［愛情純愛］由嗰一個Kiss開始，我地唔再係青梅竹馬: 111. 才不是喜歡

「咩不滿？」李穎容反問番梁玥嘉，但佢臉上仍然好似寫住「不滿中」三個字咁，氣沖沖的

「不滿張子萊話睇你以外嘅都係靚女囉～」梁玥嘉一隻手掩着嘴笑，另一隻手推開女廁嘅門

「冇囉！」李穎容講道，「佢講咩關我咩事⋯！」

梁玥嘉望住李穎容氣沖沖咁行入廁格，梁玥嘉企喺洗手盤前等佢

過咗一陣之後，李穎容從廁格中行出嚟，㩒開水龍頭洗手



「你望下你呀！仲話冇！」梁玥嘉企喺李穎容身旁，同佢講住同一塊鏡，「嬲爆爆咁～你做咩咁在意佢講啲咩啫～」

「痴線啦～邊個在意佢講啲咩？」李穎容甩着手，然後捉一捉自己條裙

「你口不對心嘅～」梁玥嘉笑道，「唔通你中意咗佢？」

「咪傻啦！我點會中意佢？」李穎容反咗一個大大嘅白眼，「好兄弟！Just bro～」

「少少好感都冇？聽你講佢之前又幫你出頭喎～」梁玥嘉記得李穎容之前同佢講過嘅嘢，話張子萊幫佢對Joshua出咗口氣



「就、就算有好感，都只係朋友嘅好感！」李穎容斬釘截鐵般講道，「我唔會中意佢！」

「哦。」梁玥嘉似乎就唔太相信李穎容講嘅嘢，只係抿着唇點一點頭，「你話唔會咪唔會囉～」

「淨係掛住講我，咁你呢～」李穎容反擊般問道，「你進展好好啦宜家～」

「咩呀⋯我都冇話我進展好好⋯」梁玥嘉冇將最近發生嘅事同李穎容講，畢竟一切都未有結果，「少少進展囉～」

「哎喲～」李穎容伸手戳梁玥嘉嘅臉頰，「咁你幾時同我一齊溫書啫？最多叫埋宋千辰啦～」



「最多叫埋張子萊～」梁玥嘉笑道，故意望住李穎容講道

啱啱喺上番嚟嘅楊楠恩見到梁玥嘉同李穎容，便小跑走向佢地

「講咩講咩～」楊楠恩跑到梁玥嘉身旁停低，探頭望住佢地，「咩叫埋張子萊？」

「穎容叫我同佢一齊溫書嘛，咪話叫埋千辰同張子萊霍思傑佢地囉～」梁玥嘉望向楊楠恩講道

「我又要一齊溫書！」楊楠恩自動請纓要一齊，心裏道：「如果星期六日先出嚟溫書，咁咪即係星期六日都可以見到宋千辰！」

「好呀！」梁玥嘉爽快地答應，「不過我地未約幾時。」

「喺group度約囉～」李穎容先踏入課室

李穎容拉住梁玥嘉行到去宋千辰嘅面前，剛好霍思傑都番咗嚟



「嚟緊一唔一齊唔溫書？」李穎容先開口問道

霍思傑抬頭望一望李穎容，望一望梁玥嘉，然後望向張子萊

「跟你。」霍思傑對張子萊講道

「嘖⋯你兩個唔好咁Gay成日痴埋一齊得唔得啫⋯」李穎容一臉嫌棄咁望住霍思傑

「冇計啦～唉～」霍思傑嘆一口氣搖搖頭，伸手搭住宋千辰嘅膊頭，「我地唔似宋千辰有女嘛～咁我地呢啲單身汪⋯唯有自成一角啦～」

「又關我事？」宋千辰回頭望一望霍思傑，「去搵下囉，搵下搵下就有㗎啦。」

「講就搵到咩⋯唔似你唔洗搵就有。」張子萊附和霍思傑，兩個人又開始唱雙簧，「唉～有青梅竹馬真係好呀～」



宋千辰稍微抬眼望向梁玥嘉，梁玥嘉剛好又望向宋千辰，兩人嘅視線雙交，無奈地笑咗一笑

「張子萊你上次唔係話有中意嘅人㗎咩～」梁玥嘉望住張子萊，揚起嘴角問道，「我記得上次你話有㗎啵～」

「講呢啲。」張子萊尷尬地移開了視線

「今個星期六一齊溫書好唔好？反正下下個星期都考試啦～」李穎容轉移話題問道

「我可以呀～」梁玥嘉第一個同意，然後下意識望向宋千辰

「我都得～」楊楠思嘅下巴靠喺李穎容嘅膊頭上，笑了笑道，「男仔呢？」

「三個都得。」張子萊一次過答埋宋千辰同霍思傑嘅回答

楊楠恩偷偷地望住宋千辰，心裏比其他人更期待星期六嘅來臨



⋯

「你洗唔洗拎嘢番去溫？」早就執好嘢嘅梁玥嘉行到去宋千辰嘅座位旁邊

「呀⋯」宋千辰頓時抬頭望住梁玥嘉，「啱啱放咗喺locker⋯你幫我拎。」

梁玥嘉轉身行到宋千辰嘅locker前，打開locker木門，拎番中文書同筆記出嚟，行到去宋千辰面前將書同筆記遞比佢

兩人一同離開學校，番到屋企門口時，梁玥嘉跟喺宋千辰嘅身後，宋千辰行喺前面開門，梁玥嘉跟住佢行入屋

「不如做咗功課先。」梁玥嘉踩住鞋踭將皮鞋除咗落嚟，換上拖鞋






IG Link: https://www.instagram.com/nd_cotttoncandy/?hl=zh-tw