我好唔捨得咁再同小琪打多陣茄輪,先至同佢分開,我知道今次鬆手之後,曾經存在喺我哋之間嘅親密關係亦將結束,小琪眼濕濕咁望住我,我覺得雙眼亦都有啲發熱,但係我哋都冇開口講任何嘢,只係靜靜咁各自去沖涼。
 
趕及喺阿媽同阿妹返嚟前沖好涼,小琪返咗房,我就去番樓下個廳獨自坐喺度發夢,窗外又落起飄雪,室內溫暖嘅環境同室外寒冷嘅天氣形成強烈對比,每次喺咁情況下,內心都會有一種好寧靜嘅感覺,就算仲充斥著對小琪嘅眷戀,飄落嘅雪花仍然能夠將傷感慢慢掩蓋。
 
我仲未將考唔到大學嘅事話俾Miss Cheung同周穎聽,真係有啲難以啟齒,或者係唔想俾太大壓力我,佢哋兩個都問我大學嘅事,不過隨著時間過去,我即使唔講佢哋都會知道。
 
唉!從來都唔覺得讀書係咁重要,尤其係有咗其他負擔後,究竟有冇其他辦法可以補救呢?
 
諗諗下我竟然喺梳化度瞓著咗,第二朝阿媽落嚟先發現同叫醒我,因為已經唔使返學,所以我兼職變全職,日日都用返工嚟麻醉自己,暫時唔去諗大學嘅事住。
 


又過咗幾日,今日放工嗰陣覺得個人有啲鬱悶,好似冇晒方向咁,反正聽日係難得嘅休假,唔使早起,於是我冇直接返屋企,揸車一路沿住大路向屋企嘅反方向駛去,諗住一個人兜下風。
 
漸漸四周開始越嚟越荒蕪,莫講話人,連車都冇架。因為遠離人煙,夜空嘅星光開始越嚟越亮,我從來都唔知道原來天上面有咁多星星,俾人一種蒼穹之下,自己只不過係極其渺小存在嘅卑微感覺。
 
正當我喺度驚嘆緊天地萬物嘅偉大嗰陣,車裡面嘅倒後鏡反射出強烈嘅白光,仆街,竟然有人喺後面開高燈鋥住我,不過我冇心情理佢,打燈cut咗過隔離線,等後面架車可以爬頭行先。
 
唔知條友係咪飲大咗,竟然跟我cut線,繼續搵高燈鋥我,我有啲嬲、又有啲無奈,既然對方存心玩嘢,咁我都唔使俾面佢,於是我突然揼brake減慢車速,兩架車嘅距離忽然拉近,迫到後面架車即刻cut線避開,當駛過我側邊時,我發現係一架轉咗反向黑玻璃嘅黃色跑車。
 
因為我嘅減速,黃色跑車轉眼就喺前方遠處消失,但係好快又放慢車速等我追上,我揸嘅只係普通日本車,唔係諗住同我捵車啩?
 


果然當我駛到同佢平排嘅時候,架車開始同我同速向前駛,無論我快慢都泊住喺側邊行,男人有個缺點,就係揸車嗰陣特別燥,俾人咁挑釁法真係佛都有火,於是我開始加快車速,試圖擺脫黃色跑車嘅糾纏。
 
加到去近百二咪,架車開始飄,好似坐過山車咁有啲離心力,如果呢個時候走隻松鼠出嚟我實炒車,始終唔係highway,喺市區開到咁快我都係第一次,如果唔係去到咁偏僻,應該已經俾警察抄咗牌。
 
算喇,我呢啲人生失敗者,大學考唔到,身邊又冇女,無謂同你呢啲人生勝利組玩命吖,於是我再次減慢車速,然後忽然U-turn,向番市區駛去。
 
黃色跑車估唔到我會調頭,保持車速揚長而去,點知冇幾耐竟然又跟番住我,條友唔會係荷李活爛片裡面嗰啲變態跟蹤狂或者殺人魔呀?我係仔嚟喎,頭先超車嗰陣應該見到㗎,加拿大又唔係美國,個個都有鎗,無端端做乜搞我呢?
 
好奇掩蓋咗恐懼,亦都令我暫時冇咁失落,我見前面有個冇人嘅公園停車場,就轉彎駛咗入去,黃色跑車果然跟住駛埋入嚟,仲停咗喺我右邊。
 


喺寂靜嘅夜晚,周圍只係剩番我哋兩架車發出嘅引擎聲,個天又開始落雪,後來我先知道,呢場原來係春天來臨後嘅最後一場雪,而喺呢場春雪裡面,失踪咗幾個月嘅Chloe終於再次出現。
 
黃色跑車校低車窗,坐喺駕駛座嘅竟然係Chloe,清純嘅臉龐上充滿笑意:「靚仔,喺市區開咁快好危險啫,乜事咁燥呀?」
 
見番Chloe,基本上我係開心嘅,但係因為之前發生嘅事,我唔係太知應該用咩態度對待佢:「原來係你呀,咁啱嘅,等我仲以為係變態殺人魔添。」
 
「係咪好驚喜呢?咁耐冇見,有冇掛住我先?」Chloe挨喺車門,一邊撥頭髮一邊問。
 
老實講係有啲掛住嘅,尤其係喺呢個學業感情兩失意嘅時候,既考唔到大學,小琪同Judy又離開咗,Chloe嘅再現某程度上填補咗佢哋嘅空缺。
 
「你再唔出聲我走㗎喇。」Chloe見我冇乜反應,坐番直個身,作勢想開車離開咁款。
 
我冇諗太多,只係本能地想留住Chloe:「不如你唔好走住,我哋傾多陣。」
 
「既然你開到口,咁好呀。」Chloe突然熄車,坐咗過嚟我架車度:「咁傾咩吖?」


 
Chloe過到嚟我先睇清楚佢嘅衣著,係一套剪裁好靚嘅連身啡色長裙,胸前仲開咗個大Deep V,夾到條波罅鬼死咁深,加埋佢咁fit嘅身材,話唔心動就係假。
 
見我向佢行注目禮,Chloe微笑問:「我咁著係咪好性感呀?專登為你著成咁㗎。」
 
我有種將Chloe一攬入懷嘅衝動,但係有啲事係未搞清楚之前,我實在唔放心同佢喺番埋一齊:「上次嘅事...」我本來想講「對唔住」,但係覺得唔係咁適合:「其實你起初接近我係咪真係為咗玩我。」
 
「係呀。」Chloe懶可憐咁話:「所以咪俾你飛咗囉。」
 
答得咁快咁直接,反而令我有啲不知所措,亦都唔知再講咩好:「咁你今日嚟嘅目的係?」我有啲睇唔清Chloe想點。
 
「重新再追過你囉。」Chloe完全唔覺得尷尬。
 
人哋話「女追男隔層紗」,我好冇矜持咁即刻就想應承,最近真係好想有女喺身邊陪下,但係一切嚟得太過突然,令我有種好唔實在嘅感覺。
 


「咁你俾我考慮下先。」好似變咗我係女仔咁。
 
「仲要考慮?頭先追咗你幾條街喎。」Chloe碌大對眼瞪住我:「唔係咁小氣仲嬲緊玩你單嘢呀,咁我而家正式向你道歉嘞!」
 
嬲就唔係好嬲,而且波濤洶湧咁喺面前揚來揚去,咩火都冇晒喇,另一道火就喺下身升起緊,令到我有啲驚控制唔到自己,即使仲想同Chloe傾多陣,都揞住良心話:「而家都好夜,我想返屋企先,唔係阿媽鬧。」
 
Chloe一臉難以置信,最後喺沉默咗幾分鐘後:「咁我走喇,你唔好後悔喎。」
 
我望住Chloe落車時有意無意喺長裙開叉處露出嘅白滑大腿,爭少少就想拉番佢入嚟玩車震。
 
Chloe上番車,臨走前抛下最後一句說話:「咁你唔好考慮咁耐喎。」
 
已有 0 人追稿