[陳子鋒系列] 大學入學篇: （三）木人巷（2）

「到啦，呢度就係木人巷！」
 
女生把男生從登記處帶到木人巷的位置，臉上則是一臉不情願。
 
「哇，呢度就係木人巷？駛唔駛咁多人呀？」
 
「年年都係咁㗎，望下望下就慣㗎啦。唔好講咁多，你快啲入去執返你啲蘇州屎。你真係去親邊都無好帶挈。」
 
「我今日第一次入嚟呢間學校咋喎，又關我事？」
 




「咩第一次呀，上次你幫天命叔拎嘢畀我咪嚟過囉！本身都好地地，點知你一嚟宿舍就鬧鬼啦！好在嗰陣大部份人去晒上堂，如果唔係有排煩。」
 
「哇哇哇，黃炎冰你唔好姓黃啦，你走去姓屈啦，你宿舍鬧鬼都入我數。」
 
「作死你呀，講過幾多次唔好叫我黃炎冰，你一係叫我Irene，一係叫我鄭婉冰，無人知我真名㗎好無！」
 
黃炎冰聽到真名後，忍不住用力扭動男生的耳朵以作懲戒。
 
「喂，痛㗎，隻耳仔甩啦，快啲放手啦。都唔明你，明明你老豆老母都無事啦，做咩仲要用鄭婉冰呢個名啫。」（有關黃炎冰父母被救的故事，之後會在番外篇連載，時間點在陳子鋒進入大學登記日前。）
 




「我夠想用返黃炎冰呢個名啦，但我喺度讀咗成年，無啦啦轉名實好多人問咩事，我唔想解釋咁多，同埋我阿爸阿媽都同意我繼續用鄭婉冰呢個名。」
 
「改個名有幾煩啫，明明黃炎冰呢個名襯你多啲。」
 
男生的話音剛落，黃炎冰俏臉上隱約泛起了一陣胭紅。
 
「夠啦，我用咩名關你咩事啫。你快啲入去啦，如果唔係就麻煩㗎啦。」
 
「得啦得啦，小鬼嚟啫，唔駛咁擔心。話時話，你唔一齊入去？」
 




「唔入啦，我又唔係新生，入面啲人有啲我都識，廢事咁尷尬。」
 
「同我一齊行啫，唔駛尷尬呀？我都唔係好失禮啫。」
 
「你講少啲廢話啦，我唔入去唔代表我咩都唔做。由你入校園開始，成個校園嘅氣氛明顯變得唔尋常，我要去睇下究竟發生咩事。」
 
「又係我錯？唉，好啦好啦，咁分頭行動啦。」
 
話畢兩人便朝著相反方向前進，而黃炎冰離去的時候，察覺到有一名女生在不遠處偷偷觀察著兩人，嚴格來說是觀察著走進去的男生才對。
 
因為炎冰離開時，這名女生的眼睛仍然緊盯著男生的背影不放。
 
「搞乜鬼，佢一嚟到學校成個氣氛都變晒，唔止鬼，依家連怪人都有埋......唉，唔理啦，應該無事嘅，都係學校呢邊重要啲。」
 
炎冰瞄了那名女生一陣子，感覺到女生有些特殊，但沒有甚麼不詳的氣息後，便決定不去搭理這名女生，繼續前往調查校園的異動。




 
而女生亦完全沒有在意黃炎冰的去向，尾隨着男生走進木人巷中。