我要逃出無人島沙洲！: 第六章 游到上岸嗎

如事者，我地向住左邊島嶼嘅方向慢慢咁游。

游咗三分之一，我同福仔已經攰攰地，不時浮上水面小休，Tany都夠兄弟，冇抱怨過一句。5人小隊前進緩慢，但整體狀況仲算良好，未有人頂唔順或者抽筋，或者多得Tany嘅鼓勵同埋米通嘅唱歌聲，我地笑住咁游過一半路程。

離上岸最後1.5公里，先係難關嘅開始。首先，我隻右鞋唔知幾時甩左，上岸都唔知點算。然後，學霸副千度近視眼鏡沉左，睇野好矇。其次，越近上岸，海面開始出現小量垃圾，米通唔小心俾浮起嘅鐵罐頭刮傷手臂，好彩只係流少少血。最大鑊係福仔，已經竭到冇乜力，今次我地停左10分鐘，福仔都未重新開始游。

福仔喘住氣:「我開始唔掂…對唔住，要你地等咁耐。」惟一冇出事嘅Tany依然體力充沛，仲自告奮勇:「我仲ok，不如你扶住我，我出力拖住你游啦！」福仔當然感激不盡，仿彿見到希望嘅曙光。

我地總算有驚無險游到岸邊，見到陸上有條靚靚嘅石屎路圍住海邊。正當我地觀察緊邊個位有得上岸，Tany指住較遠處嘅一個石灘，話嗰個可以爬上海濱個位。如是者我地沿島邊游到去個石灘，的確係可以爬上去，但啲石頭好尖同埋粗糙。冇鞋嘅嘅我就咁爬上去，隻腳唔爛都算損。





學霸:「阿文呢邊，搵個人爬左上去，再掉隻鞋落嚟借比佢就解決。但係我睇唔清楚，邊個可以指導我爬上去？」

Tany:「我玩開攀爬，我可以話俾你聽所有安全嘅落點。我攀先，我踏一步，學霸你跟住踏一步，我相信咁樣就爬到上去。」

喺Tany嘅帶領下，佢地兩個人動作幾乎一致。轉眼間，一隻來自Tany嘅波鞋已經dum咗落嚟，到我爬喇。逐舊逐舊石頭咁上，原來冇想像中咁難，輕鬆就上到去。福仔同米通都冇咩問題，全員成功上岸！

直至現時為止，我地仲未確定身處嘅位置係邊，因為我地冇人查過屯門背面有乜野，直至我係岸上面嘅欄杆執到本旅遊書……