那些年，我等待的那個男孩子: 4

轉眼間，我升小四了，好期待四年級會同D咩同學一齊上堂，然後，佢嘅出現，令我個心跳得好快，原來…佢同我同班
 
「Hi，今年我同妳同班喎」
 
「你好呀…」
 
係小學期間嘅我，係經常俾男仔蝦嘅對象，因為D男仔蝦女仔嘅原因只有一個，想吸引果個女仔嘅注意，因為佢地正正係鍾意果個女仔先會蝦佢，而小學時期蝦我蝦得最多果個就係佢，程逸風。
 
「微波爐!!!」
 




「做咩呀!!!」
 
「冇呀!!!今日未掹妳條辮，快D過黎!!!」
 
「唔俾你掹呀!!!一陣搞到我冇頭髮咁點呀!!!」
 
「咁我自己黎掹啦!!!」
 
每日我同佢係小息都上演呢套鬧劇，而佢因為經常蝦我而俾老師寫手冊。不過對佢完全冇效果。佢總係要笑下我平胸，掹下我條辮先安樂，所以有一次我向佢反擊，我聯同幾個女仔一齊捉住佢，再搵羽毛球拍打佢，當我一手拍落去時，佢舉起左手一擋，就出現左”啪”一聲。佢雙眼望實佢左手上嘅錶，而我都知道自己可能闖左大禍，我將佢隻錶整爛左。
 




「對…對唔住呀…」
 
佢一聲不發，紅哂眼咁除左隻錶走左返自己個位到，果日之後，佢就冇同過我講野，亦冇黎整估過我。果幾個月，阿風精神變得好差
 
「好悶呀…阿May呀，點解最近好似冇咩笑聲咁嘅?」
 
我當時嘅英文名係阿May，因為果一年，阿風係台上以一首黎明嘅”夏日傾情”吸引左唔少女同學嘅注意，當時傻傻地嘅我，為左襯返佢，而將英文名改做阿May。雖然佢成績冇咁好，又極為好動，但佢都吸引到唔少女同學，係我果班之中，以我所知，有兩個女仔係鍾意阿風
 
「可能佢地玩厭左啦掛，成日黎整估我地幾個」
 




「咪係囉…四年級嘅女仔平胸有咩出奇喎!!」呢個係Ada，佢係其中一個鍾意阿風嘅女仔，有時當阿風黎蝦我果陣，Ada會挺身而出黎保護我，實際上，佢想同阿風多少少互動者
 
「一陣上數學堂，又要悶一陣啦」
 
「悶完咪放學囉，不過妳返屋企都係溫書做功課架啦」
 
「難得個妹瞓左覺，當然係做功課溫書好時機啦」
 
「不過妳唔睇電視架咩?」
 
「唔睇架…溫完書我就睇小說架啦」
 
「林雪凝妳真係一個書蟲黎架」
 
“鈴鈴鈴鈴鈴……..”小息完嘅鐘響起，大家都返入課室，上數學堂




 
大約去到一半左右，校長同班主任衝左入課室