［愛情純愛］由嗰一個Kiss開始，我地唔再係青梅竹馬: 129. 猜對了

李穎容呆坐喺張子萊嘅對面，張子萊完全冇察覺到李穎容正在發呆，只顧住自己睇手機； 李穎容抬眼望向張子萊，張子萊將手機打橫拎，睇嚟打緊機

「打緊咩呀？」李穎容先打破沉默

「食雞。」張子萊嘅視線望開咗手機0.1秒，然後注意力又落番喺手機螢幕上

「我都有挽。」李穎容順口地講道，「你今晚打唔打？」

「應該打？」張子萊放低手機



「點解係疑問句？」李穎容笑了笑問道，「今晚一唔一齊挽？」

「哦，好呀⋯」張子萊見到李穎容嘅笑容，不禁怔了一怔，感覺到心跳嘅速度改變，張子萊默默地撇開了臉

喺張子萊嘅心裏，早就忘記咗自己係喺邊一個瞬間開始中意眼前呢個女仔，只知道已經收起咗呢份感覺喺心中好一段日子

張子萊都唔知道佢中意李穎容啲咩，李穎容性格大大咧咧的，一啲都唔斯文，但偏偏李穎容呢種開朗呢種大大咧咧吸引到張子萊

「Yeah～食飯！」李穎容拎起筷子，毫不客氣地開動，張子萊望咗李穎容一眼，笑咗笑



⋯

「呼⋯」梁玥嘉放低手上嘅筆，伸咗一個大懶腰，「休息一陣先～」

溫咗一陣書，梁玥嘉決定休息一陣先再繼續溫書，直接離開座位灘到床上睇手機

「千辰做緊咩呢⋯？」梁玥嘉盯着手機嘅螢幕，一下子踢腿借力坐起身

梁玥嘉打開IG，習慣地一入到IG就先睇story



「咦？」本來一直快速㩒走story嘅梁玥嘉，忽然間睇到令佢睇番轉頭嘅一個story，「呢條手繩⋯」

梁玥嘉望向左上角嘅icon，係楊楠恩嘅IG icon

「點解千辰會同楠恩一齊⋯？」梁玥嘉嘅心中產生咗一個大大嘅問號，然後望一望手機顯示嘅時間，「都7點幾啦喎⋯千辰又出咗門口？」

雖然楊楠恩嘅IG story入面冇影到樣，但梁玥嘉憑楊楠恩影住嗰隻手手上戴住嘅嗰條手繩可以肯定，嗰個人一定係宋千辰，因為條手繩係佢織，佢冇可能認錯

梁玥嘉記得好清楚，今日放學之後係同宋千辰一齊走，但宜家宋千辰又出咗去，唔通宋千辰私下約咗楊楠恩？

「點解佢兩個會一齊⋯？」梁玥嘉開始獨自胡思亂想起嚟，「千辰約咗楠恩？定楠恩約咗千辰⋯？定係，佢地咁啱撞到⋯？」

一諗到佢兩個私下有約，梁玥嘉嘅心就煩躁鬱悶起嚟

「嘖⋯」梁玥嘉煩躁地嘖咗一聲，然後將手機放到一旁，坐番喺書枱前面繼續溫書



宋千辰同楊楠恩離開商場，楊楠恩心裏好高興，呢一刻發生緊嘅事就好似發緊夢一樣，佢冇諗過佢真係可以同宋千辰單獨一齊

「不如一齊食飯～你餓唔餓？」楊楠恩主動提議道，但見宋千辰面有難色時頓時又道，「如果你唔餓嘅話，可以再行一陣先去食飯。」

「唔啦。」宋千辰拎出手機，睇一睇時間，直接就拒絕咗楊楠恩嘅好意

宋千辰本來就係為咗出嚟買嘢，只不過係咁啱撞到楊楠恩，然後又因為覺得畢竟大家都係同學，所以冇拒絕佢提出一齊行嘅提議

「你係唔係怕玥嘉誤會？」楊楠恩直接問出佢心中想問好耐嘅問題，微微一笑問道

楊楠恩嘅提問令宋千辰頓一頓，以沉默代替佢嘅回答；楊楠恩眼見宋千辰選擇沉默，亦只好微微一笑，擺出一副善良嘅模樣

「定係你唔想同我一齊食飯⋯？」楊楠恩笑一笑問道



「嘉嘉冇咁小氣，只係我覺得我同你未熟到可以一齊食飯。」宋千辰毫不諱言，直接講道，令楊楠恩有啲愕然同時有啲受傷

「你中意玥嘉⋯？我冇估錯嘅話⋯」楊楠恩握緊了拳頭，問出呢個問題時，楊楠恩嘅心跳得好快，「你好在乎佢，比其他人、比穎容更加在乎佢⋯」

宋千辰將手機放入外套嘅衫袋中，雙手都插住喺衫袋入面，望住楊楠恩，宋千辰似乎察覺到楊楠恩嘅表現有啲奇怪

「你真係冇估錯。」宋千辰臉上掛上淡淡嘅笑容

楊楠恩嘅心頓時「咯噔」一聲，聽住宋千辰講出佢真係中意梁玥嘉，楊楠恩嘅心倍感難受，但到咗呢一刻，楊楠恩仍然強顏歡笑，努力地將嘴角撐起

「所以唔好對嘉嘉亂嚟。」唔等楊楠恩消化一切，宋千辰直接再拋出一句






IG Link: https://www.instagram.com/nd_cotttoncandy/?hl=zh-tw