野性呼喚: 第八十九章 ： 想見吓佢

呢次係我第一次向XX發脾氣，當我冷靜落嚟，我問自己，點解咁橫蠻無理，幾時開始將佢對我嘅尊重，變成對佢嘅指責？我責怪自己。

莫非我真係受到Julie喺facebook發嘅帖文同相片影響？

而家每個月一兩次，大多數喺星期一，佢都會post佢前一兩日喺海外影嘅相片，每次景點都唔同，但全部都鄰近XX而家工作緊嘅城市。

如果我無推斷錯誤，佢應該係同XX定期會議嘅前後，一齊出遊去玩。

XX前日話會再聯絡我，但過咗兩日，佢一啲音訊都無，理解佢需要時間陪Julie，仲要兼顧工作，忙碌都無時間搵我係可以想像得到。



不過，一直到而家，Julie所post嘅每一張相，XX都無出現過，甚至XX借調總公司前，同佢一次旅行，Julie都無post過任何一張佢哋嘅合照。

無明顯出現，唔代表完全無，只係顯示Julie處事好有心思同技巧。

只因為Julie嗰次post佢喺酒店房間嘅相，喺相片嘅一個角落，XX著住浴袍嘅背影，倒照喺一塊茶色玻璃上面。雖然係淡淡一個背影，我同XX一齊咁耐，一眼就認得出係佢。

到底係Julie好有技巧咁將XX擺喺鏡頭之內，定係無意將佢影埋上鏡，我就無從稽考。

但出嚟嘅效果，令到好多人知道佢有親密伴侶。



佢呢一張相，得到好多佢嘅朋友留言向佢祝福，呢啲係咪XX師姐所講，佢係隱晦向所有朋友宣布佢同XX復合呢。

我想呃自己，Julie讀大學嘅時候，佢同XX一齊之初，喺佢啲相片裡面XX都無出現過，直至佢哋關係穩定咗，Julie先將佢哋嘅合照擺上社交媒體。

而家佢哋嘅情況會唔會都係咁，代表佢哋關係仲未穩定呢？我係咪仲有一線希望？不過我唔敢奢望。

結果將會係點，越嚟越清楚，我只可以向現實屈服，接受XX離我越嚟越遠。

...........................



下晝差唔多六點，老闆同我一齊見完最後一個客，佢準備放工。

"細C，今晚唔好返公司喇，早啲返屋企休息吓啦！"

老闆突然咁同我講，我手都震埋，我怕佢知道前晚我同van仔喺office嘅事。

"我......."

雖然我諗唔到點解佢會知道，但既然東窗事發，我倒不如向佢道歉，希望佢原諒我。

我仲未道歉，佢見到附近有間cafe，叫我入去飲杯嘢，傾一陣。

"唉，我明白你呢輪心情好差，我見到你情緒波動好大，成日若有所思咁樣，我估你感情出現問題，係唔係？"

買咗兩杯咖啡，一坐低，老闆就問我。



嗰日老闆親眼見到我控制唔住情緒，伏喺佢膊頭喊。

佢咁講，我又再次諗起XX，眼開始紅。

"咩事都好，睇開啲啦，我見你有事無事，見完客都趕返公司，孤零零一個人喺公司，盞喺度胡思亂想啫！"

老闆語重心長，佢咁關心我，而我就喺佢公司裡面胡混，我更加慚愧。

"我爸爸、媽媽去咗旅行，細佬住hall，返屋企都係得我一個對住四面牆，都係咁孤獨。"

"傻女，就算係四面牆，屋企嗰四面係暖嘅，office嗰四面係冰冷嘅，聽我講，今晚早啲返去，休息吓又好，搵朋友傾吓偈又好，一於唔準返office。你嫌孤獨，聽晚放工，我請你食飯！"

老闆講完，催我飲埋杯咖啡，就趕我上車，送我返到屋企樓下。



上到屋企先得閒開同事send俾我嘅what's app。

係負責同van仔交收嘅同事，佢未夠五點俾嘅message，佢話間物流公司換咗司機，佢好開心，話日後唔使再同van仔交收。

老闆話屋企啲牆係暖嘅，但暖或者冷都係一幅令人感覺更加孤寂嘅牆。

我相起van仔唔會因為前晚嘅事影響吖嘛。

我有時好憎自己，明明唔想同van仔糾纏，但自己嘅意志力又薄弱，一輪唔見佢又會掛起佢，又忍耐唔到內心寂寞而同佢搞埋一齊，只係每次事後內疚，但又堅持唔到唔見佢。

“喂呀，做咩換咗人，唔係你上我公司？”

佢揸緊車，未必方便講電話，我send message俾佢。

“老實同我講，唔係發生咩事嘛？”



佢成個鐘頭都無回應，我直接啲問佢。

van仔一路無回應，成間屋好死寂，我怕佢真係出咗事，呢幾個月嚟，我已經習慣咗等、等、等。

“無嘢！咪亂諗啦，我去旅行嘛，條友頂住幾日，我返嚟就我做翻！”

我等多成半個鐘，van仔終於打電話比我。

“你聽日起程？唔......”

van仔都要離開，近排唯一一個陪我嘅人都唔喺度，一輪孤寂感衝上我腦門。

“係呀，做咩？有嘢想講？”



van仔似乎唔明我諗咩。

“無呀，唔......想見吓你，唔.....你唔得閒就算啦。”

我好想見佢，雖然我哋只係隔咗四十八小時無見面，我覺得已經好耐，我想佢離開香港時前嚟見吓我！

“得閒！點會唔得閑！你俾一個鐘頭我，一個鐘頭後即到，一個鐘！”

“小心揸車呀！”

我好認真同佢講。