🏫 👩🏼‍❤仲講中學生「應否」拍拖？不如講下「如何」拍拖啦！🏫 【校園】【愛情】【鬥智】: Issac的小學回憶(四)

兩日後的星期一，Grace喺小息時搵我：Hi，你知我係邊個嗎？

似乎佢已經睇到email，我心諗呢句應該由我問你至啱。

我：點會唔記得你呢，前日比賽呀嘛~
(禮貌回應)

跟住我地傾好多野去嘗試了解對方，例如興趣、學業情況。後來又經常一個星期裡面傾兩次電話，嗰陣時大家好鍾意喺電話度問功課。

相識耐咗知道原來Grace都鍾意打機同埋睇動漫，但佢同我一樣唔會因為沉迷而攪到荒廢學業，再加上佢都聰明，所以唔怪之得佢仲讀到尖子班。



至於啊靜，人如其名，自從夾team比賽完咗之後就大家冇再有任何來往，猶如陌生人，佢都完全冇吸引力俾我。

經過小五final exam，我發現原來佢唔單止有藝術細胞，連數學頭腦都有。數學分數同我一樣，令我刮目相看。聽講一個打機勁嘅人數學唔會差得去邊，因為兩樣野都好講你頭腦智力。記得嗰時啱啱考完，我就推介佢玩忍豆風雲，我地一邊煲電話，一邊玩：

Grace：我開左房，我個忍豆名係 小泉

我：入左喇，我叫 小鼬

我同佢一齊玩拯救公主對戰(2 vs 2)，同Grace仲要同一team，我帶忍太刀，而佢就用貓爪。我用「錢鏢」殺死對面一個，結果對面比我地兩個恰一個，咁就打羸左。(其實明明係我一個殺兩個，然後佢淨係負責救公主)



我：點解我地個名咁啱嘅？
(我忍唔住笑)

Grace：唔明

我：你有冇睇火影架？

Grace：有，但唔多睇



我：你知唔知宇智波鼬嘅女朋友就係宇智波泉？

Grace：真架？
(佢嘅語氣少少surprise)

我地就咁樣渡過歡樂時光，但我從未正式同佢表白過⋯⋯升上小六之後，就更加少來往。

依舊佢同啊杰讀尖子班，我讀精英班。因為要考呈分試的關係，隨著愈來愈多嘅補課，大家放多左時間去讀書，於是導致我同佢嘅交流由以前一星期兩次，變成兩星期一次。

雖然有時我好兄弟Kelvin會叫我搵下佢，叫佢搵下我，但頂多都係一個星期見返一次面，吹幾句學業、動漫嘅事就冇喇。

識過最少半年，每次交流時我睇得出、聽得出、個心感受得到Grace其實對我有好感，接二連三佢主動搵我，一個月內又最少請過我三次飲野，但我一次又一次miss咗黃金機會去將大家個關係升溫。

相反，啊杰同Grace上到小六之後關係愈來愈好。我見佢地經常補完課就一齊行出黎，經常一齊落canteen坐。



到咗上學期大考完結，我就收到風兼確認啊杰同Grace變成cp，結果我只能夠無奈地同Grace保持距離。

人就係咁，當你開始唔同佢交流，大家嘅感情就會淡。

儘管我小六下學期開始玩fb，嘗試用分身ac去add返Grace，但佢遲遲唔理我。

直到小學升中放榜果日，我得知自己比嘉里學校錄取，Grace就入真光，啊杰就入男拔。

「我地中學keep住聯絡啊」啊杰笑著對Grace。

但直覺話我知呢個係世紀大話，因為我相信佢地去左唔同學校之後關係肯定變返疏淡。

自此之後，就再收唔到Grace嘅風，我少打佢屋企電話所以唔記得左號碼，Kelvin當初比我果張紙仔都唔知去左邊，而加佢同啊杰過成點都唔知。FB上也因為私隱設定關係，最多睇到佢間唔中換下自拍ICON，就算我inbox佢都冇覆我。

---畢業禮---



Kelvin: 升中學啦，幾將來冇乜機會見面喇，放假出黎呀~
(他自信地微笑)

我：好呀~
(我也回以相同神情)

升中一前嘅暑假嘅一個黃昏，我同Kelvin一齊喺公園傾心事。

Kelvin：呢隻牌子嘅檸檬茶我最中意飲。
(他咽了一口，享受地說。)

我：唉⋯⋯我搵唔返Grace喇

我帶著十分失望的情緒說著，然後也咽下一口可樂。



Kelvin：去到中學仲有機會呀。
Kelvin：我睇唔到你幾多，後面靠你自己喇。

好景不常，估唔到呢一日真係我last day見Kelvin。

Kelvin之後話參與交流團，坐渡假遊輪去外國。但後來佢屋企人話我知：隻船有事，一場海難，聽聞連遺體都搵唔返。就係咁樣陰陽相隔⋯⋯

點解⋯⋯點解D美好嘅事情就好似一堆泡沫咁話冇就冇？

而家中三，諗返轉頭呢幾年，我識到一個好兄弟，令我成長咗，變得明智同堅強，還讓我遇見一個能夠帶我快樂嘅女孩。

Kelvin兄，我仲好想搵你傾心事。
Grace妹，希望我地有緣再相見。



---End of 回憶---