整個世界忽然間靜咗落嚟一樣,李穎容嘅雙耳突然間將所有嘅聲音隔絕,傳嚟嘅,只係佢「咚咚」、「咚咚」嘅心跳聲,心臟喺身體內跳動着嘅聲音傳嚟嘅迴響喺李穎容嘅腦海中迴盪着⋯

「點啫~你係唔係中意張子萊啫?」梁玥嘉追問道,用手示意,「少少都冇?」

「呀!唔知呀!」李穎容搖搖頭,揮揮手,想要撥走戀愛嘅粉紅色泡沫,「係掛!」

「真㗎!?」梁玥嘉一臉驚訝咁望住李穎容,「你真係中意張子萊呀?」

「唔知呀⋯就好似前幾晚咁,其實係我唔小心hi錯制先會用視訊打咗比佢,但係佢聽咗之後我又唔想收線⋯」李穎容紅着臉講道,「唔係好中意嘅,有啲囉⋯」



梁玥嘉驚訝到口都合唔埋,佢冇諗話李穎容真係中意咗張子萊

「宜家都係少少中意,都未去到話想同佢一齊嗰種⋯」李穎容鼓起兩泡腮、扁起嘴,「而且,我又唔太想拍拖⋯」

「但張子萊都唔似係Joshua嗰種人呀~」梁玥嘉講道,「張子萊至少都冇話同邊個女仔好close⋯有嘅~你囉!」

「唔知佢點諗⋯」李穎容聳肩,望住手機螢幕中嘅自己只覺得自己已經好耐都冇咁樣面紅心跳加速過

「喂喂!你記唔記得呢~之前聖誕節我地咪一齊去咗唱K嘅~」梁玥嘉靈機一動,諗起啲咩一樣,激動咁捉住李穎容,「我記得佢挽真心話大冒險嗰陣,佢話佢有中意嘅人㗎!」



「好似係。」李穎容努力地回想後講道

「但喺學校又唔見佢會同邊個女仔行得好埋⋯」梁玥嘉開始推理,講到半路佢便抬眼望向李穎容,「好似真係得你同佢行到咁埋⋯」

「佢真係中意我先算啦⋯」李穎容聳肩,雙手抱膝,「咁我都覺得佢同Joshua唔似⋯我嘅直覺話比我知,佢一定好過Joshua好多⋯」

「你地有冇講過啲咩內容係同愛情有關?」梁玥嘉好奇地問道,「例如有冇啲好曖昧嘅嘢?」

「冇咩喎⋯呢排我地一邊視訊一邊溫書咋都係,佢耷低頭溫書,我又耷低頭溫書,有時講下嘢囉~但都唔係啲咩曖昧嘢⋯」李穎容似乎都坦白起嚟,內心都係面對自己有啲中意張子萊嘅事實,「不過呀,我琴晚有問佢,如果佢同一個只係有少少中意佢嘅人一齊,咁佢會點,佢答我佢會努力令嗰個人中意佢多啲。」



「哦~」梁玥嘉嘅嘴角不禁上揚,「睇嚟你唔止係有啲~中意佢,仲係有啲~想同佢一齊喎~」

「邊有⋯」李穎容害羞地微微耷低頭,「我只承認佢係幾好,但真係未到好想一齊嘅地步⋯」

「唉~」梁玥嘉忽然嘆咗一口氣,「你未到好想同佢一齊嘅地步,但我好想同佢一齊⋯」

「咁你仲唔同佢講?都考完試啦~」李穎容笑一笑講道,「佢都係等緊你比答覆佢咋嘛~」

「其實打算講㗎啦,但未諗好點同佢講先好⋯」宜家到梁玥嘉苦惱起嚟,「其實佢知我中意佢,我亦同佢講好咗話考埋個試就比答覆佢⋯」

「哎呀哎呀~宜家到你煩啦梁玥嘉~」李穎容喺一旁幸災樂禍一樣笑道,「去party room嗰日同佢講囉~」

「當住咁多人面前講?講笑就有!」梁玥嘉淨係諗到都覺得尷尬,「或者嗰日夜晚同佢講⋯?」

「你下定決心同佢講未呀?」李穎容起身落床,坐到電腦椅上



「下定咗啦!本來之前就打算同佢講,但佢又要我諗清楚⋯」梁玥嘉嘅手放喺書枱上托住下巴,「咁我又講咗話考完試比答覆佢,我都唔想拖咁耐~」

李穎容忽然拎起放咗喺枱上嘅手機,嘴角偷偷地揚起;梁玥嘉坐喺一旁安靜地望住李穎容

「咩、咩呀⋯!」李穎容放低電話後抬頭望向梁玥嘉,卻見到梁玥嘉早就望住佢

「唔洗覆咗人先呀?」梁玥嘉剛才偷瞄到係張子萊搵佢

「陣間先覆都唔緊要⋯」李穎容臉帶羞澀地講道

「係呢,你覺得張子萊係個點嘅人?」梁玥嘉出於好奇心問道

「唔⋯」李穎容見梁玥嘉認真一問,佢都不禁認真地諗,「張子萊係個點嘅人呀⋯」



李穎容認真地諗,腦海中慢慢地浮現出張子萊嘅身影,心裏莫名其妙地覺得有啲踏實

「仲唔行企喺度做咩?未比人踩夠?」

「你明知唔夠佢打就走啦⋯」

「每一次,都係比佢護喺身後⋯」李穎容喺心裏講道,本來已經平靜落嚟嘅海面又一次掀起海浪

「好耐都冇見過穎容咁苦惱~」梁玥嘉嘅內心偷笑起嚟,「唉~穎容嘅桃花嚟啦~」

「張子萊佢⋯」李穎容緩緩開口,「企喺佢身後嗰陣,覺得好有安全感⋯同佢一齊嗰陣,就算dead air都唔覺得尷尬,相處起嚟都覺得好舒服,可能因為已經識咗一段時間掛⋯嗰晚視訊嘅時候,就算大家各自溫書,但唔知點解都覺得好開心⋯」

李穎容一邊講,心動嘅感覺愈嚟愈強烈;李穎容一抬頭,就見到梁玥嘉偷笑

「好耐都冇見你咁心動咁樣~」梁玥嘉盤腿坐好,攬實攬枕,「好新鮮~」



「咩呀⋯」李穎容無奈地撇開臉,佢嘅臉頰紅紅的




IG Link: https://www.instagram.com/nd_cotttoncandy/?hl=zh-tw