「唔⋯」楊楠恩諗咗一諗,然後嘻嘻笑道,「我都唔知我邊度唔明⋯」

「咁呀,我盡量解釋啦⋯」宋千辰講道,然後就喺楊楠恩嘅堂課簿上邊寫邊解釋

梁玥嘉同李穎容去完廁所出嚟,當兩人差唔多行到番去座位嘅時候,梁玥嘉眼見宋千辰正專心地教緊楊楠恩,兩人靠得好近

「嘖⋯」梁玥嘉嘅心裏不悅地嘖咗一聲,雖然仲未一齊,但唔多唔少都會有啲呷醋

「係唔係即係咁⋯?」楊楠恩拎起筆喺堂課簿上寫道



梁玥嘉帶着一肚子不滿坐低,宋千辰都冇察覺到梁玥嘉番咗嚟一樣,仍然專心咁教楊楠恩做數

「咦,你番咗嚟啦?」宋千辰一回頭見到梁玥嘉坐番喺度已經,便隨口講道

「嗯。」梁玥嘉眼尾都唔望宋千辰一下,冷淡地嗯咗一聲

「做咩⋯」宋千辰頓時滿頭問號,心中滿滿嘅疑惑,「去完廁所番嚟就咁嘅⋯?」

「點解我都係計唔啱答案嘅?」楊楠恩捉住宋千辰嘅前臂搖咗兩下,宋千辰再次將視線落喺楊楠恩嘅堂課上



「咁中意教人⋯我數學都唔好啦~又唔見你教我⋯」梁玥嘉一邊做數一邊喺心中抱怨道,「哼⋯討厭鬼!」

梁玥嘉自己喺一旁生悶氣,咩都唔知嘅宋千辰繼續教楊楠恩,梁玥嘉嘅心中抱怨得更加厲害,偷偷地瞄咗宋千辰一下,見到佢仍然專心致志就更嬲

「哼⋯!」梁玥嘉喺心裏大聲咁哼咗一聲以表示佢嘅不滿

梁玥嘉忍唔住又偷瞄咗宋千辰一眼,見到宋千辰微微側身,同楊楠恩靠得好近,兩人嘅膊頭都幾乎要碰到

「解到啦!」楊楠恩興奮地講道,宋千辰只係一笑置之



宋千辰望向梁玥嘉,梁玥嘉一臉認真地做緊題目,宋千辰望咗梁玥嘉一陣,但梁玥嘉都冇望佢

「都係唔好嘈佢啦⋯」宋千辰嘅內心無奈地笑了笑道

「我先唔想理你,等你教人教得咁開心呀嗱⋯!」梁玥嘉其實知道宋千辰望住佢,但係佢內心嘅不滿仲未散去,所以死都忍住唔望宋千辰,「激死我啦!」

李穎容留意到梁玥嘉嘅悶悶不樂,悄悄地瞄咗宋千辰一眼,不禁笑咗一笑

「哎呀~宋千辰睇唔出玥嘉嬲~」李穎容喺心裏偷笑道,望住梁玥嘉氣沖沖,但宋千辰又咩都唔知咁,「睇嚟玥嘉又要嬲一陣先會同番佢講嘢啦⋯」

梁玥嘉一嬲,寫字就寫得好快,拎住鉛芯筆嘅手快速地郁,臉板着,笑都唔笑,表情嚴肅

放喺褲袋嘅手機一震,眼見梁玥嘉完全冇拎手機出嚟睇嘅打算,坐喺對面嘅李穎容輕輕踢咗梁玥嘉一腳

梁玥嘉抬頭望咗李穎容一眼,然後拎手機出嚟睇,睇下李穎容send咗啲咩比佢要佢即刻睇咁重要



李穎容:出手搶啦!

梁玥嘉:搶咩(反白眼)

李穎容:搶人!!!出手拉番佢番嚟啦!

梁玥嘉:拉佢番嚟做咩

李穎容:(反白眼)你唔係呷醋咩?仲唔搶番宋千辰番嚟?

李穎容:佢同楠恩靠得好近喎~

「嘖⋯」梁玥嘉再次喺心中不滿地嘖一聲



李穎容:你話你唔識做數咪得~佢唔會唔理你嘅~

梁玥嘉抬眼望向李穎容,李穎容向佢打咗個眼色,示意佢伸手拉一拉宋千辰,梁玥嘉瞄咗宋千辰一眼,又望一望李穎容,李穎容點一點頭

「喂⋯」梁玥嘉伸手從下繞到宋千辰嘅前臂內側,捉住佢嘅前臂,「我唔識做,你教我⋯」

喺感覺到有人捉住佢前臂嘅一刻,宋千辰窒咗一下,回頭望向梁玥嘉

「唔識做邊度?」宋千辰直接無視咗楊楠恩問梁玥嘉,過咗兩秒先記得佢仲教緊楊楠恩做數,然後回頭望楊楠恩,「等陣。」

李穎容見宋千辰嘅反應,頓時耷低頭偷笑,順便輕踢咗梁玥嘉兩腳,梁玥嘉一下子用腳打橫一掃,撥開李穎容隻腳

「邊度唔識呀?」宋千辰靠近梁玥嘉,佢嘅膊頭掂住梁玥嘉嘅膊頭

「唔⋯」梁玥嘉其實冇嘢唔明,但佢宜家拉咗宋千辰過嚟,冇理由話冇嘢,只好隨便指一題,「呢度⋯!我唔明b part點做,我計咗幾次都計唔啱!」



「哦⋯」宋千辰一邊睇題目,微微點頭,「呢度呢,其實佢係講緊⋯」

楊楠恩眼見享受獨佔宋千辰嘅時光完結,因為梁玥嘉嗌咗宋千辰一聲,宋千辰就成個魂魄都直接被牽走

「過分⋯」楊楠恩開始喺心裏抱怨起嚟,「我好難得先可以同宋千辰喺咁近嘅距離⋯梁玥嘉你同宋千辰已經成日見住啦!仲要霸住⋯」

楊楠恩雖然心裏不滿,但係都要沉着氣,因為佢要喺大家嘅面前保持番佢嘅形象,唔可以露出破綻




IG Link: https://www.instagram.com/nd_cotttoncandy/?hl=zh-tw