沖完涼搞多一次,我就叫Chloe送我返屋企,因為我見佢俾我搞到得番半條命咁,就唔使佢送,只係由司機車我走。
 
返到屋企喺門口撞到啱啱由Ryan車返嚟嘅小琪,我見佢滿面春風,睇落應該同我差唔多經歷,諗起曾經抱喺懷裡面嘅小琪而家已經變作他人婦,個心總會有啲唔舒服,但係人要向前走嘅,有啲事係無可避免,而且我深信呢個係對雙方最好嘅選擇。
 
自從我好冇性格咁同番Chloe一齊後,佢差唔多日日都嚟接我放工,唔返工嘅日子我就會去佢屋企或者約埋石克隆哋出去玩,日子都算過得幾寫意,距離大學開學越嚟越近,呢日我就同Chloe、石克隆、Amy四個入Waterloo辦入學手續兼租地方住。
 
因為想熟下去Waterloo條路,所以我哋四個人都揸咗兩架車,Chloe當然跟我車,一上車佢就開籠雀咁講唔停,但係唔夠三個字就冇咗聲,原來已經瞓著咗。
 
我同石克隆都開得比較快,唔使一個鐘就到達目的地,由於Chloe仲瞓緊,於是我哋就安排Amy睇住佢,而我同石克隆去辦手續,University of Waterloo嘅環境唔錯,有種專屬鄉郊嘅寧靜悠閒氣息,比起University of Toronto係細啲,但係學生人數相對少,而且由於放緊暑假,在校嘅人唔多,除咗供學生註冊嘅禮堂,基本上校園裡面冇乜人。
 


等我仲同石克隆抱住𥄫下有冇靚女嘅心情四圍望,結果只係得啲中等水平嘅鬼妹或者亞洲妹,一場嚟到加拿大,今次仲要去到呢啲冇乜亞洲人嘅town仔,唔衝出國際豐富下我嘅人生經歷,將來老咗阿仔問我去外國讀書加移民咁多年有冇仆過鬼妹,我都唔知點答佢好。
 
半個鐘喥就搞好晒啲嘢,喺我同石克隆帶住失望心情準備返去搵Amy同Chloe嘅時候,石克隆忽然捉住我膊頭,揚頭示意我向三點鐘方向望去。
 
可能由於四周啲女比較低質,一名企喺學生中間嘅女子驟眼望落去簡直算得上係人間絕色,睇落似係香港人,年紀約廿五、六歲,長髮大眼瓜子臉,加上勁爆身材,竟然有幾分Miss Cheung嘅影子!
 
「心理學系㗎喎,話唔定有機會教你。」石克隆咀角帶笑同我講。
 
係就發達喇,唔係,Miss系列裡面我已經有Miss Cheung,冇需要再搵第二個:「睇個樣咁後生冇理由係Professor,應該係研究生或者助教之類。」
 


「咁都有機會接觸到吖,你就好喇,去到邊都有咁多靚女喺身邊。」石克隆一臉羨慕。
 
「雖然係靚,但係比起Miss Cheung都係爭咗啲,係高少少,身材應該冇咁勁,個樣就各花入各眼,我個人覺得Miss Cheung高一班。」整體質素雖然差唔多,不過Miss Cheung同我關係匪淺,點都睇高一線。
 
石克隆望一望我,有啲奇怪咁話:「𥄫下啫,使唔使攞你女神嚟做比較呀?話時話你今年要俾心機讀書,出年轉番出嚟同我哋同校,唔好掛住搞啲咩師生戀添呀。」
 
「冇,我絕對冇咁諗過,只係純粹以事論事...唔係,以人論人啫。」我有啲心虛,我向天發誓,頭先絕對冇Miss Cheung唔喺身邊,有個差唔多level嘅Professor都幾唔錯嘅諗法。
 
去攞車時Chloe已經醒咗,滿臉不悅咁同Amy傾緊偈,一見我就即刻走過嚟:「你做咩唔叫醒我?等我同你去學校辧手續。」
 


「見你瞓得咁腍,咪冇叫醒你,況且頭先仲排咗陣隊,你大小姐實嫌攰。」我不以為然。
 
「梗係唔係喇,我要喺你身邊展示下我女朋友嘅身份,免得有女仔睇中你,呢啲入學時候最好就係順手搵埋碼頭,我冇喺身邊,啲人就會當你係目標。」Chloe理直氣壯咁扠住腰發表偉論。
 
「邊有女仔好似你咁諗㗎,況且頭先都冇靚女...」我忽然諗起比得上Miss Cheung嗰個唔知係咪Professor嘅靚女。
 
「哦,做咩突然唔出聲,頭先係咪有艷遇?」Chloe見我窒咗一窒,即刻大興問罪之師。
 
Amy見狀都好奇咁望向石克隆,石克隆當然灑手擰頭話冇,事實真係冇吖,頭先點算艷遇呀。
 
「艷咩遇吖,呢度最艷就係你哋兩個喇。」我一邊拖Chloe上車,一邊向石克隆話:「去搞埋租屋啲嘢先。」
 
上車後Chloe仲未肯放過我,仍然反覆追問,我頂唔順話咗頭先個靚女Professor嘅事佢知,佢先肯罷休。
 
「真係咁之嘛?」去到租屋地方,臨落車前Chloe再問多次。


 
「係呀,Terrance又喺度,你覺得會有咩可以發生到呢?你都知Terrance對Amy幾專一㗎喇。」冇辧法,唔拉埋石克隆落水都幾難甩身。
 
「咁又係,你學下人喇,如果你好似佢咁我就放心好多。」Chloe聽我咁講先終於唔再糾纏落去。
 
喂!唔好講到我好花心咁喎,我唔花心都唔會同你一齊喇,你呢啲既得利益者竟然要我專一。
 
即將租住嘅地方同大學唔算遠,車程五分鐘,行路都係大約十五分鐘,係一間連花園約二千呎嘅house,只有地面一層同basement,除咗廳外有三間房,兩間已經有人租緊,我租嘅係百零呎嘅尾房。
 
今日喺度嘅得頭房租客,係一個讀緊Year 3嘅化學學生,叫義仔,外表怪怪咁,行動似乎有啲唔方便,行路趷趷下,後嚟我先知原來佢因為細個時患過小兒麻痺,所以有肌力變弱嘅後遺症。義仔亦都係房東嘅代理人,負責收租同打理間屋。
 
「呢間房咁細,嗰個人又成個科學怪人咁,不如你唔好喺度住,我幫你喺附近租番間屋,到時我嚟探你都方便啲。」Chloe參觀完細細聲同我講。
 
「你估我發咗達咩,呢度啱喇,又近又平,你唔好咁多事。」除咗怕俾義仔聽到,經濟上我都唔想靠Chloe,先唔好講成個軟飯王咁,第時分咗手或者反咗面就夠煩喇。
 


搞掂晒啲嘢後我哋喺Waterloo行咗陣食埋嘢就走,Waterloo冇咩名聖,除咗間大學出名啲之外。
 
回程時我同石克隆分道揚鑣,佢車Amy返屋企,我就車Chloe,當然少不免又要上Chloe房短敍。
已有 0 人追稿