那些年，我等待的那個男孩子: 55

「Jessie妳坐低」Miss孔果日嘅殺氣都唔少
 
「知道…」
 
「妳最近係咪瞓得好差，壓力好大」
 
「Miss孔…妳點會知道…」
 
之後Miss孔將一樣野放係檯面俾我睇，我認得……
 




「呢樽安眠藥，有人見到妳係藥房買，係唔係?」
 
「係…係…」
 
「呢隻藥需要醫生紙先買到，而醫生紙…妳應該好容易就拎到，妳每次唔舒服，幫妳開病假紙嘅都係林醫生，但我相信林醫生唔會輕易寫俾妳買安眠藥，佢一定會搵到其他更安全嘅藥物俾佢最錫嘅囡囡，而妳手上有妳爸爸嘅醫生紙，咁即係只有一個可能性…」
 
「係…係…」果時我已經震緊
 
「Jessie我希望妳可以坦白同我講，妳肯乖乖地坦白嘅話，我可以唔同林醫生講，我連Karen都唔會話佢知佢自己最崇拜嘅家姐會做出咁嘅事」
 




「知…知道…」
 
「妳手上果張醫生紙，係咪妳自己係診所偽造出黎」平時Miss孔嘅殺氣非常大，但係今日就完全冇哂果種殺氣，相反，我感受到佢舊年攬實Jasmine嘅氣息
 
「係…Miss孔…呢張醫生紙…係我係ba b診所返工果時…自己偷偷上網查藥名再用電腦打出黎，然後…然後…冒簽ba b個簡簽再自己吸醫生印…」
 
我講完後已經好似Jasmine咁雙手悟面咁喊
 
「Jessie，我對妳好失望，點解妳要做呢d野出黎」
 




「對…對唔住……」
 
「當年妳可以為左隻公仔而頂撞我，點解妳而家冇勇氣去面對問題?」
 
「係…」
 
「呢樽藥…妳知唔知係邊個俾我?」
 
「係….程逸風?」
 
「冇錯，個DB仔黎搵妳果日，程逸風兩個同學黎搵我，就係話我知佢要用安眠藥瞓覺，連逸怡同詩敏都阻唔到佢，所以佢D同學先黎搵我，我亦都追殺左佢好耐都搵佢唔到」
 
「係…」
 
「我估唔到連身為我地學校模範生嘅妳都要靠安眠藥瞓覺，妳兩個真係天生一對」




 
「Miss孔…我同佢…其實…」
 
「妳地後生仔女嘅事我明我亦都知，我都知妳地讀書會辛苦，但我唔希望妳地要用安眠藥呢d危險方法去放鬆自己」
 
「係…知道…」
 
「阿風為左妳，佢上星期六自己將呢樽藥拎去我屋企，連同佢自己果d藥，佢俾我同我先生鬧左好耐，而家我屋企總共有差唔多5樽安眠藥係到」
 
「5…5樽?」
 
「妳呢樽未開，連同阿風開左果d，總共5樽，佢食安眠藥止痛藥多過妳」
 
「係…」
 




「呢件事我當冇發生過，將果張醫生紙交出黎」
 
「係…」我將果張假醫生交出去之後，Miss孔就係我面前碎左佢
 
「妳所做嘅事，我當唔知，妳有咩想問?」
 
「阿風佢…而家點呀…我差唔多5年冇見佢」
 
「佢幾好，F.3轉校後開始努力讀書，原因我唔方便講，不過佢比妳辛苦好多倍」
 
「係…」
 
「同埋佢仲認得妳，仲記得妳，如果唔係，佢就唔會由藥房一直跟到妳去海邊」
 
「咁…佢而家係邊?我想見下佢」




 
「妳知佢讀樂善堂，妳亦都見過佢踢波打波，其實佢都見到妳，只不過佢唔想，應該係話佢仲係覺得自己同小學對妳講最後果句說話一樣，襯唔起妳，所以佢唔黎搵妳」
 
「點解…」
 
「妳地年輕人嘅事，妳地小心處理，我唔會偏幫詩敏，我希望妳地知道，咩先係最重要，有冇問題?」
 
「係…我知道..」
 
「有咩事，妳想見佢嘅話妳可以黎搵我，不過要等會考後先再算，知唔知?」
 
「知道…」
 
「Jessie妳唔好再行差踏錯啦，知道未?」
 




「係…我知道」
 
「呢到有份英文Past paper，卷一卷二，做完聽日英文堂交俾我啦」
 
「係…」最後我咪又係俾佢罰…
 
當我行出訓導處時，就見到Jasmine撓埋雙手係到等我，我行過佢身邊時，佢同我講多次
 
「Jessie姐姐，妳唔好再咁樣，如果咁樣我先贏到妳嘅話，我會贏得唔開心」
 
「嗯…幫我多謝佢…」
 
自此之後，我每次溫書都會放筒糖係到，果然食糖係比食安眠藥好得多，除左令我重左幾磅之外…