［愛情純愛］由嗰一個Kiss開始，我地唔再係青梅竹馬: 140. 暖心

李穎容右手拎住筆，枱上放着教科書，但佢嘅注意力卻係落喺左手拎住嘅手機上

「咁考完試就梗係想去挽㗎啦～」李穎容拎起手機回覆道

「考埋今個星期咪完」同李穎容喺ig傾緊計嘅人回覆道

李穎容將手機微微打斜、靠着牆放喺書枱上，然後伸個懶腰；李穎容嘅雙手先啱啱提起，手機就下滑，李穎容頓時收手捉住手機

「嚇死我⋯」李穎容輕拍着心口，下意識瞄咗一眼手機螢幕，手機嘅螢幕轉咗做Face time嘅畫面



李穎容連忙拎好手機，想直接㩒左上角嘅交叉收線，喺佢嘅指尖要掂到交叉時⋯

對方接咗電話⋯！

「張子萊！你做咩接聽呀！」李穎容尷尬地朝張子萊嗌度

「係你打過嚟我先接⋯」張子萊無奈地望住手機螢幕

張子萊冇收線嘅打算，難得係李穎容「主動」打過嚟，佢更加唔會特登收線



「佢想收線嘅話就收線⋯」張子萊望住畫面中嘅李穎容心諗道，「佢應該會話收線⋯」

張子萊以為李穎容會講收線，但李穎容嘅心中卻冇呢個選項，佢冇打算要收線，但唔係逆來順受嘅感覺，反而係唔想咁快收線嘅感覺，想繼續傾電話

李穎容平日溫書都溫到凌晨兩、三點，而今晚⋯

一盞亮起暖光嘅枱燈，枱上放着一杯熱鮮奶，筆袋中嘅筆散落喺枱上，手上拎住原子筆⋯一切都看似同平日嘅晚上一樣，但今晚喺李穎容嘅心裏少咗一份孤軍作戰嘅感覺，多咗一份暖意

「張子萊都有專注認真嘅時候⋯」李穎容移開視線後喺心中默默地講道，喺再次抬眼望咗張子萊一眼之後，心中又細細聲地道：「都幾型呀⋯」



張子萊冇察覺到李穎容總係偷望佢，但每當張子萊抬頭望向放喺面前嘅手機時，張子萊嘅嘴角總會悄悄地上揚

⋯

坐喺極度寧靜嘅課室中考試，其實都算係一種壓力，聽到嘅係掀卷、㩒筆、時分針，什至係風聲，再加上嗰種考試無形嘅壓逼感，真係會令人不自覺地緊張起嚟

當然，對於準備充足嘅人嚟講，每一條題目嘅答案都好似自動浮現出嚟一樣，根本就冇咩好擔心

梁玥嘉拎住原子筆，抬頭望一望時間，感覺柔韌有餘，一啲都唔緊張

「嘻⋯時間充足！」梁玥嘉嘅嘴角稍微上揚，喺心中講道，一切都喺佢嘅掌握之中，「時間分配準確。」

梁玥嘉望清楚最後一道題目，提起筆，信心是地喺試卷上寫下題目嘅答案

「果然溫咗書係唔同啲～」宋千辰已經做到最後一題嘅part b，「寫答案嘅手感都唔同啲～」



答案直接喺腦海中浮現出嚟，宋千辰喺紙上快速地寫下一句又一句嘅答案，一切都格外順利

考試本來就唔止係有冇溫書嘅問題，仲係同時間嘅競賽，考驗你對於課本內容嘅熟悉、理解程度，理解得愈多，考試時就愈有利，更容易拎高分

「呼⋯」宋千辰寫下最後一句，然後放低筆，喺心裏鬆咗一口氣同時，佢抬起頭望鐘，「剩番3分鐘，仲有時間check卷～」

「Time’s up, pens down！」監考老師以一口流利英文講道

同學紛紛放低筆，熟練地將試卷掀番去第一頁，跟住監考老師嘅指示交卷

「呼⋯終於考晒～」梁玥嘉將卷傳試前嘅時候喺心中鬆一口氣講道

喺完晒所有嘢之後，佢地六個喺接待處等，打算一齊去食嘢慶祝考試完結



「食咩食咩！」對學習以外最感興趣嘅霍思傑率先問道

「今日係唔係應該食餐好㗎呢？」張子萊問道，下意識就望向李穎容

「當然！」李穎容察覺到張子萊嘅視線，望向張子萊時用力地點一點頭

「小心呀～」喺宋千辰嘅背後傳嚟校工叔叔嘅聲音

宋千辰、梁玥嘉同楊楠恩回頭望，見到校工叔叔推住放滿通告嘅手推車，三人都打算讓開，宋千辰微微側身，楊楠恩伸手想拉梁玥嘉一把，將梁玥嘉拉到自己身旁

但此時宋千辰眼見楊楠恩朝梁玥嘉伸手，用力一拉將梁玥嘉拉到自己身後

楊楠恩收回手，當佢抬眼望向梁玥嘉時，自然地留意到宋千辰，楊楠恩心中一顫，因為宋千辰一臉嚴肅地望咗佢一眼

「係唔係我錯覺⋯？佢望我嘅眼神⋯」楊楠恩心裏諗，「好似警告我咁⋯」



經過一番討論後，佢地決定食之前食過嗰間台灣嘢，終於踏出校門去食飯

「我地係唔係真係去BBQ呀？」大家先啱啱坐低，梁玥嘉便第一時間問道，「幾時去呀？」

「嚟緊兩日我地都放假唔係咩？」楊楠恩拎住餐牌時講道，「聽日嘅話就今日去買嘢？」

「睇你地想去BBQ定係去邊度挽囉～」微微靠着楊楠恩睇餐牌嘅李穎容講道，「唔去BBQ嘅話有咩提議？」

「去party room囉，觀塘有間人少少都可以包場。」坐喺隔離枱嘅張子萊講道，「4人包場，我地6個人。」




IG Link: https://www.instagram.com/nd_cotttoncandy/?hl=zh-tw