我破咗個文青處，但佢唔肯同我一齊。//《偏偏喜歡你》: 知道（一）
「青，你要搬住先，原本舅父住姨媽屋企，但佢哋鬧咗交，所以要俾佢哋嚟住一頭半個月先。」
青青母親說，總之就是因為一些原因，青青要外住一段時間。
「咁我要搬去邊？」
「XX嗰頭。我之前個同事佢屋企嚟，嗰度有多間房，你瞓嗰間。」
「OK。」
青青反而幾開心，她終於可以享受一下自己霸佔一間房的感覺。
她簡單執了衣衫、日用品、電子產品，然後去往別人的家住。
開門的人和她對視，呆了一呆：
「咁都又見到你？你係咪嚟住？」
阿樂瞪大眼，感到驚奇，他知道會有個女生入住他的家，但想不到竟然就此重遇她；青青連忙遞上這個月的租金表示謝意：
「打搞哂啦。估唔到我哋阿媽係識嘅。」
「我哋都幾有緣喎，果然係有緣自會相見，宜家換得Ig未？」
「得，多多指教。」
青青看着阿樂的用戶名稱，感覺有點熟悉，然後發現，他是那個狗衝無果的男孩子；那麼，那天他說遇見的人也正正是她。
因為他表白失敗，其實她心有點愧疚，本來他可自欺欺人繼續收獲快樂；但不能透露更多，唯有面色自如。
「你咁耐都冇po嘢嘅？」
他們開始聊天，傾大家幾歲、讀緊咩科、咩書院、有冇玩啲咩。
這時，阿樂母親從廁所出來，熱情地和青青打招呼：
「你好啊！係咪青青啊，宜家都咁大個啦，高咗好多喎，一直都咁靚嘅。希望你嚟緊住得舒服啦，有咩問樂仔就得㗎啦，佢對屋企仲清楚過我。」
「姨姨你好，麻煩哂啦。」
阿樂母親擁抱青青，再叫阿樂：
「你幫青青擺好啲嘢先啦，我要出門口啦。」
阿樂有種「哇」的新奇，他對她的好感度很高，單純因為她的長相很親和、沒有攻擊性，說話又很直接、利落，而且很友善。講到尾，大概是因為她是他喜歡的類型：眼大大，面圓圓，皮膚白白，頭髮長長，那麼心地應該善良。
其實，他也不知道自己喜歡怎樣的人。
青青看阿樂替她介紹家的擺設，這才真的在燈光下第一次好好打量他。
他身穿粉藍色的中學班衫，背後寫着「LOK・CA」，她問：
「咩係CA？」
「我以前中學讀Chem班，學號係20，對返化學元素表係Calcium。」
他留了一頭烏黑的斜陰，髮質看起來很順滑；眉毛雜亂粗豪，單眼皮但眼睛不小，架了一副笨重的黑框眼鏡；鼻樑高挺、鼻翼寬厚；嘴巴不大不小，牙齒整齊亮白。長相很斯文，整個人都高高的，頸背有點厚重，但整體身形適中。
她有些想失禮地問：
「點解你之前會當兵？條件都幾好。」
她打消念頭，吞了吞口水，感激他的幫忙。
- - -
夏天，七月，熱。
青青喜歡一個人看電影，在家中，在晚上。
阿樂敲門進來：「點解你可以咁耐都唔出房，做緊咩？」
「睇戲。」
「自己一個咁無聊？」
「不知幾正，速度自己較，覺得悶可以飛，想去廁所就停咗佢，聽漏咗台詞又可以play back。」
「咁出街呢？自己一個睇唔睇？」
「睇啊，下星期準備去睇《幻愛》。」
其實，她本來已經邀約Matt，但他說都沒有空，所以她決定自己睇。她並沒有想和他復合，但她打算遲一點才斷絕得乾乾淨淨、說清說楚，她已半個月沒見過他，有些話要當面講才對。
「咁——你鍾唔鍾意人哋陪你睇戲？」
「睇吓係邊個囉。」
「哦……唔阻你啦，慢慢睇啦。」
阿樂原本想問她要不要一起去看？但想想，大概會被她拒絕吧，寧願不問，就不會尷尬了。
他有些不由自主地好奇於她。
她常有些奇怪的想法，二人一起看舞台演出的影片時，她會說：
「佢哋可能會跌死，如果啲人有心殺佢哋。」
「？」
他突然聽到她這樣講，擺出不解的臉。
「呢度咪好多煙，佢哋盲舂舂咁向前行，其實根本睇唔到舞台，如果下面其實係空心，佢哋可能會跌落去跌死。」
「……咁呢個呢？水舞間，有冇得死？」
「有，絕對有。你望吓，佢哋咁高跳落去，如果下面啲水唔夠深，佢哋就會爆頭死。如果有組織有預謀咁想佢哋死，唔係唔得。」
她認真地說。
「掂。你真係應該寫小說。」
「唔啦，我邏輯好差，實有好多bug。」
或者也因為她的喜好很簡單，她喜歡吃米線，四十蚊港紙有找；經常飲水，原因是既對皮膚好又沒有卡路里；她也可以靜靜坐在窗邊，一直看外面的風景：
「你住得咁高，真係好，出面幾好睇吖。」
「係咩。」
「係啊，都幾舒服吖咁樣望住，又有燈又有山。」
她會盯着被蟻圍繞的糖，看牠們爬來爬去，總之好無聊好無聊。
她會在夜晚六點半外出跑步，然後在七點半紅着一張臉回家，背脊全濕。
「咁勤力嘅？」
「係，實踐緊終身事業。」
她反問他：「係呢，咁你平時有咩做？好似唔多見你出街喎。」
「冇做咩呀……打吓機、彈吓琴囉。」
「你係鍾意嘅？」
「OK啦。」
「咁就得啦，成日都聽到你間房有琴聲——嗯，係呢，你咩status？」
她知道他沒有談戀愛，但她很想八卦後續，女神有找回他嗎？有回心轉意嗎？現在，他們熟絡了一些，所以她就問。
「冇啊，我毒撚嚟。」
「咁有冇同鍾意嘅女仔傾偈啊？」
阿樂忽然混亂，不知所謂心上人其實是誰？但既然是「所謂」，那他就想起之前一直心心念念的Tanya：
「冇啊……同佢，冇聯絡啦。」
「幾好吖，等下個囉。」
青青準備進房；他問：
「咁你呢？咩status？」
「A，早排分咗手。」
「節哀順變——我意思係，唔洗唔開心嘅，世上咁多好男仔，而你又咁好。」
他乾笑，並不知其分手，但見她常常沉默和發呆，應該心不好受吧；她停頓，如果真的「咁好」，為什麼又會有「不好」的際遇，是不是正正因為不夠好呢？
青青回頭，以三七臉對阿樂笑：
「我知啊，唔灰。」