[陳子鋒系列] 大學入學篇: （四十七）營火晚會（5）

「首先，你就想像，迎新營入面嘅所有人，包括喺度做嘢嘅營地員工，都已經變得奇怪先。」
 
Raymond似乎沒有想過這樣的情況，在驚呆了一會後，便很快接受了這個事實。
 
「嗯，好，我信你。雖然唔知點解會變成咁，但我本能地感覺到你無呃我。係因為病毒？有人洗腦？瘋狂科學家嘅實驗？」
 
「嗯，都可以話係被人洗腦嘅。不過呢個唔係重點，重點係因為你無好似佢哋咁被洗腦，好有可能，佢哋會當你係敵人。」
 
「敵人？你意思係佢哋可能會襲擊我哋？」
 




「嗯，好有可能。」
 
雖然我不知道貝爾菲格接下來的計劃，但肯定他早晚會對我出手，那麼身為普通人的Raymond是不可能安然無恙的。
 
「吓？咁我哋不如走啦，偷偷地出營，或者報警，搵人幫我哋。」
 
看着Raymond的反應，我才發現，自己已經被這些鬼鬼怪怪的東西弄得麻目了，忘記這才是普通人應有的反應。
 
「唔得，我唔走得。」
 




「吓？點解呀？唔係喎，呢度咁唔對路，我哋留喺度咩都做唔到，不如走啦。」
 
「唉，唔係呀，我都唔知點同你講好......總之，我唔走得㗎。但係，你講得啱，你可以離開呢度，陣間我同你搵個機會同佢哋講聲，你仲係唔舒服，要返去屋企休息下，咁到時你返去就好好休息，過完迎新營佢哋就會恢復正常。」
 
Raymond聽到，睜大雙眼看着我，仿佛好像在看甚麼鬼怪似的。
 
「你真係唔走？你當自己係李小龍咩？真係一打十呀？」
 
「我唔係李小龍，但......我走唔到㗎啦，雖然咁講好似好白痴，但，呢個係我嘅命運嚟，唔係想避就避得到。所以，我唔走得。」
 




Raymond聽完後，還是用理解不能的眼神看着我。
 
「雖然我唔明你講咩，但總之你就係決定唔走啦嘛？」
 
我點了點頭。
 
「好，你唔走，我自己走。你唔好後悔呀。」
 
我聽到後不禁失笑，對，這才是普通人應有的反應。
 
「我唔會後悔，你放心啦。不過你都要諗下，搵個咩理由離開先得，如果你話唔舒服嘅，我驚佢哋會借啲意話搵人陪你去。」
 
「你又啱喎，一係，我偷偷地離開囉。」
 
「你諗都唔好諗，尤其係你唔想引人注目，你要記得你報咗名個營有晒你啲資料，陣間被人爆咗出嚟話你偷偷地走咗，可能會影響到你之後大學嘅生活。」




 
「咁，咁......無辦法，我再諗下點算好啦。」
 
「你好好諗下啦，同埋我哋都唔好留喺度太耐，廢事令佢哋起疑。」
 
我與Raymond繼續前往食堂，在途中亦不斷提醒他，待會在食堂裡盡量不要表現得很突兀。
 
然後，我跟他來到了食堂的外面，從外面看進去，發現與下午剛到達這邊時完全不同，沒有了那種大學生應有的氛圍，整個食堂瀰漫着沉重的氣份與無形的壓力。
 
而Raymond還沒進到食堂前，整個人已止不住顫抖，看來十分痛苦，這樣下去他應該不用瞎扯甚麼理由了，直接通知學生會的人告知不舒服要離去便可以了。
 
然後我注意到，在台上的Andy與Angel注意到我們的到來，正用冰冷的眼神看着我們。
 
「Raymond，行啦，再唔行會被人發現你無被洗腦。」
 




「我，我都想行，但......但我郁唔到。」
 
我在他旁邊感受到他全身顫抖，明白他並不是在胡扯，他是真的不能動了。
 
而我發現，食堂裡的人，開始注意到我們兩人，如果再不進去的話，難保會發生甚麼事情，可能貝爾菲格會突然在這裡發難也說不定。
 
「唉，你等我一陣。」
 
Raymond那種像是第六感的能力，看來比想像中更厲害，在這種充滿敵意的地方，要走進去確實也不是一件容易的事。
 
我只能偷偷把手搭在Raymond肩膊上，然後用最低限度的靈力來為他施展降伏心魔指印。
 
「無事啦，行啦。」
 
我拍了拍Raymond肩膊，他還想說些甚麼之際，便發現身體的顫抖已然消失。




 
他用驚訝的目光看着我，雖然不知道我對他做了甚麼，但能肯定是我搞的鬼。
 
「行啦，再唔行就會引起更多人注意㗎啦。」
 
「講真，子鋒，你到底係咩人？」
 
「我？唉，我只係一個不幸嘅細路咋......」
 
我沒有正面回應他的疑問，亦根本不知道可以如何回應，故我選擇了輕輕帶過，然後我倆坐下後，便開始品嘗一頓食之無味的飯菜。
 
這應該不會成為我最後的晚餐吧？