自從同Miss喺一齊，我就忽然變得好受歡迎: 第162章 聖誕假

聖誕節本來係好開心嘅節日，但係今年我喺外國渡過，而且仲要返兼職。平安夜當晚，窗外落咗我嚟加拿大嘅第一場雪，坐喺溫暖嘅室內，望住室外慢慢飄落嘅雪花，個心出奇地寧靜，咁多年，首次感受到平安夜嘅真正意義。
 
我忍唔住打電話俾Miss Cheung同周穎，首先當然係Miss Cheung。
 
「你做緊咩呀？」我用最溫柔嘅語氣問。
 
「改緊卷囉。」Miss Cheung語氣平淡，呢排我已經少咗打番香港，因為每次Miss Cheung都係做緊嘢，講唔到好耐，好多時傾完仲唔開心過未傾。
 
「Miss，我好掛住你呀。」雖然咁樣講好細路仔，但係呢個都係事實。
 


「你俾心機讀書，畢業返嚟咪可以日日見。」Miss Cheung始終係成年人，講嘢偏向現實。
 
「咁仲有排喎，Miss你有冇掛住我㗎？」我忍唔住問咗句唔應該問嘅說話。
 
「你覺得我唔掛住你？」Miss Cheung把聲忽然沉咗落嚟。
 
聽到Miss Cheung好似嬲嬲地咁，我即刻驚咗一驚：「唔係呀，Miss，我冇咁諗，只係我哋咁耐冇見，你都好似…」我唔敢將最後「冇乜嘢」嗰幾個字講埋出嚟。
 
Miss Cheung嘆咗口氣：「子龍，嚟緊幾年對你同我嚟講，都係一個好大嘅考驗，如果我將同你分開嘅事實日日擺喺心裡面，我連返工都冇心機，你明唔明呀？」
 


「我明，對唔住呀，Miss，因為我太怕失去你，所以先亂講嘢。」原來Miss Cheung為咗淡化同我分開嘅離愁別緒，先表現得咁冷漠。
 
「我話咗等你，就一定會等你，就算第時你唔揀我，我都唔會後悔。」Miss Cheung有啲苦口婆心咁講。
 
同Miss Cheung再傾咗陣心事，講咗啲近日發生嘅嘢，喺香港嘅Miss Cheung日子如常，聖誕節都係做學校嘢，我唔敢同佢講Judy件事，只係話平時多數係同石克隆出去。
 
啱啱同Miss Cheung傾完，諗住打俾周穎，佢已經先一步打咗過嚟。
 
「子龍，我好掛住你呀！」周穎一聽見我把聲就話。
 


「我都好掛住你，平時淨係講電話真係唔夠。」聽到周穎仲咁緊張，我都算有番啲欣慰。
 
「係喇，不過你放心，多倫多大學嗰邊已經初步接納咗我嘅獎學金同入學申請，只要DSE保持到水準，出年我就可以過去搵你。」周穎信心滿滿咁同我報告。
 
「咁就好喇，即係話我哋好快就可以再見，我喺呢邊都讀得唔錯，成績仲好過以前喺香港。」因為程度低咗，我嘅level都高咗。
 
「咁叻仔，你係咪為咗我先咁努力呢？」周穎見我冇偷懶，衷心為我高興。
 
「梗係啦，今次都係因為我先至搞到要分開，為咗你，我一定要努力追番失去咗嘅時間。」周穎我唔擔心，但係Miss Cheung同我始終喺年紀上有好大差距，當有適齡人士喺身邊出現時，難保佢唔會放棄我，就算之前嘅張Sir，我都唔係完全放心。
 
當然，事實上成日搞三搞四嘅，暫時都只係我，呢啲就係以小人之心度君子之腹。
 
「你識咁諗就好，你而家又做兼職又讀書，成績仲要好咗，真係大個仔喇。」我想Miss Cheung對我講嘅說話，結果從周穎口中聽到。
 
「咁你過到嚟一定要好好獎勵我。」冇得見，打情罵俏呢啲點都要做下。


 
「你想我點獎勵你都冇問題，反正我都將自己交晒俾你㗎喇。」周穎帶點嬌羞咁講。
 
喺呢刻，我差啲想叫周穎開Facetime玩下phone sex，不過都係嗰句，搞㷫咗自己就話落去搵Judy出火啫，搞㷫咗周穎佢咪好慘，佢搵咩方法搞掂都唔好喇。
 
用電話稍為緩解咗相思之苦後，我瞓喺床上面呆望住窗外仍然未止嘅雪花，一種從未感受過嘅鄉悉襲上心頭，最唔捨得嘅始終都係生活咗十幾年嘅地方，同埋留喺其上嘅甜美回憶。
 
越諗心情越沉重，連去搵Judy都冇心機，反而有啲想搵小琪，不過佢同阿妹出咗去玩，係我話聽日要一早返工留咗喺屋企。
 
第二朝起身成個世界都俾白皚皚嘅雪覆蓋住，好似舖上咗一層厚厚嘅白色地氈一樣，今日係聖誕節，每逢呢啲大時大節，外賣特別多，所以我同Judy提早咗返去舖頭幫手做準備。
 
因為阿妹尋晚好夜先返，所以車唔到我哋返工，我同Judy唯有搭巴士，好彩啲行人路嘅雪已經剷晒，唔係我哋兩個就要踩住深及膝頭嘅積雪出門。
 
返到去雖然未開舖，但係因為早幾日已經有好多人訂咗餐搞party，結果九點返到去一路忙到十二點先停落嚟，令我首次深刻體會到窮苦留學生嘅悲慘生活。
 


聖誕節後嘅第二、三日一樣忙，直到第四日先可以休息一下，不過都只可以分更放假，今日係我，聽日到Judy，仲忙過返學，每日返到屋企攰到連細佬都起唔到頭，更莫講話扑嘢。
 
本來想瞓晏啲，但係石克隆個死仔竟然十點幾就打嚟叫醒我。
 
「喂，今日放假喎，有咩搞呀？」石克隆劈頭就話。
 
「冇咩搞，瞓下覺啩。」我都未瞓醒。
 
「Phoenix、Betty同Lisa一早去咗Chloe屋企開party，你去唔去吖？」Lisa係小琪英文名。
 
「聖誕都過咗，仲開咩party呀？」連續返咗幾日工，我都唔知啲女仔自從上次唱K後就friend番。
 
「Chloe屋企一星期起碼開一、兩次party㗎喇，唔使原因㗎。」石克隆似乎覺得好正常。
 
「唔…」啱啱想拒絕嘅時候，我忽然諗起周穎上次差啲出事，就係去Chloe屋企開party，呢件事發生後一直令我有啲諗唔通嘅地方，甚至一度懷疑石克隆同周穎嘅說辭：「咁好吖，你幾時過到嚟。」


 
「半個鐘喥。」石克隆話。
 
我好想知道當晚究竟發生過咩事，雖然我明白有時真相並唔一定係我可以接受，但係如果俾我揀，我寧願知道一個殘酷嘅真相，都好過得一個假嘅大話。
 
或者去咗Chloe屋企都唔會得到任何結果，但係起碼可以對當晚嘅環境有多啲了解。