「輕粵文小說」《新世代魔法界異聞錄》: 新秩序第三章 訓練一個星期之後

啱啱好又完成咗一次嘅訓練，成手都係植物精油嘅陳艾迪好仔細咁樣處理被稱為魔法精油嘅物品，今日佢哋所進行製作嘅係基礎守護油，用嚟抵禦最普通嘅黑魔法，例如基礎詛咒，同時亦都加強自己嘅能量護盾，鞏固左上幾堂所學嘅能量護盾建成。

「仲喺度執緊野啊，艾迪！」路過嘅馬先生見到着住西裝，但因為要留低進行預習最後先執拾所有借返嚟嘅用具而搞到成身汗嘅艾迪，不禁為咗佢嘅努力而感到驚訝。

係馬先生嘅角度，通常會用魔法嘅人唔係因為家族世襲，就係因為別有目的所以先至會學呢樣嘢，但係佢從一個星期前到而家所見到嘅艾迪，佢好似一啲別有用心都冇，但同時佢就好努力咁樣學習嘅情況。馬先生對此感到奇怪就問咗佢一句：「其實你點解要咁博命去學呢一樣野，先唔講你有第三眼嘅先天優勢，要學識點樣使用魔法係一樣好難嘅事，作為一份工作你並冇必要咁努力去做咁多嘅預習！」

艾迪照直咁樣答咗佢話：「其實冇話咩嘅，只不過好似警察用槍咁樣，如果係用嚟保護人嘅話，我都想學點樣用槍啦！依家係我面前嘅魔法，或者好似你前幾日講嘅白魔法，可以用來守護人之餘亦都可以帶嚟一啲好運咁點解唔學呢？」

見到如此單純嘅艾迪，馬先生笑咗一下，因為佢已經好耐冇見過魔法部有淨係學白魔法而冇學黑魔法嘅人，佢嘅初心係如此簡單，毫無任何雜質。可能魔法部正係需要依種人，但佢都突然之間諗咗一個致命嘅問題，佢諗現實始終都係要問呢一個問題，呢一個導致所有人都要學黑魔法嘅問題。





「咁我問你啦！如果要守護一個人但係同時要殺一個人嘅話，你會點樣揀？嗱！先講明，無論你點樣揀都要死一個！」馬先生問咗呢一個問題，令到只學左一小部份白魔法嘅艾迪都諗咗一段時間就話：「你俾少少時間我諗呀！可能學多幾堂我就會比到答案你呢！」

睇來呢個問題始終都係難到艾迪，馬先生始終都係面色一沉就話：「好！咁我等你答案！」

將所有自己今日所學到嘅嘢同埋所使用嘅架撐搬返去自己嘅工作枱上面。艾迪已經用咗成個朝頭早嘅時間去進行學習同埋預習，而家已經去到中午嘅食飯時間，見到人哋成雙成對有着拍檔嘅同事，艾迪好好奇自己身邊嘅同事會係邊個，但佢並冇多想，只希望自己嘅同事係可以幫到自己回答更多問題或者傳授自己更多白魔法知識嘅一個人。

當佢正打算出去食個午餐嘅時候，路過辦公處準備返返去地面嘅入口嘅時候，辦公處嘅電梯嗰邊傳來好大聲嘅斥罵聲。

「Excuse me！我非常之唔明白點解英國本部要調返我過嚟呢邊囉，又話自己嘅土地有啲咩危險！點知又要翻返嚟呢種窮酸地方！」一個睇落去非常年輕嘅男人但係就好大聲亦都好粗魯咁樣鬧辦公處嘅女同事，艾迪雖然聽唔明前面半句嘅嘢，但係心諗呢條友仔咩料啊，仲以為學魔法嘅人都係好心平氣靜嘅添，但佢都唔理啦因為佢始終都係相信着自己同事能夠處理呢件事，就掂行掂過咁樣準備搭電梯上返去。





「我先至唔會同呢啲低級嘅魔法師一齊工作囉！」個男人指住準備離開嘅艾迪，艾迪都非常之唔好意思咁樣行咗上前話：「有咩事你大可以同我哋呢邊魔法部嘅主管艾當家講，唔好煩住我哋嘅女同事好冇？」艾迪心知自己應該鬥唔過呢位後生仔希望勸退到佢啦。

單憑佢嘅第三眼就知道佢背後嘅靈體嘅能量有幾大，並且係血色嘅能量，應該係佢召喚嘅惡魔。而且就佢所知應該冇邊幾個如果真係同佢鬥起嚟應該可以鬥得贏。

「Who are you？你邊位呀？夠膽命令本當家？」點知個後生仔好似越講越燥，嗰幾位女同事都話：「唔好同佢坳啦，佢係單氏世家嘅大當家，而且仲係本部⋯⋯」

「聽到啦掛！我係單氏當家嚟㗎，再嘈我一下子摧毁你哋個聖壇都得啊！」只係一下能量嘅衝擊波就令到幾位新到接待處做嘅女同事暈低咗唞唔到氣。

「你！」呢一下正式撻着左艾迪團火。「做咩啊？夠膽咪隻揪囉！」似乎兩人準備開始進行法門。





「咁我唔客氣嫁啦喎⋯⋯」只係一下子⋯⋯