宋千辰今日兩手空空,手插喺外套嘅衫袋中

「出去食個飯咋嘛⋯」宋千辰打量一下自己,然後又將梁玥嘉上下打量一番,「有袋銀包、鎖匙同電話咪得。」

除咗呢三樣好重要嘅嘢之外,宋千辰仲袋咗另一樣嘢喺外套嘅右邊衫袋

「行啦~去食飯~」梁玥嘉露出與平日無異嘅笑容

兩人沿去平日食開嘅餐廳嘅路上,梁玥嘉一直都冇出聲,偶爾察覺到宋千辰望住佢,便露出笑容望向宋千辰



「睇下食咩先~」梁玥嘉啱啱坐低便拎起放喺一旁嘅餐牌

宋千辰將餐牌拎到自己面前,抬眼望咗梁玥嘉一眼

「你諗好未呀?我Okay啦~」梁玥嘉抬頭望向宋千辰講道

「嗯⋯」宋千辰點一點頭,「你食咩呀?」

「呢個!」梁玥嘉指住牛肉丼講道



宋千辰將一個阿姨叫咗過嚟落單,梁玥嘉笑住講一聲啱該,順手地將枱上嘅兩杯水放到埋邊

「做咩呀?」梁玥嘉察覺到宋千辰一直望住佢,「做咩望住我?覺得我今日特別靚?」

「覺得你今日特別假。」宋千辰直視梁玥嘉,毫不猶疑地直接講道,梁玥嘉瞬間一怔,微微耷低頭,「嘉嘉,你都太睇少我對你嘅了解啦掛⋯」

梁玥嘉當然知道宋千辰呢番說話係咩意思,只好心虛地移開視線,微微鼓起兩泡腮

「明明有心事,就唔好扮冇事啦⋯」宋千辰嘅語氣中夾雜咗少許怒氣,「你喺我面前都要咁樣咩⋯」



「其實冇咩特別唔開心,只係⋯」梁玥嘉微微耷低頭,搭喺大髀上嘅雙手因為無處安放而輕輕扣着,「只係一諗到就會覺得有啲⋯唔自在⋯」

「你有冇打算話比Miss Tam知⋯?」宋千辰問道,梁玥嘉聽到後愕然地瞪大眼

「唔知⋯」梁玥嘉嘅雙眸垂下,微微搖頭,「但我諗,我唔會⋯」

宋千辰嘅眉頭輕輕一皺,本來想再追問落去,想知道梁玥嘉唔告發楊楠恩嘅原因,但眼見梁玥嘉已經好苦惱,佢亦唔想再為佢增添煩惱

梁玥嘉安靜地食飯,佢嘅表情都比宋千辰睇喺眼內

「嘉嘉似乎係睇在楊楠恩係佢朋友嘅份上,所以唔打算告發佢⋯」宋千辰喺心中諗道,「嘉嘉就係太好人,又冇戒心,所以先會係咁⋯」

宋千辰望咗梁玥嘉一眼,梁玥嘉食飯同時又諗緊其他事,心不在焉

「唔好再諗佢嘅事。」宋千辰忍唔住開口講咗句,梁玥嘉嘅目光緩緩地落到宋千辰嘅身上,「已經發生咗,冇得番轉頭。」



梁玥嘉諗咗一諗,然後微微一笑,今次嘅笑容唔係強顏歡笑

「嗯⋯!」梁玥嘉似乎諗通咗啲咩一樣,微笑着點頭,「快啲食飯,我地陣間食完飯去買雪糕食呀~」

「好呀!」宋千辰見梁玥嘉終於笑番,當然要滿足一下梁玥嘉嘅要求

食完晚飯,兩人行出餐廳,朝住7仔行去,要食飯後甜品;食雪糕似乎成為咗兩人嘅一齊嘅時候嘅習慣,拎住雪糕行到番去屋企樓下,坐喺闊闊嘅行上路上嘅長櫈食住雪糕,都係一種幸福

梁玥嘉行喺宋千辰前面,自然會比宋千辰先坐低,宋千辰嘅右手一直插住喺衫袋中,因為唔可以比梁玥嘉睇到佢衫袋入面嘅嘢

「你坐呢邊啦。」宋千辰見到梁玥嘉打算坐低嘅時候開口講道,因為如果梁玥嘉照住低,咁宋千辰就會坐喺梁玥嘉嘅左邊,梁玥嘉就有機會睇到喺宋千辰右邊衫袋中嘅嘢

「吓?哦⋯」梁玥嘉冇特別疑惑,默默地坐去右邊,「我坐邊一邊一有分別咩?」



「風喺右邊吹嚟。」宋千辰坐低後淡淡然地講道,梁玥嘉聽到後甜甜一笑

梁玥嘉將甜筒遞比宋千辰,宋千辰左手拎住甜筒,右手插喺衫袋中握住禮物盒

「今日一定要比到佢⋯!」宋千辰喺心中講道 ,「但幾時比佢好⋯?陣間食完雪糕比佢?定宜家?要點比佢⋯?同佢講買咗嘢比佢⋯?」

本來心情一直都係波平如鏡一樣嘅宋千辰,嚟到呢一刻時心情卻有啲緊張,眼尾嘅餘光一直都默默地留意住梁玥嘉

「千辰⋯」梁玥嘉忽然間叫咗宋千辰一聲,宋千辰不禁捉緊咗禮物盒一下,然後望向梁玥嘉,「原來楠恩一直都中意你,你聽到佢咁講嘅時候,有冇覺得好愕然⋯?」

「冇。」宋千辰果斷地回答,梁玥嘉抬眼望向宋千辰,「我唔在乎佢中唔中意我,我淨係在乎你。」

梁玥嘉愕一愕然,隨即低頭甜甜一笑,宋千辰如此直白地表達在乎一個人嘅方式,令梁玥嘉嘅心中有一份安全感

「你呀⋯下下都咁直接嘅~」梁玥嘉笑着講道,喺帶着笑容嘅臉上,泛起淡淡嘅紅霞



「事實冇必要隱瞞。」宋千辰投向梁玥嘉嘅目光真摯,「亦冇講大話嘅必要。」

拎住禮物盒嘅手喺衫袋中蠢蠢欲動,搵緊時機拎出嚟嘅同時又諗緊宜家直接拎出嚟好唔好




IG Link: https://www.instagram.com/nd_cotttoncandy/?hl=zh-tw