野性呼喚: 第十四章 ： 第一次上佢屋企

啲雨成日無停過，天雨路滑，容易有車禍，我見咁晏van仔仲未到，有啲垝心佢有無交通意外，我俾電話佢。

“喂，你仲未到嘅？”

“點呀，靚女，掛住我？半個鐘後到！”

“痴線，掛你個頭，我見成日落雨，擔心你有無事？”

“落吓雨啫，我手車，你唔駛擔心喎，我好快到。”



公司同事怕落雨怕塞車，趕住早啲走，得翻我一個人喺度。

差不多半個鐘頭後，van仔真係趕到，見佢扐住我公司啲貨之餘，仲抽住兩盒食物，加埋一盒啤酒手。

佢件tee仲未乾晒，睇落好攰，今日咁嘅天氣，佢冒住風雨都keep住佢嘅承諾。

“你真係請我食？”

我即刻接手，幫佢扐住啲食物。



“超，小姐，我幾時呃過你啫！”

“你成身濕晒，凍唔凍呀？”

我怕佢冷親想除件外套俾佢。

呢輪愈嚟愈關心佢，自己都不自覺，莫非男友成日唔喺香港，本來對佢嘅感情，投射咗落van仔身上。。

“見到你，心都罄晒，點會凍丫，哈哈…不如食嘢先喇！”



Van仔成日要呈英雄，點都唔肯披住我件外套。

同我講咗一陣笑，正準備開始食嘢，點知聽到打開大門聲，我知係老闆返嚟，佢好多時喺出面做完嘢，都返嚟處理文件。

好彩我哋仲未打開啲食物盒，咁我立即做返正經事，點收van仔送嚟啲貨。

老闆見咁夜先送貨，佢望咗van仔一眼，喺我耳邊問我van仔係咩人，跟住分咐我同佢做份文件，就入番佢間房。

“老闆叫我做啲嘢，不過好快，你不如落架車度等我好唔好？”

我好細聲咁同van仔講。

“我詐締喺度同你交收，等佢走囉！”

“佢依家先返，今晚有排都未走！”



打發咗van仔落停車場等，我盡快做完份文件交俾老闆，同佢解釋咗van仔係送貨司機，就匆忙落停車場，不過唔知佢架車泊咗喺邊。

不過即刻見到有架車閃咗幾吓車頭燈，我見到van仔喺車裡面。

“無得喺你公司食，咁去邊度食好呀？”

“睇你成身濕晒，有無地方換咗你啲衫先？”

“不如咁丫，上我老竇間公屋喇，我有衫喺嗰度，可以換。”

我知van仔租咗劏房，不過佢無提議上嗰度，可能裡面有啲嘢唔方便俾我見到。

“點解唔上你間劏房？”



我只不過隨口問，無特別用意。

點知van仔好緊張，好尷尬。

“我嗰度好亂，早前識咗個學生妹，佢擺咗啲底衫褲喺我度，仲貼咗啲相喺牆！”

佢諗咗一陣，估唔到van仔好似罪犯認罪咁，講咗原因出嚟，仲好驚我責怪佢咁。

聽佢咁講，當時我有啲矛盾，有啲嬲佢成日亂識女仔，唔知我係咪佢其中一個獵物。

不過好開心佢對我咁坦白，俾著第二啲男仔，可以有一百個理由解釋，佢選擇坦白，仲表現出緊張我，怕我嬲佢。

⋯⋯⋯⋯

“你爸爸呢？”



上到van仔爸爸喺沙田間公屋，屋裏面靜應應。

“老竇佢返咗鄉下，一年落返香港一兩個月。”

“我以為你屋企有人喺道，不如你換衫先，我落番車等你，跟住去過第二度食嘢喇！”

孤男寡女，雖然相信van仔唔會咁下流，我都仲有啲驚。

我怕我信錯佢，因為佢一直眼甘甘望住我。

我今日雖然係Tee配長褲，但係件衫好緊身，條褲就又薄又貼身，仲隱隱約約見到我好細條嘅under，正話俾雨淋濕咗一半，若隱若現咁。

突然間，眼前面閃咗一吓好強好光嘅電，跟住就「嘭」好響一聲，打咗一個雷，直頭好似劈中間屋咁，雷同電無停過，啲雨仲大到好似倒水咁。



“咁大雨，無得落街食喇，不如你帶埋啲燒肉、油雞，我送你番屋企，你慢慢食啦！”

“唔好啦，大家一齊食啦！”

Van仔走去門口，打開埋度門。

“做咩？”

“打開度門，等你放心啲，萬一有咩，你可以大聲叫嘛！”

“唔好咁啦，我唔係咁意思呀！你刪埋度門先啦，我食埋先走嘞！”

佢以退為進，反為我覺得唔好意思。