七月十九日 星期三  陰 
第四日
我唔知點開始好,太多信息。

李俊豪好慘。佢講咗好多嘢畀我知。原來佢一早知道自己會有一個大劫,當日師傅就係提佢,但佢都係照幫,仲話會相信余永樂,佢曾經救過佢,佢一定要報恩。好蠢,但我好欣賞,佢真係好好,好到我好內疚。我發現自己會下意識利用佢嚟激余永樂,好好玩,同埋真係睇到個效果。

李俊豪好單純,所以我講到自己好慘(雖然有啲係真),佢話會幫手勸佢唔好諗咁多。佢望住我嘅眼神好真誠,佢真係着緊余永樂,但我知道佢都好擔心自己。佢哋有嘢瞞住我。

我變到好恐佈。對唔住,我真係希望李俊豪唔會有事。

我感覺到,趙家寶同我嘅connection弱咗好多。我開始返嚟,但都慢慢sense唔到佢做緊啲乜,記唔起佢哋嘅嘢,對余永樂果種反感開始滲出嚟。





玩呢個game嘅人,先應該落地獄,求神拜佛都冇用,一定會有報應!

我見到佢無啦啦打人,畫面一瞬而過,佢真係癲咗,我唔敢想像之後會點。其實,我有啲期待。

李俊豪留意到我發呆,問我有冇事,佢比我想像中更sensitive,非常sensitive。

有時會聽到婆婆叫我。每一次佢搖個鈴鐺,我就好似喺佢隔離咁。

個伯爵茶奶凍同埋American cheesecake好好食,souffle pancake都係,余永樂呢啲咁自我封閉同自我中心嘅人係永遠都唔會明。佢見到我哋咁close個樣真係好好笑,仲發脾氣,好似想同李俊豪開拖咁,我忍唔住反駁佢,順便導下佢。





李俊豪值得一個更好嘅朋友。

佢好似覺得操控哂我嘅生死,我會好驚佢。都唔錯得哂嘅,但我已經冇一開始咁驚。我直覺覺得所有嘢都喺正軌,同埋自從噚日,我好feel free,已經唔太care,但我唔sure係咪因為我對自己有信心所以先咁。同埋我知道我咁樣對佢,佢反而會care我多啲。

佢好似畀我動搖到,好期待粒種子會點發芽。

人心真係好神奇,只要一個細微嘅動作,無意中講嘅一句嘢,都會造成意想不到嘅影響。
尤其是佢呢種人。





佢已經冇能力照顧婆婆,亦都冇資格。

等我聽日玩下先。