電影少女 (2): 淫眼碌碌逐個郁 (1)

淫眼碌碌逐個郁  (1)
~~~~~~~~~~~~


 
「Percy，妳好。」地中海男人對一個靚女講：「歡迎妳加入。」
 
Percy點點頭微笑回應。
 
「我哋間學校個個老師都好隨和，有乜問題隨便問。」男人講：「妳有教學經驗，應該對妳不成問題。」


 
教學經驗…
 
聽到有教學經驗Percy個心沉一沉，繼續點頭無出聲。
 
「妳可以去上堂。」男人伸手出嚟同Percy握手，Percy略為猶疑之後都伸手出嚟。
 
握手後Percy離開校長室，行入教員室。
 
响教員室入面好快手攞咗教學物品，匆匆忙忙趕去班房。


 
匆忙原因唔係趕時間，而係佢唔習慣同同事接觸。
 
Percy 22歲，黑黑長髮，雪白膚色瓜子口臉，白到好似鬼妹咁。似鬼妹嘅除咗膚色之外，身高亦都係相似之處。180cm高，配合勁索靚樣，成個Model咁款偏偏响學校出現。
 
而家學校出現嘅Percy，係一個教師。
 
縱有model身型，但係無model特性，至少唔鍾意响人羣前露面。
 
怕醜又唔鍾意面對人，又適唔適合對住學生教書呢？


 
適合好、唔適合又好，佢已經行到一個課室前面。課室道門閂埋，望住一道緊閉大門Percy深吸一口氣壯膽，然後打開大門。
 
大門打開，坐响頭排嘅學生見到咁索嘅靚女望到唔識講嘢，淨係望住佢。Percy見到咁就成身唔自然，唔多敢行入去。
 
門開咗無人入嚟，頭排果啲又定哂鏡。其他學生覺得好奇，所以伸長個頭望吓到底邊個打開度門。當其他學生見到Percy，有部份都同樣望到發呆；但係都有啲講到嘢，講到嘢嘅都係同聲讚Percy好索！！
 
 
「嘩！！靚女喎！！」
 
「係喎！！成個Model咁喎！！」
 
讚美聲揚起，Percy更加唔自然，塊面都紅起上嚟。
 
「乜嘢Model呀？？」睇唔到Percy嘅學生問，之後行出去睇，當見到Percy後又係望到呆哂。


 
做咩呀…
 
做咩係咁望住人呀…
 
唔好喇…
 
Percy俾成班學生望到勁怕醜，垂底頭內心叫佢哋唔好望。佢內心說話班學生唔會聽到，所以仍然係咁望。
 
「條女好高喎！！」
 
「所以咪話model囉。」男學生講：「點會無喇喇走過Model嚟嘅？」
 
「係喎，明明話有個新班主任嚟。」另一男學生講：「唔通哩個Model係我哋班主任？？」
 


「你就想，發夢喇！！」女學生問Percy：「靚女，妳嚟搵邊個？？」
 
我嚟搵邊個？？
 
我嚟教書果喎…
 
駛乜怕醜呀！！
 
Percy諗起自己係嚟教書，振作心情抬起頭望住問佢果個女學生講：「我係嚟教書嘅。」
 
「妳嚟教書？？」學生們聽到Percy話嚟教書，個個都以為自己聽錯！！
 
「哩度係F.5E，啱唔啱？」問完之後學生答係，Percy再講：「我就係你哋新班主任，Miss Chan。」
 
「Miss Chan ？？」


 
「佢係Miss？？」
 
「靚成咁做Miss？？」
 
學生們聽到Percy居然係Miss，個個都唔相信咁大聲質疑。
 
佢哋咁大反應，搞到Percy都窒一窒。但係諗起自己係教佢哋，個心又定返哂。
 
「無錯，我係你哋班主任。」Percy目光橫掃衆學生，再講：「我係接Miss Lui嚟教班，同時我亦都係啱啱嚟哩間學校教書。」
 
橫掃一衆學生後，Percy講：「我之前都有教開書，我嘅教學方式係採取開放，唔識嘅即管問唔駛客氣...」
 
Percy由發言一刻回復教師身份，唔再怕醜望住成班學生，講嘢都充滿自信，同頭先怕怕醜醜嘅佢可以話係兩個人。
 


講咗一輪教學目標之後，攞起手上學生名單。
 
「正如頭先所講我同大家啱啱先見面，所以會陌生啲。」Percy講：「叫各位同學時未必記得你哋個名，所以會攞住哩份學生名單叫名。」
 
Percy放低手上名單，望住衆學生講：「叫你哋果時，可以...」
 
Percy望住啲學生眼神，男嘅就色迷迷、女嘅就唔多接受Model Miss，唯獨有個男學生眼神正經...
 


（待續）