明明知道即使係開玩笑般講出「我中意你」四個字，都可以得到對方嘅回應，可以睇得出對方嘅想法⋯明明可以⋯

「唉⋯點解會咁難⋯？」望住梁玥嘉嘅背影，宋千辰不禁苦笑，喺心中默默地慨嘆道

難，並非指「中意一個人好難」，而係在於要鼓起勇氣開口講一句「我中意你」好難，因為係用兩人嘅友誼作賭注，無論結果係點，下場都係一樣：為友誼劃上句號

宋千辰嘅內心有啲著急，佢想搵個機會表白，但總係搵唔到適合嘅時機，另外更重要嘅係，著急嘅佢未完全做好心理準備⋯做好失去呢段友誼嘅準備⋯

⋯

「唉⋯」宋千辰企喺陳列枱前面，一臉苦惱咁望住放喺眼前琳琅滿目嘅商品，「揀邊個好⋯？」

因為已經有表白嘅打算，所以宋千辰打算買份禮物比佢，當係一個開場白咁樣



而今日咁啱唔係同梁玥嘉一齊放學番屋企，佢就可以去買禮物，本來以為係一個簡單嘅環節，但點知⋯

「你係唔係想買比女朋友？」櫃檯小姐見宋千辰苦惱咗好一陣子，終於忍唔住問道

「嗯⋯」宋千辰臉上掛上羞澀嘅微笑，微微點一點頭

「佢中意咩類型㗎？咁樣會易揀啲。」櫃檯小姐友善地微笑問道

「佢好似已經有中意嘅款式⋯」宋千辰望咗櫃檯小姐一眼，「但我又諗緊要買佢中意嗰款比佢好定揀另一款比佢⋯」

「當然係佢中意嗰款，咁先代表你有記住佢嘅喜好嘛～」櫃檯小姐微微笑講道，亦一言驚醒夢中人一樣點醒咗宋千辰

「咁要呢個啦！」



⋯

「唔⋯呢度⋯」梁玥嘉望一望題目然後又望向放喺功課紙隔離嘅教科書，「好難呀媽呀！到底呢題要點做㗎！」

感到無助嘅梁玥嘉拎起電話，直接打比人問

「喂？千辰呀⋯！你做咗Bio嗰份嘢未呀？佢最後一題我唔識答呀！我就嚟望到本書穿窿啦⋯！」梁玥嘉無助地吶喊道，手仍然一邊掀着書

「做咗啦。」宋千辰啱啱沖完涼就收到梁玥嘉嘅電話，「等我一陣。」

宋千辰頓時就番房喺書包中拎出放功課嘅file，搵到嗰張功課紙放到枱面上，掀到去最後嗰頁

「最後嗰題好簡單咋喎⋯你有冇聽書㗎？」宋千辰無奈地問道






IG Link: https://www.instagram.com/nd_cotttocandy/?hl=zh-tw