「喂喂,你地喺度嘅?」忽然有人行到過嚟,聲音從梁玥嘉嘅背面傳嚟

梁玥嘉隨即回頭望去,見到原來係李子迪同班上而另外兩個男仔

「你又會喺度嘅?」霍思傑先開口反問番轉頭

「溫書嘛~」李子迪行到枱邊,眼尾瞄到梁玥嘉原來坐咗喺度,笑咗一笑,「你地都溫書呀?」

「明顯啦係唔係呀!」李穎容笑道



「我地去另一邊。」李子迪講道,然後喺歸走之前伸手輕輕地拍咗梁玥嘉嘅頭兩下,「功課之後再問你借啦~」

「喂呀!」梁玥嘉撥開李子迪嘅手,李子迪好似平時一樣笑咗一笑之後就同佢兩個friend一齊行走咗,穿過走廊行去入啲嘅地方搵位

「嘖⋯」宋千辰耷低頭繼續食飯,喺心中不滿地嘖咗一聲,因為佢見到李子迪喺伸手拍梁玥嘉嘅頭之前望咗佢一眼,然後笑咗一笑,「佢又真係特登㗎喎!」

梁玥嘉最快食完,一食完梁玥嘉飲咗兩啖凍奶茶,然後就走身行去廁所;梁玥嘉前腳行出去,李穎容後腳就跟上

「喂!」李穎容小跑兩步,跑到梁玥嘉身旁同時伸手拍咗佢兩下



「你都去toilet呀?」梁玥嘉順口問道

兩人入到廁所,梁玥嘉企喺洗手盆前洗手,李穎容行到去每一個廁格前輕輕推一推開門,望一望廁格有冇人,然後行番去梁玥嘉身旁

「做咩呀?咁鬼祟~」梁玥嘉從鏡中望到李穎容嘅一舉一動,笑一笑又道,「有秘密講咩~」

「你睇實啲宋千辰啦!」李穎容企喺梁玥嘉身旁講道

「吓?」梁玥嘉不禁一笑,「做咩突然間睇實佢?」



「你唔覺楠恩痴太埋㗎咩?」李穎容一臉認真咁講道,但梁玥嘉只係笑笑就算,「玥嘉!你仲有心情笑!我認真㗎!我直覺覺得佢真係中意宋千辰!」

「好呀~」梁玥嘉從容地點一點頭,從鏡櫃下抽咗兩張紙巾抹手,「中意囉咪~反正我又未驚過~」

梁玥嘉一臉自信地對李穎容講道,李穎容對梁玥嘉突如其來嘅自信有啲訝異,平日梁玥嘉都好少咁有自信,明明前一排梁玥嘉仲擔心緊會唔會係自己一廂情願,但宜家卻一臉輕鬆,一啲都唔緊張

「你咁有自信?」李穎容比梁玥嘉更緊張,畢竟係好姊妹嘅感情事,「陣間楠恩靠得更埋咁點算呀?你唔驚呀真係?楠恩唔差㗎外觀條件上嚟講!」

「我知楠恩唔差呀~」梁玥嘉仍然一臉從容不迫咁講,然後將手上嘅紙巾搓成紙團,掉入垃圾桶中,「就算佢真係中意千辰都好我都唔驚喎~畢竟宋千辰中意嘅人,係我梁玥嘉~」

「吓!真、真係㗎!?」李穎容捉住往廁所門口行去嘅梁玥嘉,「幾時嘅事呀?」

「早排囉~」梁玥嘉簡單直白地回答李穎容嘅問題,望住李穎容一臉震驚嘅模樣,佢笑咗出嚟,「不過呀~我未應承佢,我打算考完試先。」

「呵~難怪咁有信心啦!」李穎容終於知道梁玥嘉自信嘅原因,笑咗一聲,「原來已經係神女有心,襄王亦有夢~」



「你呀!唔好同人講呀!」梁玥嘉叮囑李穎容唔好話比其他人知呢個秘密,「不過聽完你咁講,都開始覺得楠恩會唔會真係中意千辰。」

梁玥嘉諗起之前發生過嘅事,由睇戲坐位到啱啱教數,本來都覺得冇咩唔妥,但李穎容咁樣再講嘅時候,梁玥嘉都開始對楊楠恩嘅一舉一動有啲懷疑

「做咩呀?識擔心啦?」李穎容揶揄梁玥嘉道,「知道楠恩會係個強勁嘅對手啦?」

「講到好似你已經個楠恩係中意宋千辰咁⋯」梁玥嘉無奈地反咗個白眼,但好快梁玥嘉就笑了笑,「不過我唔擔心~」

梁玥嘉嘅腦裏諗起宋千辰講嘅一句:「我講咗嘅嘢唔會收番,亦唔會改變⋯」

原來,當兩個人嘅心意對上時,係一件咁美好嘅事⋯當以為係靜悄悄咁偷望對方時,一抬眼發現,彼此一同抬頭望住對方

「睇下~」梁玥嘉將衫袖稍微拉高,露出手碗上嘅手繩,「千辰手上都戴咗~」



「哦~有定情信物添喎~」李穎容捉住梁玥嘉嘅手,望住佢手上嘅手繩笑道,「萬事俱備,只欠答覆!」

「佢知我嘅心意,只係我遲啲先比個答覆佢咋嘛~」梁玥嘉嘅笑容不自覺地變得甜甜的,糖份超標

「得啦得啦!甜死啦!」李穎容打咗個冷震,「知你兩個恩愛啦!閃死啦!」

梁玥嘉同李穎容出番去坐低繼續溫書,宋千辰望向喺佢身旁坐低嘅梁玥嘉,梁玥嘉就同平常一樣望一望宋千辰,若無其事咁坐番低

楊楠恩望住梁玥嘉同李穎容番嚟,見到佢兩個笑住出嚟,覺得自己好似miss咗啲咩好重要嘅嘢咁,不過佢嘅心更加在意宜家比心上人教數嘅狀況




IG Link: https://www.instagram.com/nd_cotttoncandy/?hl=zh-tw