電影少女 (2): 淫眼碌碌逐個郁 (4)

淫眼碌碌逐個郁 (4)
~~~~~~~~~~~~~



到第二日返學，Percy同樣唔會主動同其他教師講嘢，見到面都只係好輕描淡寫咁點點頭。當然佢唔係囂，而係怕醜。

Percy唔多同其他教學講嘢哩種情形，引起佢哋猜疑。猜想緊咁靚嘅女仔又唔願講嘢，到底佢係咩人呢？

佢哋圍埋一齊細細聲講Percy，Percy知道佢哋講緊自己就驚驚青青，唔想留响教員室面對佢哋，攞起教科書急急腳去課室。



行出教員室個心又定番啲，唔駛再俾佢哋對自己竊竊私語，講自己是非。

個心定咗一陣又要面臨緊張，因為佢已經行到自己果班個課室。抬頭一望見到F.5 E門牌，Percy深吸口氣同自己講：「陳詩雯，妳要教書喇！！」講完之後推開課室門行入去，望住班學生講：「Good morning class。」

「Good morning miss Chan。」

「今日我要教嘅係…」Percy唔講其他嘢，一入課室就講書。佢一教書就變咗第二個人，表現出專業有自信神態教學，唔再係頭先對住班miss 呀sir咁怕醜。雖然係咁，望住班學生果時始終唔想望到佢，當望到果時即刻避開視線。

佢，就係第一日返學見到好靚仔果個王智琛。



好快又差唔多落堂，Percy講：「今日課書講完，有咩唔明可以聽日問我。」講完鐘聲響起落堂，Percy又係急急腳閃，唔知以為佢趕下場。

佢的確去下場，下一場就係其他班。入課室前同樣深深吸氣，鎮定心神就教書。响其他班教書都係閒話少說，一開波就講書。唯一唔同嘅就係可以放心望住課室上每個學生，唔駛左閃右避。

因為殺死人學生只有一個，其他班係無。

教多幾課書到咗食飯時間，一到放飯個肚就投訴咕嚕咕嚕叫，Percy諗起尋日拒絕同Ng sir佢哋食飯，如果今日又叫佢去食，咁食唔食好呢？

唔食lunch，留响度睇小說？？



但係咁餓好難頂喎…

靜雞雞自己去食？？

俾佢哋見到咪麻煩？？

點好呢？？

心大心細時入到教員室，Ng sir同其他教師圍埋一堆傾偈，見到Percy入嚟就個個望住佢，突然間咁多對眼望住嚇到佢窒一窒！！

「Miss Chan。」Ng sir同Percy講：「我哋响岸玖酒樓book咗枱，一齊食吖。」

「係囉，齊齊食lunch傾吓偈，鬆一鬆。」另一個男教師講。



Book咗枱一齊食飯？？

Percy聽到佢咁講，望吓佢哋都唔少人，一齊食飯咪要面對佢哋成班？？

啱啱返工又唔熟，唔好喇...

但係點推呢？？

Percy諗緊點樣拆招，望住Ng sir但係個腦轉唔到；Ng sir就望實佢等緊回應，對望一陣Percy都係諗唔到，唯有應承喇。

「咁好...」

Percy未講完就有人敲門，敲門聲傳出個個都望向大門。見到敲門嘅係個男學生，王智琛。

「咩事呀？？」Ng sir問。



「我嚟搵Miss Chan。」

搵我？？

佢做咩事搵我？？

Percy唔知王智琛點解要搵佢，Ng sir再問：「搵Miss Chan？？」

「係，今日課書有嘢唔明想問問Miss。」

佢有嘢唔明？？

我教得唔好？？



不過佢嚟問我，咁我咪有借口唔去食飯？？

好嘢！！

Percy滿心歡喜時Ng sir又講：「而家係午飯時間，Miss Chan要...」

聽到Ng sir想叫王智琛走，Percy立即插口講：「係我叫佢嚟。」

Percy話係佢叫王智琛嚟，Ng Sir焗住收口。Percy講：「你嚟搵我有...」

弊！！

爭啲講錯嘢㖭！！




（待續）