那些年，我等待的那個男孩子: 39

第一日去銅鑼灣補習，我都係著返長褲加t shirt算數，反正係補習，而唔係去相睇
 
我地三個拎左Notes就坐低聽下補習班天王講下書，都有d用嘅，主要教大家考試策略之類，不過佢點勁，都唔夠教英文嘅Miss孔咁勁， Miss孔係高聲叫同學出去拎試卷，仲要讀埋妳個分，如果低過80分，佢會一手扔走妳份卷，大家會受到二次傷害
 
但係現場好多男仔就係真嘅，咁我終於明白佢地兩個黎補習嘅原因啦，又係為左識男仔。好彩我早就估到，所以我先著到成個村姑咁樣
 
「Jessie妳做咩又成個村姑咁呀?」
 
「我唔似村姑，點解襯托到妳地兩個靚女呀」
 




「所以話，妳不愧為全級第一」
 
「係我了解妳地者」
 
「咁識唔到男仔嘅話，我地又可以自己補習，一舉兩得」
 
我係第一次去補習社，跟住佢地兩個坐低，先發現原來一個課室係坐好多好多人
 
我好專心咁聽補習天王解釋試卷，冇咩特別，相對Miss孔黎講，佢d技巧只係小兒科，不過俾左錢，就繼續上埋個暑期班佢啦
 




當落堂之時，我就發現全部人都係一次過好快咁走
 
「嘩…趕時間?」
 
「Jessie，而家12點，大家都趕住去行街食飯啦」
 
「原來補習社就係咁樣，大開眼界」
 
我地三個一齊行街，坐低再傾返頭先補習嘅事
 




「補習天王都冇恐怖雞咁勁」
 
「人地要佢考試技巧者」
 
「不過佢D技巧好普通，咁都做到天王?咁恐怖雞出黎補習會點呢?」
 
「佢呀?我怕佢俾人告添呀，係咁鬧人」
 
「不過呢…妳地兩個有冇睇中男仔呀?」
 
「已經有人睇中Joanne啦，睇黎下堂會坐我地附近添喎」
 
「哦~~果幾個男仔呀?佢地似想將我地三個打包添啦」
 
「點會睇中我呀?我今日已經好普通村姑Look」




 
「不如下堂Jessie妳打扮下啦，可能有男仔識妳呢」
 
「唔洗呀?」
 
「試下無壞嘅，莫非妳真係非佢不嫁?」
 
「係喎!!識妳咁耐，我一直唔知Jessie妳鍾意邊個男仔喎」
 
「邊…邊有呀?」
 
「哦~Joanne妳有冇聽過Jessie呢個模範生，F.1第一日返學就槓上恐怖雞?」
 
「我聽過呀，佢仲想即場除校章添」
 




「佢呢..就係為左佢筆袋果隻公仔，係佢初戀情人送俾佢嘅」
 
「嘩…初戀情人呀?」
 
我面紅紅咁低頭，完全唔敢直望佢地視線
 
「邊…邊係初戀喎…我同佢都冇開始過」
 
「只係妳自己暗戀人地者」
 
「咁其實Jessie妳有冇送過野俾佢架?」
 
「我呀…我送過枝筆俾佢」
 
「點解送筆呀?」




 
「嗯…因為我覺得枝筆好襯佢，當年佢有隻錶好似好舊咁，我咪聖誕節送左枝筆俾佢囉」
 
「初戀呀~~我要初戀呀」Ivana又係到嚎叫
 
「Jessie妳真係好浪漫呀!!!」
 
「又唔係咩名牌子….Parker墨水筆之嘛…」
 
「總好過送Pilot呀?」
 
返到屋企攤係床上，望一望隻公仔
 
你而家係到做緊咩呢……仲記得我嘛?