不如我地一齊跑愛情長跑？: 因為愛情

單車徑邊樹影婆娑，山邊隱隱約約傳來蟬鳴。今日我約咗中同兼大同阿浩食lunch，啱啱完咗一齊散步返屋企。阿浩對哲學同人生好有自己見地，同佢傾計經常好有啟發。

「阿浩，世界咁多苦難，點解人依然好似好開心？依家肺炎大爆發、極權執政、冰川融化氣候反常⋯⋯細個唔覺，大咗就覺得好無希望。」

「係㗎，世界就係咁多苦難。所以我覺得無生無苦，唔生下一代就唔會傳承苦難。我極端啲諗，可能全世界都自殺就可以阻止呢啲悲劇。」阿浩輕描淡寫地講。

「咁即係你想自殺？」我抬頭仰望高我一個頭既阿浩，覺得有啲訝異。

佢無回望我，而係將視線轉移去樹枝頭嘅雀巢。剛巧有兩隻麻雀飛過。





「以前有諗過㗎，但我無咁做。」

「點解啊？唔通你有鍾意嘅人，唔捨得死？」阿浩一直都無咩緋聞，又好少提及感情事，我仲以為佢無慾無求添。

「哈哈，你成日都諗埋啲八卦嘢。不過愛情都係一種令人生存落去嘅理由。點解人明知死咗可以解脫，但都唔想死吖？因為佢地相信生存會得到比死亡更大嘅幸福。所以為咗呢啲未知到嘅幸福，人即使面對痛苦都甘之如飴。例如愛情，我地期待開花結果，所以甘願承擔被傷害嘅痛苦。」

「因為愛情不會輕易悲傷，所以一切都是幸福的模樣。哈哈！」

雖然愛情的確好甜蜜，但甜蜜以前往往要經歷好多鹹酸苦辣。大概，好多人經歷跌跌撞撞都未必可以修成正果，就好似賭博咁，場場都賭自己可以一鋪翻身發達，然後輸到遍體鱗傷。只係人又會抱有希望，屢敗屢試。如果係我，可能都會沉迷賭海掛。





忽然，手機震動彈出通知——「你與WF成功配對，要開始對話嗎？」