［愛情純愛］由嗰一個Kiss開始，我地唔再係青梅竹馬: 126. 懷疑

「呵～欠⋯」瞓咗兩、三個鐘嘅梁玥嘉終於醒，伸咗個懶腰，用力撐起自己坐起身

梁玥嘉起身之後第一時間係拎起手機，手機嘅螢幕一亮，果然有通知，係IG send過嚟嘅通知

打開一睇，見到係宋千辰send咗啲搞笑嘅post比佢睇，梁玥嘉嘅嘴角漸漸上揚，覆咗兩個笑喊嘅emoji

「瞓醒？」宋千辰瞬間回覆問道，本來宋千辰就睇緊手機，所以第一時間就睇到梁玥嘉嘅message

「嗯，醒啦」梁玥嘉回覆道，一起身就即刻同心上人講嘢嘅感覺好幸福



⋯

翌日放學之後，宋千辰都有嚟梁玥嘉屋企陪佢

「望住我做咩？」宋千辰抬頭見到梁玥嘉眼定定咁望住佢

「你喺度食米線，好香呀⋯我就喺度食白粥⋯」梁玥嘉望住宋千辰碗外賣米線抱怨道

「你病好咗咪有得食囉～」宋千辰聽到梁玥嘉嘅抱怨後仲要食咗一大啖



「個炸雞排都好香呀⋯」梁玥嘉望住同米線分開放嘅炸雞排，陣陣香味傳到梁玥嘉嘅鼻中，「你話我可唔可以食一件呢～」

「唔可以。」宋千辰毫不猶疑地堅決回答，「你未病好，冇得食！」

「呀⋯」梁玥嘉扁起嘴，偷偷望咗宋千辰一眼，伸手輕輕拉一下宋千辰嘅衫袖，「一啖⋯！」

「唔得。」宋千辰果斷地否決咗梁玥嘉嘅議案，「你扮可愛都冇用。」

「哼⋯」梁玥嘉細細聲地哼咗一聲



「我特登嚟陪你食嘢呀，仲哼我⋯」宋千辰嘅視線從手機螢幕上移開

「多謝你囉！」梁玥嘉嘟起嘴講道，梁玥嘉生氣撒嬌嘅模樣令宋千辰不禁笑起嚟

「等你完全好番之後，我再同你去食囉～」宋千辰微微一笑講道，「你呀！食完粥好食藥啦！」

「知啦⋯你仲囉嗦過我媽⋯」梁玥嘉無奈地講道，雖然覺得宋千辰有啲囉嗦，但係心中都有一絲甜意

放喺枱上嘅手機震咗一震、螢幕一亮，宋千辰拎起手機，梁玥嘉見宋千辰打字，不禁眼定定咁望住宋千辰

「楊楠恩問我你好番啲未。」宋千辰見梁玥嘉望住佢便問道，順手將手機螢幕鎖上放番喺枱上

「哦⋯」梁玥嘉點點頭，心裏呷醋起嚟，但又唔可以呷醋得太出面，「佢唔直接問我嘅？」

「佢話怕阻到你休息，所以咪問我，而且佢知我放學會嚟睇你。」宋千辰講道



「哦⋯」梁玥嘉又點點頭，心裏不悅地道：「都唔知係唔係有私心先搵千辰⋯直接問我咪得囉！洗咩特登問千辰啫！」

梁玥嘉瞄咗宋千辰一眼，宋千辰拎住汽水飲，梁玥嘉因為知道咗楊楠恩私下同宋千辰有聯絡而唔開心，佢擔心嘅唔係宋千辰，而係楊楠恩

嗰日聽完李穎容講之後，心裏就總係有意無意地猜度楊楠恩嘅心思，楊楠恩每一個舉動喺梁玥嘉眼中都變得有預謀一樣，同宋千辰講句嘢都會令梁玥嘉起疑心

「我咁樣諗佢係唔係唔太好⋯？」梁玥嘉嘅心裏因為對楊楠恩起咗懷疑嘅心而覺得有啲內疚，「楠恩又唔似係啲咁嘅人⋯但如果楠恩真係中意千辰嘅話，咁會唔會就係佢淋我水⋯？」

梁玥嘉嘅內心難以壓抑對楊楠恩嘅懷疑，縱使佢知道佢唔應該咁樣諗楊楠恩，但佢嘅直覺再加上李穎容嘅說話，令佢都開始覺得怪怪的

「嘉嘉？」宋千辰見梁玥嘉放空，便伸手到梁玥嘉嘅面前上下晃一晃

「嗯？」梁玥嘉回過神嚟，見到宋千辰一臉疑惑咁望住佢



「冇胃口呀？呆晒咁嘅？」宋千辰關心道，「冇胃口就唔好架硬食啦⋯」

「冇事⋯」梁玥嘉微笑道，然後拎起匙羹又食咗啖粥，喺梁玥嘉微笑嘅背後，亦開始咗對楊楠恩嘅懷疑

⋯

「點呀？Miss Tam點講呀？」李穎容喺梁玥嘉一番到嚟課室便即刻捉住梁玥嘉問道

因為梁玥嘉番咗學，所以Miss Tam第一時間就係搵佢呢位當事人問清楚當日嘅詳情，但Miss Tam聽完梁玥嘉講之後都冇咩大進展，因為梁玥嘉睇唔到嗰個人係邊個

「Miss Tam話會同訓導組一齊處理。」梁玥嘉聳聳肩，「因為我真係完全睇唔到嗰個人係邊個。」

「唉～」李穎容嘆咗一口氣，「希望Miss Tam會搵到嗰個人啦～我諗嗰個at least一定會記一個警告。」

李穎容講到呢度，大家都靜咗落嚟冇人講嘢，張子萊見氣氛有啲尷尬便想拉開話題



「不如講下今日lunch想食咩呀～」張子萊笑問道，「我地又可以齊人食lunch啦嘛～」

「食嗰間台灣嘢呀～」梁玥嘉頓時提議道，食咗幾日粥都食到口淡淡咁

「食台灣嘢可以呀～」宋千辰和議，然後望向梁玥嘉，「但你唔可以食鹽酥雞，唔可以食煎炸嘢住。」

「呀⋯」梁玥嘉擺出一副不情願嘅樣，扁起嘴，「但我好番啦喎⋯」

「過多兩日先啦，食得清淡啲先啦～」宋千辰完全冇心軟嘅打算




IG Link: https://www.instagram.com/nd_cotttoncandy/?hl=zh-tw