那些年，我等待的那個男孩子: 44

當日佢扎起左條馬尾，著起套藍色嘅籃球衫，背後佢專用嘅號碼15號上仍然印有佢個名「Jasmine」，而號碼下就印有細細嘅「Anthony」
 
Jasmine坐係到望住一堆男仔打波，而佢就係到自己飲野，塊面打波打到紅哂嘅佢，頸上搭左條毛巾，佢乖乖地係到抹汗。Jasmine真係同Miss孔個樣一樣咁滯，臉尖尖配上長髮，話佢係校花真係冇講錯，當時我地學校兩大校花，F.4A有Joanne，F.1A就有Jasmine，可想而知當年Miss孔係有幾靚女。
 
而Jasmine果陣身邊坐左一個男仔，佢背後印住18號，Jasmine雙手撓實佢，又同自己條毛巾幫佢抹汗，之後將個頭挨向個男仔膊頭，果個應該係佢男朋友啦，果個男仔背影好眼熟，好似我小學一個同學，然後個男仔起身去左洗手間，而Jasmine都發現我存在。
 
「Jessie姐姐?妳拍緊拖呀?」
 
「我…我唔係呀，呢個…補習社d朋友黎咋」
 


「妳都要補習?補咩科?」
 
對住教自己英文個老師嘅女講自己補英文，有d唔係太自在
 
「英…英文…」
 
「英文?姐姐妳覺得我媽咪教得唔好咩?妳次次都係最後一個先俾佢叫去拎卷架喎」
 
「因為…Joanne叫埋我陪佢者…但係暑假之後我唔補架啦…所以…」
 


「得啦，我幫妳守秘密，唔會同媽咪講嘅」
 
「唔該哂…妳頭先身邊果個…係妳男朋友?」
 
「可以話係嘅，妳想見佢?」
 
突然間Jasmine警戒心好似提升左好多咁，好明顯佢唔想我見到佢男朋友
 
「唔係啦，我路過咋，唔…開學見啦，拜拜」
 


當我轉身之後，就聽到佢男朋友叫佢
 
「詩敏，今晚妳去我到瞓呀?」 「係呀!!媽咪俾我去你到啦」
 
原來Jasmine 升F.2，Miss孔已經批准佢去男朋友到過夜，睇黎Jasmine個男朋友一定係一個好男仔，如果唔係Miss孔唔會俾佢心肝寶貝同男仔拍拖
 
我轉一轉身望Jasmine男朋友果一刻，佢已經同時轉身，佢男朋友件衫係印左18號，Anthony。而我心中果個男仔生日日期，都係18號，我同佢生日日子相差5日
 
「頭先果個係妳同學?」
 
「嗯，訓導主任個獨生女」
 
「佢幾可愛喎，好少女仔會同男仔一齊打波」
 
「我聽人講，佢跟佢契哥開始學打波，所以佢會同一大班男仔去玩」


 
「睇黎佢打波好叻啦，我就咁睇佢拍波果幾下，已經知佢基本功好扎實」
 
「Jasmine佢讀書同打波都好叻架，我有時都幾羨慕佢」
 
「羨慕佢?」
 
「係呀，佢又靚女、打波又叻、讀書又叻、又好多人錫佢」
 
「佢係學校好歡迎?」
 
「總會有TB想追佢，又有TBG鍾意佢嘅」
 
「咁妳都應該會有人鍾意啦」
 


「呀…之前有TB追過嘅…不過我鍾意男仔…」