梁玥嘉自己咁樣諗完之後都有啲訝異,因為自己好似幸災樂禍一樣,竟然會因為楊楠恩令宋千辰心情唔好而開心

放學嘅時候,梁玥嘉好快就執完嘢,望向宋千辰時見佢仲執緊嘢所以坐喺位等埋佢

「宋千辰⋯!」楊楠恩行到宋千辰嘅座位旁邊,「小息撞到你對唔住⋯」

楊楠恩因為小息時嘅碰撞而對宋千辰道歉

「唔緊要。」宋千辰淡然地講道,繼續櫃桶入而嘅嘢收入書包



「你係唔係嬲?」楊楠恩一臉抱歉咁問道,「Sorry⋯」

「吓?冇嬲嘅必要⋯」宋千辰望咗楊楠恩一眼,然後孭起書包,「只係好小事。」

「你走啦?」楊楠恩見宋千辰孭起書包

「嗯,拜。」宋千辰拍埋枱櫈,孭住書包離開座位

「明明佢話佢冇嬲,點解都係對我咁冷淡嘅⋯?」楊楠恩行番埋位嘅時候不禁諗道



梁玥嘉見宋千辰離開,經過黑板前方時望咗梁玥嘉一眼,梁玥嘉便孭起書包同宋千辰一齊走

「番到屋企先同佢講定宜家同佢講好呢⋯」梁玥嘉喺心裏問道,佢悄悄地瞄咗宋千辰一眼

宋千辰雙眼直視前方,冇開口講嘢嘅打算

「你好啲未呀?」梁玥嘉先以關心作為開場白

「仲有少少⋯」宋千辰嘅語氣柔和起嚟,同啱啱對楊楠恩講嘢嘅語氣完全係兩回事



面對梁玥嘉,宋千辰總會心軟,為咗佢,宋千辰可以低頭可以等待,只因為佢覺得梁玥嘉值得佢咁做

從未出現令你心動嘅人,並唔係因為未搵到,而係因為你從未察覺佢嘅存在,適合心動嘅時間尚未出現

曾經,宋千辰都有諗過自己中意咩類型嘅女仔,點解自己冇遇到一個會令自己心動嘅女仔

「會唔會係因為嘉嘉喺我身邊?」

一個宋千辰問過自己無數次嘅問題,而問題嘅答案並唔係喺佢嘅身邊,而係喺佢嘅心底裏⋯

每一次望向梁玥嘉,嗰種心動嘅感覺令佢自己都無法否定,感覺⋯太強烈,目光,再唔會落喺其他人身上

「冇事就好。」梁玥嘉微微一笑,壓抑着心裏嘅尷尬

梁玥嘉又開始欲言又止嘅狀態,抬頭望一望宋千辰,宋千辰仍然係直視前方



直到番到屋企門口嘅時候,梁玥嘉見宋千辰已經拎出鎖匙行緊去屋企門口

「千辰,琴日我⋯」梁玥嘉微微耷低頭,鼓起200%嘅勇氣開口講道,「唔⋯其、其實我⋯」

宋千辰企喺屋企大門前,拎住鎖匙嘅手懸喺半空,回頭望向梁玥嘉,專心地聽着梁玥嘉講嘅嘢,應該話,心裏期待緊梁玥嘉會講啲咩

「我⋯」梁玥嘉嘅說話又再一次卡喺喉嚨,明明都已經鼓起勇氣,但係咩都講唔到出嚟

梁玥嘉嘅心焦急萬分,想講嘅嘢卻講唔出口,到底係邊度出咗問題?

宋千辰拎住鎖匙嘅手垂低,眼見梁玥嘉仍然冇講啲咩嘅佢走到梁玥嘉嘅面前,心裏默默地嘆咗一口氣

「其實你唔洗逼自己答我啲咩。」宋千辰對梁玥嘉講道



梁玥嘉抬起頭望住宋千辰,只見到佢嘅微笑,但佢知道呢個微笑,只不過係用嚟安慰佢

「我講過嘅嘢唔會收番,亦唔會改變⋯」宋千辰認真的模樣令梁玥嘉嘅心裏更自責,「等到你真係想比答覆我嘅時候,你先再答我,呢一刻唔洗逼自己答,既然你都講唔出口⋯」

「唔係⋯!只係—」「嗯,我明白。」

喺梁玥嘉想講啲咩嘅時候,宋千辰直接打斷

「嘉嘉,我會諒解。」宋千辰認真地微微點一點頭,「我知你未準備好比答覆我,所以唔洗勉強。」

聽到宋千辰嘅說話,梁玥嘉內心中嘅歉意更重

「千辰,我唔係勉強自己要比答覆你⋯」梁玥嘉嘅語氣中都夾雜咗歉意,「只係⋯」

「只係你覺得我地宜家咁樣好尷尬?」宋千辰無奈一笑,「之前又唔係冇試過咁樣。」



「你會唔會嬲我?」梁玥嘉問道,「我唔想你唔開心⋯」

「唔會嬲。」宋千辰搖搖頭,「如果你係因為我唔開心,所以先比答覆我,咁我會更加唔開心。我想你真係準備好、決定好先同我講,你宜家成個人嘅狀態都寫晒喺面上。」

「千辰,但係我—」「嘉嘉,你宜家完全就係猶疑緊嘅狀態。」

宋千辰見到梁玥嘉一副著急着模樣,無奈一笑

「唔好當我唔了解你啦好唔好?」宋千辰講道,「我睇得出⋯」

「我有猶疑咩⋯?」梁玥嘉不禁喺心中反問自己,開口又道:「我冇話你唔了解我⋯」

「你口講唔係,但你個表情話咗比我知你猶疑緊。」宋千辰太了解梁玥嘉,了解到只從一個表情都可以知道佢心中嘅想法,「你真係唔洗勉強,我Okay。」






IG Link: https://www.instagram.com/nd_cotttoncandy/?hl=zh-tw