返到UT,我哋先去咗圖書館攞書,對於周穎呢啲學霸,去得圖書館就唔捨得即時走,於是我就由得佢坐低睇書,自己周圍逛下。

我唔知UT有幾多個圖書館,不過而家身處呢個就係位於一座大樓5樓嘅小型圖書館,面積都有七、八千呎,密密麻麻堆滿書架同書,有啲仲係好古老嘅舊書,最神奇就係竟然俾我搵到本「少林七十二絕技」,成本武功秘笈咁。

話晒我係練武之人,見到本咁勁嘅書,唔理真假都要仔細研究下,雖然冇可能靠呢本書練成絕世武功,但係單就佢有齊七十二種絕技介紹同基本練法,我已經覺得好勁。

睇咗唔知幾耐,我估大約一個鐘喥,先醒起要去搵番周穎,於是我有啲唔捨得咁放低本唔借得嘅少林七十二絕技,行番去位於圖書館中心嘅閱讀區搵周穎。

喺書架中心空出嘅位置有張長枱,兩邊分別可以坐三個人,周穎坐咗喺右上角,側邊坐咗個相貌尚算中上嘅男仔,睇嚟係周穎同學,正努力撩緊周穎傾偈。



呢啲情況平時應該經常出現,冇辦法喇,邊個叫我有個校花女友,不過既然俾我撞到,咁就係時候宣示下主權。

其實周穎都冇乜理個男仔,好明顯係有人死纏爛打,於是我風風火火咁行埋去周穎身邊,帶起嘅風壓令到坐喺度嘅兩個人都feel到我嘅出現。

周穎抬頭望見我,臉上即時泛起甜美笑容,相反個男仔望到我,隨即露出厭惡神情。

「不如我哋走囉。」周穎起身勉住我隻手,好溫柔咁同我講。

我點點頭,望咗滿臉不憤嘅男仔一眼,就拖住周穎離開。



「頭先個男仔好似對你好有意思。」入到𨋢,我有啲擔心咁問周穎。

「你話Stephen?或者喇,你唔係介意啩?」周穎咀角含笑,一副事不關己嘅樣。

點會唔介意?但係聽人講男仔最緊要大方:「唔介意,你都要有異性朋友㗎,況且我知道你對我一心一意,介意呢啲負面情緒留番俾其他男仔喇。」

「你識咁諗就乖嘞,我個人最怕麻煩,有你一個就夠,一腳踏幾船嗰啲嘢真係唔適合我。」周穎微笑同我講。

唔係暗示緊我啩,係我都唔敢亂應喇,惟有轉移話題:「係呢,而家都差唔多食晏時間,你想去邊度食?」



「不如我帶你去平時返學開餐個canteen食,嗰度啲Fish & Chips好好味。」周穎冇糾纏喺一腳踏幾船件事上,睇嚟頭先唔係暗串我。

學校canteen當然大部分係學生,始終係星期六,人流唔多,但係竟然都有幾枱人係周穎識嘅,使唔使咁交友廣闊呀?

照舊女嘅就用眼神對我評頭品足,男嘅就唔係輕蔑就係敵視,喂!有啲男仔擺到明施住隔離個女朋友,使唔使仲咁唔妥我呀。

啲嘢係幾好食,不過成日俾人監視住咁周身唔聚財,周穎就話習慣俾人𥄫,我就唔慣俾人睥囉。

食嘢途中仲有唔少唔同種族嘅男仔過嚟借意搵周穎吹水,實質打聽我嘅身份,慶幸周穎冇理啲人嘅誇張反應,次次都大方承認我係佢男友。

「睇嚟我真係要快啲轉番出嚟,唔係你日日俾人咁騷擾法都幾慘。」我有啲擔心又有啲不滿咁講。

「都係㗎,你喺我身邊梗係最好喇。」周穎一臉笑意,似乎好滿意我咁「關心」佢。

飯後周穎帶我參觀佢上堂同我將來會上堂嘅地方,周穎繼續相識滿天下,去到邊都有人主動同佢打招呼,返咗一個月學啫,有冇咁受歡迎呀?



好唔容易離開大學,我哋去咗Harbourfront行街,望住睇唔到邊嘅安大略湖,終於有番啲同周穎拍拖嘅感覺。

我從後攬住周穎,享受只屬於我哋兩個嘅寧靜,今日雖然陽光普照,但係並唔熱,微風吹起周穎嘅長髮,伴隨髮香拂落我條頸度時既舒適又有少少痕。

我少有地安份,雙手冇乘機上下其手,細佬亦冇詐諦頂周穎籮柚,可能太過純情,過咗一陣周穎就唔太相信咁抬頭望向我。

點解周穎由邊個角度睇都可以咁靚?就算係扮緊純情,我都忍唔住低頭同周穎咀咀相印,軟潤雙唇錫落好舒服,彷似有吸力咁將我吸住。

昂住條頸打茄輪恐防會扭親,我將周穎轉到同我面對面,四手雙擁咁繼續親吻,攬到咁實當然冇可能feel唔到身體變化,周穎著住牛仔褲都俾我頂到臉紅耳赤。

「不如返屋企囉。」周穎推開我,稍微喘住氣講。

對於急色嘅我嚟講,呢個實在係好提議,我點點頭,拖住周穎急步行去攞車。



誰不知一上到車,周穎又有另一個建議:「呢度附近有個新鮮街市,我好耐冇食過你煮嘅嘢,不如去買啲餸先走?」

我當然唔會拒絕周穎,加拿大嘅街市同香港好唔同,啲舖頭排列整齊又乾淨,似超級市場多過街市,價錢唔算平,但係勝在夠天然無添加,全部都係自家農場出品。

周穎想食咩我就買咩,食材優質求其調下味已經係一流菜色,有啲食材其實我都未見過,只可以分到係肉類定蔬菜類。

既然買咗咁多餸,返到屋企就唯有先準備好晚餐,搞得嚟阿媽、阿妹同小琪就依次序返到,見到我大展廚藝都好興奮。

能夠一次過滿足晒四條女我實在覺得自己好勁,個個都對我煮嘅嘢讚不絕口,求其煮熟晒啫,又唔使食緊龍肉咁驚為天人。

不過呢種一家人嘅感覺仍然令我深感溫暖,其實除咗阿媽,阿鳯都只係勉強算有啲血緣關係,而曾經肌膚相親嘅小琪同穩坐女二嘅周穎,對我嚟講就如同親人般親切及重要。

如果可以日日過呢種咁溫馨嘅家庭生活,其實都唔錯。
已有 0 人追稿