自從同Miss喺一齊，我就忽然變得好受歡迎: 第193章 小琪嘅將來
食早餐嘅時候周穎同小琪傾得好開心，兩個女仔好似一家人咁，只係得我一個心驚驚咁喺度諗小琪個男朋友Ryan，會唔會都係受咗Chloe指示嚟撬走佢？
今日約咗石克隆同Amy去University of Toronto幫周穎搞入學啲嘢，所以食完早餐我就同周穎先出門，留番小琪一個喺屋企等Ryan，打電話俾Chloe佢可能會忽悠我，呢兩日一定要搵個機會當面問清楚佢。
點知唔使搵，Chloe已經自動蒲咗出嚟，喺UT會合石克隆哋時，Chloe就正興奮地同Amy傾緊偈。
「Wing姐姐！」Chloe一見周穎就賣晒口乖兼過挾走咗佢，拖住Amy同周穎細細聲唔知講乜，睇周穎臉紅紅咁又點頭又擰頭，Amy就扮聽唔到咁喺側邊跟住佢哋行，都唔慌係講咩正經嘢。
「終於等到周穎過嚟，尋晚一定過得好𣈱快喇！」石克隆罕有地講咗少少衰嘢。
「成日講我，咁你呢？同Amy進展到咩地步呀？」我一拳打落石克隆寬厚嘅膊頭，串番佢。
「我哋呢啲愛情長跑，有排都未見到終點，點似你次次都由終點起跑。」畢竟相識多年，就算中間曾經分開過，嗰種真摯友情仍然令我好溫暖。
我感受住呢份窩心嘅感情：「係呢，有啲嘢想問下你意見。」
「感情方面嘅嘢你就唔使問我喇，我倒番轉頭拜你為師就差唔多。」石克隆笑笑，講到溝女，其實我邊及得上有錢又靚仔嘅石克隆，就算我哋同時追周穎，我都冇信心可以跑出，只係因緣際會，俾我喺最適當時機出現咗喺周穎面前。
「講番正經嘢先，其實係咁嘅。」我將尋晚Judy同Chloe出現喺屋企嘅事，同今朝關於小琪男友Ryan嘅考量，全部講晒俾石克隆知，冇辦法，我喺加拿大得佢一個老死，就算喺香港都係得完全信唔過嘅王小富。
「Judy嗰邊你應該唔會怪Chloe㗎喇？某程度上仲要同佢講聲「多謝」添。」石克隆見我點頭同意，就接著講落去：「你認為Ryan都係Chloe授意去追小琪嘅？」
「你覺得有冇可能呢？」我唔肯定自己接唔接受到真相。
「以Chloe性格，好有可能會咁做，不過佢對Judy同小琪嘅態度應該唔同，所以好難講會唔會用同一種手段對付。」石克隆持平咁分析。
呢個都係意料中嘅答案：「其實經過呢段日子，我對Chloe已經改觀咗好多，但係我都唔可以接受到佢搵人玩小琪。」
「小琪係好女仔，我都叫睇住佢大，Chloe為咗自己叫人追走佢都算，只要個男仔係真心對小琪，反正你都夠晒多女。」石克隆見我臉色微變，改口話：「如果係用對付Judy嘅手法，搵人搞大小琪個肚，我都唔會放過Chloe。」
咁講法我真係有啲擔心，Chloe呢啲膽生毛，乜都夠膽做，由玩我，到玩我身邊嘅人，望住喺前面同周穎有講有笑扮晒熟嘅Chloe，你都咪話唔心寒。
「克仔，你幫我帶周穎去搞入學啲嘢先。」我當機立斷，決定即刻搞清楚所有嘢。
「明白，你自己小心。」石克隆講到我去打大佬咁，都錯唔晒，Chloe絕對可以成為我溝女以嚟所打嘅第一個大Boss。
石克隆上前拖住Amy，向周穎話：「我哋帶你去校務處註冊先喇。」
周穎點頭同意，Chloe本來想跟埋去，但係俾石克隆揚手止住：「你等陣先join番我哋，Wesley有事搵你。」
Chloe轉頭望向我，開開心心咁彈埋我度，周穎以為我想搵個機會就尋晚嘅事多謝Chloe，放心跟石克隆同Amy行咗去，睇嚟剛才嘅短暫相處，Chloe已經成功取得周穎嘅認同，仲對佢有個幾好嘅印象。
我等Chloe彈到兩米喥距離，就舉手截住佢：「咪埋嚟住，我有啲嘢要問你。」
「做咩喎？我哋隔咁遠點問呀。」Chloe嘟起個咀，扮晒可憐：「而家叻喇，有咗女朋友就同我保持距離，枉我尋晚仲趕去救你。」
「就係呢件事，我要問清楚你，其實係你叫Patrick去玩Judy嘅，係咪？」我明知故問。
「係呀，邊個叫佢當你係提款機呀，不過搞大佢個肚就唔關我事，係條友想入豪門出埋啲揦鮓手段，點知俾Patrick一腳伸走。」Chloe理直氣壯咁答。
「咁小琪呢？Ryan係咪都係你叫去埋小琪身？」我問出最想問，又唔係好想知答案嘅問題。
「係呀，Ryan係我堂細佬，係我叫佢去追小琪嘅。」Chloe答得好順口：「咦？你塊面做咩突然變到咁黑呀？」
我望住呢個唔識死嘅Chloe，努力壓抑住內心激動嘅情緒：「我當小琪係親生細妹咁睇，你竟然夠擔搵人去搞佢？！」
「吓？咩搞佢呀，Ryan係好男仔嚟㗎，對小琪都係真心，我介紹佢俾小琪識，就係想佢有個好歸宿。」Chloe上前捉住我隻手，用對露咗大半出嚟嘅波夾住：「你有Wing姐姐，又有我，仲有咁多時間「照顧」其他女仔咩？」
仲有Miss Cheung添！Chloe講得好啱，搞到我都有少少窒住，我係唔捨得小琪，不過亦都想佢有個美好嘅將來，跟住我的確唔叫做好：「但係你做咩之前都應該同我講咗先，唔係做完先同我講，萬一搞咗啲無法挽回嘅事出嚟，咁點算呢？」
「係喇，係喇，總之以後乜都同你講咗先，你唔好嬲喇，雖然你嬲起上嚟個樣有型又有威嚴，仲搞到我成身㷫晒，但係都等我哋兩個單獨柄埋時先嬲喇。」Chloe搵對波係咁磨我隻手：「你睇下，我今日專登著到咁性感，就係為咗你咋，你唔讚我不特止，仲一見面就鬧人。」
我望清Chloe，低胸露肩上身加短到差唔多見到底褲嘅短裙又真係幾大殺傷力，冷靜落嚟仲發現周圍不知幾多咸咸濕濕嘅目光不停向Chloe打量。
我將手搭上Chloe柔滑嘅雙肩，將佢攬埋身，向班咸濕仔宣示我嘅主權。
「尋晚嘅事你仲未好好多謝我添呀，如果唔係我，你估今日仲有得拖住Wing姐姐咩。」Chloe雙手攬住我條腰，懶得戚咁講。
不過所有嘢都係你搞出嚟㗎喎！但公平啲講，Judy仲喺屋企住的確係會有啲不良影響，而且我仲可能要繼續幫佢交租，純講呢件事，Chloe都算幫咗我大忙。