喺同邱雅琳分手之後,我曾經幻想過喺某年某月之後,我會同佢再次相遇,到時可能我哋都各自結咗婚,有埋小朋友,大家見面後,可以好似朋友咁愉快地講起分開後發生喺各自身上嘅種種事情。
 
但係我從來冇想到過,我同邱雅琳會喺一個咁嘅場合裡面再次見面。
 
剛才因為見到Chloe而有啲模糊嘅視線,此刻喺見到邱雅琳後變得更加模糊,我唔知自己心裡面有幾分係因為Chloe而悲傷、有幾多分係因為邱雅琳而感動,我只係feel到兩度溫熱嘅淚水喺雙頰滑落,過往同邱雅琳嘅種種回憶一剎那全部返晒嚟。
 
雖然著住不一樣嘅護士服,但係邱雅琳俾我嘅感覺就如初見般怦然心動,認出我嘅佢都嚇咗一跳,忍唔住伸手掩住因驚訝而張開嘅咀。
 
「邱姑娘!」身後傳嚟Chloe嘅聲音,將我從回憶拉回現實,估唔到尋日先諗緊點搵邱雅琳,今日就見到佢真人。
 


邱雅琳眼神複雜咁望咗我一眼,然後就回復正常行去床嘅另一邊:「點呀?今日有冇好啲呀?」
 
「我覺得好咗好多,係咪可以出院呀?」Chloe用哀求嘅語氣問邱雅琳。
 
「你唔好咁心急喇,今次嘅手術雖然好順利,但係為免影響你將來嘅生育,醫生都係建議再觀察多一個禮拜,真係完全冇後遺症先俾你出院。」邱雅琳語氣溫柔咁同Chloe講。
 
我回頭望向邱雅琳同Chloe,Chloe見我喊晒咁即刻捉實我隻手:「你做咩喊呀?我冇事喎,你都聽到姑娘講,我好快就可以出院。」
 
「點講都係我唔好,先累到你要做手術。」我實在講唔出口話我其實有部份係因為見番邱雅琳而太激動。
 


「傻喇,邊關你事,所有嘢都係意外。」Chloe明顯仲係有啲虛弱,講嘢都唔係好夠氣:「唔信你問下邱姑娘。」
 
Chloe失驚無神將話題拉咗去邱雅琳身上,喺床邊扮緊檢查儀器嘅邱雅琳都有啲不知所措:「係…係呀,宮外孕係比較罕見嘅懷孕意外,其實都唔係太關雙方嘅事。」
 
「係咪呀?邱姑娘都係咁話,邱姑娘係我見過最好嘅姑娘嚟,人又靚,又溫柔又細心,我直情想請佢返屋企做私家看護。」Chloe對邱雅琳讚不絕口。
 
邱雅琳有幾好我都知,係我辜負咗佢啫。邱雅琳俾Chloe讚到有啲面紅,偷偷地望咗我一眼,然後先話:「我邊有你講咁好,你有個咁緊張你嘅男朋友,先羨慕死人喇。」
 
「咁Wesley對我又真係幾好,不過佢對我好唔好都唔係最重要,最緊要係我鍾意佢,就算佢對我幾差,我都會死跟喺佢身邊。」Chloe表現出戀愛大過天嘅少女情懷。
 


對於Chloe對我嘅感情,一向我都唔係太理解,發生喺我哋身上嘅事唔多,亦冇話共同經歷過啲咩驚天動地嘅大單嘢,以Chloe比我豐富幾倍嘅人生閱歷同家底,係好難明佢會睇上我嘅。
 
「邱姑娘,我講個秘密你知,其實Wesley有好多女朋友㗎,個個都又靚又叻,我喺佢心目中都唔知排到第幾。」Chloe忽然用細聲得嚟我又絕對聽得到嘅聲音同邱雅琳講。
 
「係咩?睇唔出你男朋友原來咁受歡迎。」邱雅琳咀裡面咁講,但係表情就係一副我早就知道嘅樣,仲有啲傷感。
 
講到呢方面我就有啲尷尬,亦都唔知點面對邱雅琳,當初同佢分開係為佢好,唔想佢喺香港等我幾年,而家佢竟然走咗嚟加拿大,係唔係完全為咗我都好,我都唔知應該點處理我哋之間嘅感情。
 
「我都睇唔出,但係同佢一齊之後就慢慢俾佢吸引咗,初初我都係諗住…點知而家變咗對佢死心塌地。」我估Chloe本來係想講「玩玩下」,話到口邊先發覺唔對路。
 
一講起男仔,兩個女仔就講唔停口,我呢個兩人口裡嘅主角反而被冷落喺一旁。
 
「好喇,你啲指數一切正常,我遲啲再過嚟睇你,我唔阻住你哋喇,你有咩就㩒鐘搵我喇。」邱雅琳主動結束咗同Chloe嘅對話,轉身準備離開。
 
「邱姑娘!」見邱雅琳想走,我忍唔住開口叫住佢,身旁嘅Chloe有啲意外咁望向我,似乎唔明我點解要叫停邱雅琳。


 
我有好多嘢想問邱雅琳,但係喺Chloe在場下,我一句都問唔出口,最後只係話:「多謝你照顧Chloe,佢住院期間就麻煩晒你。」
 
「呢啲係我份內事,你唔使咁客氣。」邱雅琳背對住我,聲音有啲顫抖咁答,只見佢冇回頭就直接行咗出病房,仲順手閂埋房門。
 
「點解你同邱姑娘好似識咁嘅。」果然女仔觀察力比較強,我以為頭先已經表現得好好,殊不知都係瞞唔過Chloe法眼。
 
「你點會咁講嘅,我點可能識到啲咁靚嘅護士呀。」我勉力壓止住因重遇邱雅琳而翻起滔天巨浪嘅心湖,儘量平靜咁答。
 
「真係?你唔會話俾我聽邱姑娘係你舊情人啩?」Chloe唔係做完手術康復緊㗎咩?講起我啲戀愛史即刻鬼打咁精神。
 
「唔會,梗係唔會喇。」有冇咁醒呀?乜真係睇得出咩。
 
「唉,邱姑娘質素咁高,就算你話俾我聽佢係你舊情人,我都唔會怪你,我覺得你直情係走寶添呀。」Chloe斜眼望向我,一副引我自己招認嘅樣。
 


呢啲引狼入室…唔係,引蛇出洞嘅招數我睇戲睇得多,係絕對唔會上當嘅:「你咁精伶,即係冇咩事喇,咁我過兩日再嚟探你。」
 
「吓?你走喇,難得嚟到,你陪多我一陣喇。」Chloe見我話要走,就冇再糾纏喺邱雅琳身上。
 
「好喇,咁我留多陣,等我打電話叫Terence去接咗阿Wing同Amy先。」我攞出手機,諗住叫石克隆去接埋周穎同Amy過嚟。
 
「咦?係喎,你要去接Wing姐姐,咁你唔使陪我喇,你走先喇,我唔想俾Wing姐姐知道我入院嘅事。」Chloe改變主意叫我走。
 
我諗咗諗,係喎,Chloe唔想周穎知道宮外孕呢單嘢都唔難明,可能佢怕周穎唔知會點諗佢,聽石克隆講Chloe今次唔係第一次,啲唔好嘢通常試過一次就好易會有第二、三次,諗落的確冇必要俾周穎知。
 
我點點頭,上前錫咗Chloe一啖:「咁我喺Toronto呢兩日搵機會再偷偷地嚟探你。」
已有 0 人追稿